Acts 7 — Lugbara (E’yo Siza Alatararu Munguniri BIBLIA)

1Te kuhani amboruri ’yo ra kini, E’yo ’diri ’dini adaru ya?

2Te Setefano nga ’yo ra: Ma adripi azini ma atipi, emi eri nga e’yo ma tia. Mungu ovupi dizaruri ece i ndra a’bi amani Iburahimu vu, erini ovuria Mesopotamiaa, de nga eri ecani adrizu Harania ku,

3eri ’yo eri tia, Mi efu angu miniasi, mi ku ori’ba mini, mi fi angu mani ngale ecele mi driria.

4Awa’dini eri enga Kalideyaa, ri Harania. Vutinia ati erini ka dra ’bo, Mungu enze eri angu ’daria, eji eri angu ’do emini ovuzu curu’doria;

5te eri feni nga angu eri dri awurusoru ku, kani pa ’bazu aluni ku, te de nga eri tini mva ku eri azi eri tia kini i nga angu nderi fe eri dri, a’bianzi erini ’diyi dri indi.

6Mungu eri ’yo ’dini, a’bianzi erini nga ovu angu andinia ani’baru, ’ba nga yi ’ba ati’baru, yi nga yi inza eli turu suo

7Te Mungu kini, Ma nga suru yi inzapi ’diyi ma e’yo li ma’i, vutinia yi nga efu emvi ma inzizu pari ’doria.

8Te eri fe eri dri aziza agele lizani. ’Dini Iburahimu ti Isakani, li ageleni o’du arosi; azini Isaka ti Yakoboni, Yakobo ti a’bi amani mudri drini iri ’diyi.

9Ama a’bipi ovu ndra ma’yalasi Yusufu vu, yi fe eri je Misiria; te Mungu ovu eri be,

10eri pa eri inzata erini ma alia dria, eri fe eri dri asi ndriza ondua be Farau opi Misiriari ma milia, nga eri ’ba ani opiru Misiri ma drilia, aku ini ma drilia indi.

11Te liki amboru ’de angu Misirinia Kanani be dria candi amboru be, e’yo ’disi a’bi amani econi nyaka isuzaru ku.

12Te Yakobo ka eri kini anya ovu angu Misirinia, eri pe a’bi amani ti pale alurisi.

13Te pale iririsi Yusufu e’da i adripi ini ’diyi dri, eri ece ori’ba ini Farau dri indi.

14Te Yusufu nga ’ba ti pe Yakoboni omvezu suru erini be dria, kalafe ’ba nde ’diyini kali aziri drini towi;

15’dini Yakobo eri si Misiria. Eri dra ’daa, a’bi amani be dria,

16yi nga yi ji sa Sekemua, ’bile Iburahimuni ndra jele silingisi anzi Hamorini ’diyi dri Sekemuari ma alia.

17Te etu ndra Munguni e’yo azizu Iburahimu beri ka eca ogogo ra, suru nde yi ezu tu angu Misirinia,

18ecazu kpere opi az ni Yusufuni nipi kurini opi nyazui Misiri ma driliaria.

19’Ba ’diri ’ye suru amani lokirisi, eri ’ye ama a’bipi onzi erini azita feria yi ma o’be anzi yini odekuaru amve, yi ma ovu idriru ku beni.

20Ewu nde ’darisi Musa nga osi ra, eri ovu ndrizaru Mungu ma milia. Mba na andri ozi eri ati ma joa ’ba ndruzu;

21yi ka eri ’be amve ’bo, Farau zi nga eri isu, nga eri ma ta mba ekile mva i ma ngulupinirile.

22Yi imbao Musani ondua dria Misirinisi; eri ovu ’ba okporu e’yo ’yozasi azini ’yeta ’yezasi.

23Eli erini ka ca kali su, eri ega i asia muzu adripi ini anzi sraelini ’diyi andrizu.

24Erini neria agu azinini candi nyaria ’ba azini dri, eri fi agu candi isupi ’dari ma arioti ofezu, co di agu Misirioururi kai ra.

25Te eri ega i asia kini i adripi yi nga ni Munguni nga yi pa i drisi, te yi vani ku.

26Drusi ’dini eri isu vini ’ba azini Israelini yini yi coria, eri ’ye yi arizu, kini, Emi adrizini are, emi omba ’ba emi eselia a’disi ya?

27Te ’ba agyini ’yepi onziri ze Musani ’dale, kini, A’di ’ba mi opiru ama drilia e’yo lizuni ya?

28Mi le ma fu ekile mini aje agu Misirini fulerile ya?

29Erini e’yo omvile ’dinirisi Musa apa ra, eri eca ani’boru angu Midianinia. ’Dale eri oti agupianzi iri.

30Eli ka aga drinia kali su ’bo, malaika e’da i eri vu pati oci beri ma ruaa diza acini ma alia oni Sinai ma rokoa.

31Musa ka ndre ra eri osu tu afa ini ndrelerisi; eri ka i ese ogogo luzu, eri eri o’duko Opini kini,

32Ma Mungu mi a’bipini, Mungu Iburahimuni, azini Isakani, azini Yakoboniri. Te Musa ma rua ya ya, eri econi luzaru uri dri ku.

