Acts 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1Te eri eca Derebea azini Lusiteraa indi. Emi ne, ’ba Yesu vuti bipiri alu ’daa, runi Timoteo’i. Eri ovu oku Yahudiniru a’ipiri ma mvi, te ata erini eri ’ba Girikini.

2Adripi Lusiteraa ’diyi Ikoniaa ’diyi be, yi eri ma ru idu idu.

3Paulo le eri ma mu i be; eri ’du eri, li ageleni ’ba Yahudini ovupi angu nderi ma alia ’diyi ma e’yosi, a’disiku yi dria ni ata erini ovu ’ba Girikini.

4Yini agaria aku amboru ’diyi ma aliasi, yi fe azita ’ba ti opele ’ba ’wara Yerusalemua ’diyini azileri, yi ma mba yi ma ta ani.

5’Dini ’ba kanisani ’diyi yi omba okporu a’itasi, kalafe yini ezu etuzu indi.

6Orindi Alatararuni ogale yi dri e’yo olukokoru Asiaa sirisi, yi aga ’angu Ferugia pia Galatia be.

7Yi ka ca ogogo Musiaa, yi o’bi fi Bituniaa, te Orindi Yesuni oga yi fiko si;

8’dini yini agaria Musiaa yi ca Troaa.

9Paulo ndre eceta inisi: agu Makedoniaari so pa matu ’bazu eri vu ’yozu kini, Mi ezo Makedoniaa ama aza kozu!

10Erini eceta nderi ndreria ’boria, coti ama nda leti fuzu muzu Makedoniaa, amani varia ndi ndi Mungu omve ama e’yo bari oluzu yi tia ’bo.

11Ama zo ogurusi engazu Troaa muzu kilili cazu Samotrakea, drusi ’dini ama ca Neapolia.

12Engazu ’dale ama ca Filipia, eri ovu aku ambo aku Makedoniaa azini ’diyi agapi rari, eri angu ’ba Romani sileri. Ama nga ovu aku nderi ma alia o’du were.

13O’du sabatonisi ama fu aku tia muzu yi raza tia, pari amani egale ’ba adri Mungu zi aleniaria; ama ri va e’yo ’yozu oku yi okupi tualu ’diyi be.

14Oku alu runi Ludia’i, eri enga aku amboru Tuatiraa, eri ovu ’ba rangi bongo wura ojazuri ozipiri, eri ’bi Mungu rupiri indi, eri eri ama ra. Opi zi asi erini e’yo Pauloni oluleri a’izu.

15Eri ka baputizi bi ’bo, ’ba ovupi eri vile joa ’diyi be dria, eri ’ba matu ama vu kini, Emi ka ega ma ovu ’ba Opini adadaru, emi emu jo mania ovuzu wa’di maniru fo! Eri omi ama okposi.

16Eri eca ’dini, amani muria pari ’bani adrizu Mungu zizuria, ama fu dri zamva alu ati’boru be. Eri ovu orindi e’yo ondripiri be, eri eji ’orodri amboru opi ini dri erini andri Idrilerisi.

17Eri bi Paulo pi ma vuti ama be, oyuzu uru kini, Agu ’diyi yi ovu ati’ba Mungu Uru Turini, yi olu emi dri geri patani.

18Eri ’ye ’dini o’du kakau. Te Paulo ma asi ande e’yo nderisi, eri oja i, ’yo orindi tia kini, Ma dro mi ru Yesu Kristonisi, mi fu eri ma aliasi ra! Eri fu coti.

19Te ’ba eri jepi ’diyi ka ndre geri yini orodri isuzuri avi ra, yi obi Paulo pi Sila be, yi ose yi pari ’bani afa jezuria, ’ba ’ba dri cepi ’diyi ma drilia.

20Yi ka ca ’ba e’yo lipi ’diyi vu ’bo, yi ’yo kini, ’Ba ’diyi yi osa aku amani tu, yi Yahudini.

21Yi olu ama dri adriza ana’i ’ba Ruminiru ’diyini ecole a’ile kani ’yele ku ’diyi.

22’Ba ongulumuru yi enga yi ruaa tualu; azini ’ba e’yo lipi ’diyi yi osi bongo yi ma ruaa ra, azi yi cozu kalisi.

23Yi ka yi co kalisi kakau, yi o’be yi arujoa, yi azi ’ba arujo agei tepiri eri ma te yi agei okporu.

24’Ba nderi yini e’yo ’diri aziria eri tia ’boria, eri ’be yi jo alialeruria, azini eri osu yi ma pa pati okaliru ’ba ma pa ecizuri ma alia.

25Iniayii Paulo pini Mungu ziria Sila be, yi ri ongo ngo Mungu vu, ’ba azini arujoa ’diyi yi co bile yi erizu.

26Coti oyakia amboru eca, arujo ma eti ’ba ya ya ani; coti jotile dria ovu zizaru mgbo, azini anziriku ’ba driani ovu ayuzaru.

27’Ba arujo ma agei tepirini oruria o’duarisi, erini neria arujotile ovu ozizaru, eri enze sei ini, eri ’ye i fu ani, erini osule ’ba aruru apa ’borisi.

28Te Paulo oyu o’duko urusi kini, mi ’ye mi onzi ku, te ama dria do

29Eri omve ad, eri mbu arujo alia; eri roani yaria urisi eri eco i va Paulo pi ma drilia Sila be,

30eri ji yi amve, eri ’yo yi tia ’dini kini, Opi la! ma ma ’ye sini ya ovuzu pazaru?

31Yi ’yo eri tia, Mi a’i Opi Yesuni, mi nga mi pa ra, mi’i, ori’ba mini pie dria.

32Yi olu e’yo Opini eri tia ’ba ovupi eri vile joa ’diyi be dria.

33Eri ji yi ini nderisi coti, eri oji bile yi cozuri indi; eri bi baputizi coti, ’ba erini ’diyi be dria.

34Eri ji yi uru i vile jo alia, fe nyaka yi dri; eri ovu ayikosi tu erini Mungu a’ile ’bo ’ba i vile joa ’diyi be driarisi.

35Angu ka ati ’bo, ’ba e’yo lipi ’diyi pe asikari ti ’yozu, Mi otru ’ba ajeka ’dayi.

36’Ba arujo agei tepiri ’yo e’yo ’diri Paulo ma tia ’dini, kini, ’Ba e’yo lipi ’diyi epe ’ba ti emi otruzu; e’yo ’disi emi fu di mu asi anzuru be.

37Te Paulo ’yo yi tia kini, Yi co ama ’ba ma milia ayii, ama e’yo likokoru, de ama ’ba Rumini, o’be ama arujoa; le curu’do ama ose o’be amve ndindiru ya? ’Dini ngoa ya Onyiru yi ma ngulupi ma emu ama ofuni.

38Asikari ece e’yo ’diyi ’ba e’yo lipi ’diyi dri, te yi ovu urisi ka eri kini yi ’ba Rumini;

39yi emu ani, yi ka yi ma asi omi ’bo, ofu yi amve, le yi ma mu, ma ku aku nde ’diri ra,

40Yi fu di arujoasi ra, yi mu fi Ludia vile joa; yi ka adripi ndre ’bo, ka yi asi omi ’bo, yi mu ra.

← Chapter 15 Jump to: Chapter 17 →