Acts 21

Lugbara (E’yo Siza Alatararu Munguniri BIBLIA)

← Chapter 20 Jump to: Chapter 22 →

1E’yo nga eca ’dini, ama ka esele co yi be ’bo, ama zo ogurusi kililiru cazu Kosia, dru ama ca Rodoa, engazu Rodoa ama zo Pataraa.

2Te ama ka oguru mupi Foenikiari isu ra, ama fi alenia, ama zo ra.

3Ama ka Kuporoni ne ra, amani eri kuzu dri ejialeru ama aga ca Suriaa, efuzu Turoa; a’disiku ’dale yi le afa oguruni ejile ’diyi ofuzu.

4Ama ka ’ba Yesu vuti bipi ’diyi isu ra, ama ovu ’dale o’du azini, ’Ba ’diyi ’yo Paulo tia Orindisi eri ma ’ba pa Yerusalemua ku.

5O’du nde ka yi de ra, ama ko dri muzu aci amani muzuria; yi dria tualu okuyi be, anzi be, yi ji ama ku kpere aku tia amve ’dale yi tia ama osi kumuti Mungu zizu, ama nga di ama zi muzu.

6Ama fi oguru alia, te yi da dri mvi vile aku yinia.

7Acita amani engazu Turoari ka i de ra, ema eca Petolemaia; ’dale ama zi adripi ci ci, ovuzu yi be o’du alu.

8Drusi ’dini ama nga, ama mu ca Kaisariaa; ama fi Filipo ’ba e’yo bari olupiri vile joa, ovuzu eri be, eri ovu ’ba alu ’ba aziri ’diyi ma eseliari.

9Eri ovu ezoanzi jele nga ku ’diyi be su, yi olu e’yo nabile.

10Amania ovuria ’dale o’du kakau nabi runi Agabo engapi Yudiaari eca ra.

11Erini ecaria ama vu, tru enyiriko Paulo ma opileari, ombe i ma pa dri ini be ceni, ’yo ra, Orindi Alatararu ’yo ’dini, ’Ba Yahudini Yerusalemua ’diyi nga enyiriko ’di ma e’ini ombe ’dinile, yi nga eri fe Juru dri.

12Ama ka e’yo ’diyi eri ra, ama ’ba matu eri vu okposi, ’ba angu ndea ’da ’diyi be, eri ma mu Yerusalemua ku.

13Paulo omvi yi tia kini, Emi ’ye a’dini ya, wuzu asi mani nyozu candisi ’doni ya? Te ma ovu ngonde ovuzu kiri ombezaru a’dule ku, te drazu indi Yerusalemua Opi Yesu ma rusi.

14Ama ka isu ama econi eri ojazu e’yo amani ’yolerisi ku, ama adri ciri, kini, Opi ma ’ye ini leleri’i.

15O’du ’diyi ma vutia ama odro afazu amani, ama tu Yerusalemua.

16’Ba azini Yesu vuti bipi Kaisariaa ’diyi aci ama be tualu, yi ji ama Manasoni ’ba Kuporoari vile joa, eri ’ba Yesu vuti bipi driori, amani ngazu muzu lazu eri vu.

17Amani caria Yerusalemua adripi yi a’i ama ayikosi.

18Dru ’dini Paulo fu ama be muzu Yakobo vu; ’ba ’wara dria yi ’daa indi.

19Eri ka yi zi ’bo, eri olu yi dri e’yo alu alu Munguni ’yele juru eselia ini azi ngaria ’diyi.

20Te yi ka eri ra, yi inzi Mungu. Yi ’yo eri tia kini, Mi ne, adripi, ’ba Yahudini a’ipi ’bo ’diyi yi ovu alifu si ’dapi; te yi dria ma asi ve azita ma e’yosi;

21te yi eri e’yo mini, kini mi imba ’ba Yahudini dria ovupi Juru eselia ’diyi azita Musani kuzu, ’yozu kini ma li anzi yini ma agele ku, ma aci adriza ’ba Yahudini ma vutia ku indi.

22’Do ngoni ya? Adaru, yi nga e’yo mini ecazu ’bori eri ecekokoru.

