Acts 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1Etu nde ’dayisi ’ba Yesu vuti bipi ’diyini ezuzu treria, ’ba Yahudini Giriki ti ’yopi ’diyi ga agata ’ba Yahudini ti yini ’yopi’i ’diyi be, yini oku awuziru yini onzole onzo yini afa awaria etuzurisi,

2’Ba tini opele mudri drini iri ’diyi omve ’ba Yesu vuti bipi ’diyi yi vu, yi ’yo ra kini, Econi amani ti Munguni kuzu olukokoru nyaka awaza ma e’yosi ku.

3’Dini, adripi, emi ma nda ’ba emi eselia aziri emini runi idule inzitasi, gapi Orindisi azini onduasi tre, amani ngale ’bale azi ’dori ma drilia ’diyi.

4Te ama’i, ama nga ama ebi Mungu zizu azini e’yo oluzu asi driasi’dani.

5E’yo ’di fe ayiko ’ba ongulumuru dri dria, yi pe Setefano ’ba Orindi Alatararuni gale asinia tre a’ita beri, Filipo pie, Porokoro pie, Nikanora pie, Timona pie, Paramena pie, Nikola ’ba Antiokiaa i ojapi ’ba Yahudiniru a’itasiri pie.

6Yi nga ’ba ’diyi ’ba ’ba ti opele ’diyi ma drilia, yi zi Mungu tia, yi ti dri yi ma dria.

7E’yo Munguni nga ku wakaka; ’ba Yesu vuti bipi Yerusalemua ’diyi ma kalafe nga ezu tu; ’ba kuhaniru ’diyi kakau nga a’ita ma vuti bi.

8Te Setefano’i erini garia ’yeta anzutirisi okpo be tre, eri ’ye tali osutaru azini eceta amboru ’ba ongulumuru ma eselia.

9Te ’ba azini ibipi engapi pari ’ba omvele Liberitinoru ’diyini yi okuzuri ma alia ’diyi, ’ba Kurenea ’diyi pie, ’ba Alegezandariaa ’diyi pie, ’ba Kilikiaa ’diyi pie, ’ba Asiaa ’diyi pie, yi enga agata gazu Setefano be.

10Te yi econi ondua erini azini Orindi fepi eri dri e’yo ’yozuri ogazu ku.

11Yi nga di ’ba inzo lipi ’diyi ofe zizaru, yi ma ’yo ani kini, Ama eri erini e’yo ’yoria Musa pi o’dazu Mungu be.

12Yi fe ’ba kakau ma asi enga dria aokosi, ’ba ’wara pie, ’ba waraga sipi ’diyi pie, yi eca dria venia, yi bi eri, ji eri ’ba e’yo amapi ’diyi ma drilia,

13yi enga ’ba inzo lipi ’diyi urulesi, yi ’yo ra, ’Ba ’dori kuni e’yo saaru ’yozu pari alatararu ’dori ma ruaa azita be ku;

14te ama eri erini ’yoria ’dini, kini Yesu ’ba Nazaretiari nga pari ’do ma dri ja ra, indi vini eri nga e’yo ’yeza Musani ndra fele ama driri oja ra.

15Te ’ba dria ripi ti nzeria ’diyi yi nga eri ndre okposi, yi ndre mile erini ekile malaikanirile.

← Chapter 5 Jump to: Chapter 7 →