Acts 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1O’du Pentekositori ka eca ’bo, isu yi dria oku yi tualu pari alua.

2Mbeleru noza enga ’bua ekile Oliriko nopi okposirile, eri ga jo alia tre pari yini rizuria.

3Andre awaza e’da yi milia ekile aci ma dizale, ri yi dria alu alu.

4’Ba ’diyi dria ga Orindi Alarararusi tre, yi ’ba e’yo ’yo ti ndu ndusi, ekile Orindini fele yi dri ’yozurile.

5Isu ’ba Yahudini Mungu rupi engapi suru dria ’bu ma etia ’diyia ’diyi adri ovu Yerusalemua.

6Yini o’duko noza ’dirini eriria, ’ba ongulumuru oku yi tualu, yi osu tu a’disiku ’ba ’diyini e’yo ’yoria yi alu alu eri e’yoni yi ma ngulupi ma tisi.

7Yi dria ovu taisi osuta be to, ’yozu, Emi lu, ’ba e’yo ’yopi ’doyi yi ovuni dria ’ba Galilia ’diyi’i ku ya?

8Ama alu alu eri e’yo ’yoza yini ti ama ngulupinirisi ngoni ngoni ya?

9’Ba Paritia ’diyi pi ’ba Mediaa ’diyi pie, ’ba Elamua ’diyi pie, azini ’ba engapi Mesopotamiaa ’diyi, Yudiaa ’diyi, Kapadokiaa ’diyi, Pontoa azini Asiaa ’diyi,

10Ferugiaa azini Pamfuliaa ’diyi, Misiria azini ’ba engapi esele Libiani ovupi ogogo Kurenearia ’diyi, azini ’ba emupi engapi Rumia ’diyi, ’ba Yahudini azini ’ba yi ojapi ecapi Yahudiouru ’diyi,

11’ba Kiretea ’diyi pi ’ba Arabuaa ’diyi pie, ama eri yini azi amboru Munguni ’diyi ma e’yo oluria ti ama ngulupinisi.

12Te yi dria osu osu tu, yi aba aba, ozizu yi ma eselia ceni ceni kini, ’Dori a’di e’yo efini ya?

13Te ’ba azini nga ’yo oguta be kini, ’Ba ’diyi ati ati ewa afufusi ka!

14Te Peteroni pa soria ’ba mudri drini alu ’diyi be, eri ’yo yi tia o’duko urusi kini, Emi ’ba Yudiaa ’diyi, azini emi ’ba dria adripi ovupi Yerusalemua ’diyi, emi ma ni ’eyo ’diri, emi co bile e’yo mani ’yoleri vu.

15Te ’ba ’doyi yi atini ewasi emini egalerile ku, te eri kiri etu na a’joni;

16te e’yo ’dori eri e’yo ndra nabi Yoelini ’yoleri:

17Eri nga eca ’dinile o’du vilerisi, Mungu ’yo, ma nga Orindi mani osu ’ba dria ma dria; agupianzi emini azini ezoanzi emini yi nga e’yo ondri, karile emini yi nga afa ndrezandre, mbaza emini, oro bini nga yi obini;

18adaru, ma nga Orindi mani osu ati’ba mani agupiru azini ati’ba mani okuru ’diyi ma dria o’du nde ’diyisi; yi nga efu nabiru ani.

19Ma nga tali osutaru ofu uru ’bua azini eceta nyakua va indi, ari, azini aci, azini acika acini;

20etuni nga i oja iniru, mbani nga i oja arile, de nga o’du Opini ecani ku, o’du amboru kuzaruri.

21Eri nga eca ’dinile, ’ba dria ru Opini omvepi ’diyi nga ovu pazaru.

22Emi agupi Israelini, emi eri e’yo ’dori: Yesu ’ba Nazaretia, ndra Munguni ecele emi milia azi amborusi azini tali osutaru ’diyisi, azini eceta Munguni ’yele erisi emi eselia ’diyisiri, ekile emi ngulupini nilerile-

23’ba ’diri, emini ndra fele juru dri ekile Munguni lele pele ndra okokelerileri, emi di eri pati ruaa, fu eri ’ba onzi ma dria.