23Ka’dini mi ’ye e’yo amani ’yole mi tiari. ’Ba su ’doa yi so oyo ’bo;

24mi ’du yi, mi ede mi rua alaru yi be tualu, mi fe anyapa yini afa edezu ’diyi kuhani dri mi’i, yi eco dribi yini fazu ani. ’Dini yi dria nga ni adau, e’yo mini yini erileri ovu toko, te mi ma ngulupi aci kilili azita ta mbazu.

25Te ’ba a’ipi ’ba Jururu eselia ’diyi ma e’yosi, ama pe ndra waraga ti e’yo liza amani ecezu, kini yi ma ga afa ’bani fele wura toko inzizuri, ari pie, anyapa ’bani nzile nzi ’diyi pie, ali ’baza pie.

26Awa’dini Paulo ’du ’ba nde ’diyi, dru ’dini eri ede i rua alaru yi pie, fi hekalua o’du yini yi rua edezu alaru ’diyi ma asiza ecezu, de nga yi feni anyapa edeta edezuri yi alu alu ma e’yosi ku,

27O’du aziri ’diyi ka ’ye yi de ra, ’ba Yahudini engapi Asiaa Pauloni ndrepi hekalu alia ’diyi, yi emu ’ba ongulumuru ma asia aoko enga, bi eri,

28yini oyuria uru kini, Emi ’ba Israelini, emi ko ama aza! ’Do agu nde e’yo onzi imbapi pari drisi dria, suru amani ma ruaa, azita ruaa, pari ’dori pieri’i; kiri ’di a’dule ku, te eri eji ’ba Girikini hekalu alia indi, eri eza pari alatararu ’dori ’bo.

29Yi ’yo ’dini yini Turofimo ’ba Efesoari ndrele tualu Paulo be aku amboru nderi alia ’borisi, yi ega yi ma asisilea Paulo ji eri hekalu alia ra.

30’Ba aku amboru ndea ’diyi enga dria, nzu tualu; yi bi Pauloni okposi, ese eri hekaluarisi amve, coti yi opi kalitile ci.

31Yini ’yeria eri furia, e’yo Yerusalemu driani i ezazu otrenasiri ku opi amboru asikari driliari vu.

32Coti eri ’du asikari, tualu asikari turu drilia ’diyi be, nzu ongusi yi vu; te yi ka opi nderi ne asikari be, yi ku Pauloni coko ja.

33Opi nderi eca Paulo vu eri bizu, eri azi yi ma ombe eri anziriku irisi. Eri zi eri tia eri a’di’i ya, ’ye a’dini ya?

34’Ba azini ’ba ongulumuru eselia ’diyi yi oyu o’duko alusi, azini ’diyi oyu o’duko azinisi; ’dini erini ecole e’yo kililiru ma pa nile otrena dri kurisi, eri azi eri ofizu kali asikarinia.

35Eri ka ca pari ’bani tuzu uru joaria, asikari yi ’du eri, ’ba ongulumuruni ’yele eri bile okposirisi;

36te ’ba ongulumuru bi vutini, otrezu uru kini, Ma ja eri dri ra!

37Yini ’yeria Pauloni ofiria kali asikarinia, eri zi opi asikari ma driliari ma tia kini, Ma eco te e’yo ’yozaru mi be ra ya? Eri omvi tinia, Mi ni Giriki ti ra ya?

38Mi ovuni Misiriou ndra omba ’bapi o’du agapi ’dasi, ’ba ’ba fupi alifu su ’diyi dri cepi roko driari’i ku ya?

39Paulo omvi e’yo kini, Ma ovu Yahudiou engapi Tariso angu Kilikiaariari, aku amani ovuni aku tokoni ku; ma matu ’ba mi vu, mi fe ma dri geri e’yo ’yozu ’ba ongulumuru be fo.

40Te eri ka a’i ra, Paulo erini pa soria pari ’bani tuzu ururia, eri oga ’ba ongulumuru drisi; yi ka ovu ndi ’bo, eri ’yo yi tia Ebrania tisi kini:

← Chapter 20 Jump to: Chapter 22 →