33Opi ’yo eri tia, Mi tru enyiriko mi a paari, a’disiku pari mini pa sozu ’diri eri alatararu.

34Ma ne adaru a inzata ’ba mani Misiri ma alia ’diyini, ma eri otaza yini, ma esi va yi pazu. Te curu’do mi mu di, ma nga mi ti pe Misiria.

35Mungu pe Musa nde ’di yini ndra gale si ’yozu kini, A’di ’ba mi opiru e’yo lizuni ya ri ma ti ovuzu opiru azini ’ba ’ba onzepiriru, geri malaika erini ndrele pati nde ruaari vurisi.

36’Ba ’diri ofu yi amve, ce a yi dri erini tali ’yeria eceta be Misiria ’dale; azini miri Ekaruria, azini angu roko driaria eli kali su ’boria.

37’Diri Musa nde ’yopi anzi Israelini ’diyi ma tia kini, Munguni nga nabi enga adripi emini eselia ekile male-ri’i.

38Musa ’diri eri ’ba ndra ovupi ’ba ongulumuru ma eselia angu roko dria malaika e’yo ’yopi eri tia oni Sinai, driari beri, tualu ama a’bipi pie indi; eri a’i e’yo ’yoza idriru ’diyi fezu ama dri.

39Ama a’bipi ga ndra e’yo erini eriko si, te ze eri ’dale, oja asisile yini Misiri ma dria,

40’yozu Aroni tia, Mi ede amani Mungu ama enzepi Misiria ’diri, ama nini a’di ’ye erini yari ku.

41O’du nde ’dayisi yi nga afa si wura be ekile kojamvale, yi nga afa edetaru ji wura inzile inzi ’diri vu, yi nga ovu ayikosi afa yi ma drini edelerisi.

42Te Mungu oja i ra, ku yi ongulumu ’bua ’diyi inzizu, erini ovule sizaru buku nabini ma aliarile: Suru Israelini la, emi fe ma dri anyapa liza azini edetaru roko dria eli kali su ’diyisi ra ya?

43Emi ’du hema Molokini, azini ’bi’bio Mungu Refanini, wura ndu ndu emini edele inzizaru’diyi; ma nga emi nze ji re angu Babulonini ma kalaa ’dale.

44Ama a’bipi ovu ndra hema Mungu ma e’yo eti nzezaniri be roko dria, ekile Mungu e’yo ’yopi Musa tiarini azilerile, kini eri ma ede eri wura erini ndrele ’borile,

45Ama a’bipi yi vutia Yosua be ’diyi yi ji hema nderi yi be ewu yini ’ba Jururu Munguni drole ama a’bipi ma drilia ’diyi ma angu pazurisi. Eri ovu ’dinile ecazu kpere ewu Daudiniria,

46eri’i asi ndriza isupi Mungu ma miliari, eri a’i pari ovuzuri ndazu Mungu Yakoboniri dri.

47Te Sulemani si jo eri drini.

48Te Mungu Uru Turi adrini jo ’bani sile drisi ’diyi ma alia ku; ekile nabini ’yolerile,

49’Bu eri oguna mani, nyaku eri pari mani pa ’bazuri. Emi nga ma dri jo ngonile si ya, Opi ’yo ra, kani pari mani ava lizuri ngori ya?

50Dri mani ’bani afa ’diyi driani ku ya?

51Emi ’ba ombele mbazaru ’diyi, emi asi be azini bile be ekile ’ba lile ku ’diyinile, emi ga Orindi Alatararuri si ’dani. Emi ’ye ekile emi a’bipi ’diyini ’yelerile tro tro.

52Emi a’bipi inzani kuni nabi ngori ya? Yi’i, yi ofu ndra ’ba ’Ba Kililiru Onyi beri ma emuza ma e’yo ecepi ’diyi ra, te emi’i, emi oja emi curu’do ’ba Agu nde ma o’di nyapi ’diyiru ’bo, emi oja emi ’ba eri fupi ’diyiru indi;

53emi’i, emi a’i ndra azita efele malaika ma driari ra, te emi mbani tani ku.

54Te yini e’yo ’diri eriria, asi yini ovu aokosi tu, yi nga sikala nya eri vu.

55Te erini garia Orindi Alatararurisi tre, eri lu uru ’bua okposi, eri mire diza Munguni, azini Yesuni pa soria uru Mungu ma dri ndiria;

56eri ’yo ra, Emi lu, ma ne ’bu zi i mgbo, azini Mvi ’banini pa turia Mungu ma dri ndiria.

57Te yi otre o’duko urusi, yi ose yi bile ci, yi e’de drinia dria asi alusi.

58Yi ’be eri akuarisi amve, yi o’be eri onisi; ’ba asu supi eri ruaa ’diyi yi otru bongo yini, kuzu karilau omvele Saulori ma palaa.

59Yi o’be di Setefanoni ra erini Mungu ziria kini, Opi Yesu, mi a’i orindi mani,

60Eri osi kumuti va, oyu o’duko urusi kini, Opi, mi ’ba e’yo onzi ’diri yi dria ku. Eri ka e’yo ’diri ’yo ’bo, o’du ’be eri ra. Saulo a’i ndra ’ba ma fu eri ra.