24Te Mungu enga eri uru, ayu eri candi drani ma alia, a’disiku drata econi, eri ombezaru ku.

25Te Daudi ’yo ndra eri ma e’yosi, Ma ne Opi etuzu ma milia, eri ovu ma dri ndiria, ma ngani aba ku beni;

26e’yo ’disi asi mani ovu ayikosi, andre mani ga ongosi tre; rua mani nga vini ovu e’yere e’yo tezu.,

27A’disiku mi ngani orindi mani ku Pari ’ba drazaniri ma alia ku, mi ngani ’Ba Alatararu miniri ku mazu ku.

28Mi ece ma dri geri idrini ’bo; mi nga fe asi mani ma ga ayikosi tre mani mile mini ndrelerisi.

29Adripi, ma eco a’bi amani Daudi ma e’yo ’yozaru emi tia uri kokoru; eri dra ra, yi sa eri ra, azini nyadri erini ovu ama eselia ecazu andru.

30Erini ovule nabinirisi, erini niria Mungu so oyo i dri kini a’bimva alua’bianzi ini ma eseliari nga ri oguna ini dria,

31eri ondri e’yo, ’yo e’yo Kristoni engazu ’ba draza eseliari, ’yozu Mungu kuni eri Pari ’ba drazaniri ma alia ku, rua erini mani ku indi.

32Mungu enga Yesu ’diri ra; ama dria ovu ’ba e’yo ’diri ma eti nzepi ’diyiru.

33’Dini Munguni eri ’baria uru i ma dri ndiria, azini erini aziza Orindi Alatararuni isuzu Ata dri ’boria, eri osu te e’yo emini nele, emini erile curu’do ’dori.

34Te ’Daudi tuni uru ’bua ku; te eri ma ngulupi ’yo, Opi ’yo Opi mani ma tia, Mi ri ma dri ndiria,

35de nga ma ’bani ari’ba mini ovuzu afa mi pa ’bazu driniariru ku.

36Onyiru ’ba Israelini ’diyi dria ma ni ndi ndi kini Mungu ’ba Yesu emini dile pati ruaa ’diri Opiru azini Kristo’i.

37Yini e’yo ’diri eriria eri li yi ma asi, yi yo Petero pi ma tia ’ba ti opele azini diyi be indi, Ama adripi la ama nga ’ye sini ya?

38Petero nga e’yo ori ri yi tia kini, Emi oja emi asi, emi bi baputizi emi alu alu ru Yesu Kristonisi, e’yo onzi emini wuzu; emi nga di feta Orindi Alatararuni a’i ani.

39Te aziza nde ovu emi dri, anzi emini pie, ’ba dria ovupi ziri ’dale Opi Munguni ngale omvele ’diyi dri indi.

40Eri nze yi dri e’yo eti kakau, matu ’bazu yi vu ’yozu, Emi ma pa emi ngulupi engazu suruti onzi ’dori ma aliarisi.

41’Dini fe baputizi ’ba e’yo erini a’ipi ’diyi dri, te o’du ’darisi ’ba alifu na yi o’ba yi ’ba-a’ipi ’diyi ma ruaa.

42Yi fe yi asi dria imbata ’ba ti opele ’diyini erizu ’dani, ti ecizu tualu, enya otiria nyaria Mungu ziza be indi.

43Uri bi ’ba dria; ’ba ti opele ’diyi yi ’ye tali kakau eceta amboru be.

44’Ba a’ipi ’diyi dria yi ovu pari alua, yi eci afa yini dria tualu;

45yi ofe anyapa azini afa yini be je, yi awa yi ’ba dria dri ekile ’ba alu aluni ovule afa kokorurile.

46Etuzu yi ovu asi tezasi asi alusi, hekalua azini enya nyaria aku yinia, yi nya enya yini ayikosi asi lokiri kokorurisi,

47Mungu inzizu azini ovuzu ’ba dria vu ayikosi. Etu vusi alu alu dria Opi o’ba ’ba erini opale ’diyi yi ma ruaa.

← Chapter 1 Jump to: Chapter 3 →