Acts 14

Lugbara (E’yo Siza Alatararu Munguniri BIBLIA)

← Chapter 13 Jump to: Chapter 15 →

1Eri eca ’dini Ikoniaa, yi fi tualu pari ’ba Yahudini yi okuzuria, yi olu e’yo, ’dini ’ba ongulumuru kakau, ’ba Yahudini azini ’ba Girikini indi, yi a’i ani.

2’Ba Yahudini a’ipi ku ’diyi yi enga ’ba luruni, yi oja ’ba ’diyi ma asi onzi adripi nde ’diyi vu.

3’Dini yi ovu ’dale o’du fudri ci e’yo oluzu uri kokoru Opi ma e’yosi; Opi eri nze ’ba dri asi ndriza ini ma e’yo ma eti, okpo fezu yi dri eceta pi ’yezu tali osutaru ’diyi be.

4Te ’ba aku amboru nde alia ’diyi yi co yi ma esele iri; azini ’diyi le ’ba Yahudini, azini ’diyi le ’ba ti opele ’diyi’i.

5Te ’ba Juruni azini ’ba Yahudini ’diyi, ’ba yi dri cepi ’diyi be, yi le omba ’ba e’yo ’yezu yi ruaa atriru, yi o’bezu onisi indi.

6Te yi ka e’yo nderi eri ra, yi apa aku amboru angu Lukaonia ma alia ’diyia, yi ma ru Lusitera azini Derebe, azini angu ovupi yi ageia ogogoria;

7’dale yi ovu e’yo bari oluria.

8Te Lusiteraa agu alu ripi valesi ecopi acipi kuri indi; eri osi trua andri ma alia pa acoza be ’dani, acini nga drio aluni ku.

9Agu nderi eri Pauloni e’yo oluria; Paulo su mile ruania okposi, erini neria eri ovu a’ita i pazuri be,

10eri ’yo o’duko urusi kini, Mi so pa urulesi. Eri mbu uru, ’ba ad aci,

11’Ba ongulumuru ka e’yo Pauloni ’yeleri ndre, yi enga o’duko yini uru, yi ’yo ti Lukaonianisi, Mungu yi esi va ama vu wura be ekile ’bale!

12Yi ’da Baranaba ma ru Zeu’i, yi ’da Paulo ma ru Herima’i, erini ovule ’ba e’yo olupi turisi.

13Atalau edeta edepi Zeuniri, ojio erini ovu aku amboru nderi drilia amveleru, eri eji tiago edezaru patibi onyiafarusi ’diyi kalitilea, yi le edeta ede ’ba ongulumuru be tualu.

14Te ’ba ti opele ’diyi Baranaba pi Paulo be, yi ka e’yo nderi eri ’bo, yi osi bongo yini, yi onzu ’ba ongulumuru ma eseliasi, yi otre okposi ’yozu kini,

15Agu ’diyi la! Emi e’yo ’diyi ’ye ’dini a’disi ya? Ama’i ama ovu ’ba rua be ekile emile, re ama olu emi dri e’yo bari kini emi ma oja emi e’yo toko toko ’diyi kuzu, emi ma a’i Mungu idriru ’bu ’bapi nyaku pi, miri pie, afa alenia ’diyi pie driari,

16Ewu agapi ’boria, eri ku ndra ’ba Juruni dria acizu waa yini lelerile;

17te ti, kuni i e’yo eti nzeza kokoru ku, te eri ’ye onyiru, eri fe emi dri ozoo ’buari, ewu nyakani kazu ’diyi be, erini feria emi aleni traria nyakasi azini emi asini garia ayikosi.

18Te e’yo yini ’yole ’diyisi yi oga ’ba ongulumuru ewasi edeta edezu yi dri,

19Te ’ba Yahudini engapi Antio kiaa azini koniaa ’diyi eca ’dale; yi esu ’ba ongulumuru ma bile Pauloni o’bezu onisi. Yi ka eri o’be ’bo, yi se eri aku tia amve, yini egale kini dra ’borisi,

20Te ’ba Yesu vuti bipi ’diyini pa soria eri ageia, eri enga ra, fi aku amborua; te drusi ’dini, eri fu mu Derebea tualu Baranaba be.

21Yi ka de e’yo bari oluzu aku amboru nderi ma alia ’bo, yi ka ’ba kakau oja ’ba Yesu vuti bipiriru ’bo, yi nga mvi Lusiteraa azini ikoniaa azini Antiokiaa,

22’ba Yesu vuti bipi ’diyi ma asi otuzu ovuzu okporu, yi ma asi omizu indi yi ma te a’ita nderi ma alia ’dani, ’yozu onyiruni ama ma fi suru Mungunia geri inzata kakau ma aliarisi.

23Te yi ka ’ba ’wara ope yi dri kanisa vusi ’bo, yini Mungu ziria nyaka ’daza be, yi ku yi Opi yini a’ile ’bori dri.

24Yi aga Pisidiaasi, yi eca Pamfuliaa.

25Yi ka e’yo olu Perigaa ’bo, yi si Ataliaa;

26engazu ’dale yi fi oguru alia muzo Antiokiaa, pari ndra ’bani yi kuzu asi ndriza Munguni dri azi yini dele curu’do ’bori ’yezuria.

27Yi ka eca ra, yi oku ’ba kanisani tualu, yi ece yi dri e’yo dria Munguni ’yele tualu yi beri, azini e’yo Munguni jotile a’itaniri zizu ’ba Jururu driri.

28Yi ovu ’dale o’du kakau tualu ’ba Yesu vuti bipi ’diyi be.

← Chapter 13 Jump to: Chapter 15 →