Exodus 14

Lugbara (E’yo Siza Alatararu Munguniri BIBLIA)

← Chapter 13 Jump to: Chapter 15 →

1Te Yehova ’yo Musa tia kini,

2Mi ’yo anzi Israelini tia yi ma oja yi vile hema asozu Pihahiroti ovupi Migedoli pi ma eselia miri beri ma drilia, Baali-zefoni ma drilia; emi nga hema aso eri drilia miri kalaa ’aa’dosi.

3Te Farauni nga ’yo anzi Israelini ma ’eyosi, Angu ekila yi ci; angu rokoru ase yi ci.

4Te ma nga Farau ma asi ’ba mbazaru, eri nga yi vuti dro, te ma nga mani inzita isu Farau vu ani, ’ba erini ongulumuru ’diyi vu dria indi; ’ba Misiria ’diyi nga ni ma Yehova’i. Te yi ’ye ’dini.

5Te yi ece opi Misiriari dri e’yo ’bani apazu ’bori, te Farau pi ma asi oja yi ndu ati’ba erini ’diyi be ’ba nde ’diyi vu, yi ’yo ra, Ama ’ye ’doni a’dini ya, ’ba Israelini kuzu muzu azi nga kokoru ama dri?

6Eri ede gari ini ombaniri, eri ’du ’ba ini muzu i be tualu,

7eri ’du gari ombani opezaru turu azia, azini gari ombani dria Misiria ’diyi, ’ba yi drilia ’diyi be dria.

8Te Yehova ’ba Farau opi Misiriari ma asi mbazaru, eri bi anzi Israelini ma vuti, anzi Israelini yini fule Misiriasi arumadrisirisi.

9’Ba Misirini ’diyi dro yi ma vuti, akanya dria pie, gari ombani Farau vile dria ’diyi pie, ’ba nzupi akanya dria ’diyi pie, ’ba ongulumuru ’diyi be, yi isu ’ba Israelini yi aso hema yini ’bo, yi tia Pihahiroti ma kalaa, Baali-zefoni ma drilia.

10Farau ka eca ogogo, anzi Israelini enga yi mile uru, te mi ne, ’ba Misirini ’diyi ad yi ma vutia; yi ovu di urisi tu ani. Anzi Israelini nga di owu okposi Yehova vu.

11Azini yi ’yo Musa tia kini, Mi eji ama odrazu roko dria, ’bile ’ba sazu ’diyini ovule Misiri ma alia yorisi ya? Mi ’ye ama ’dini a’di e’yosi ama ofuzu angu Misiriniarisi ya?

12Ama ’yoni ndra e’yo ’diri mi be Misiria ’da ku ya, ’yozu, Mi ku ama, ama ma nga azi ’ba Misirini dri ani? A’disiku azi ngazu ’ba Misiria ’diyi driri eri onyiru aga amani odrazu roko driari ra.

13Te Musa ’yo ’ba: ongulumuru tia, Emi ru ku, emi so pa ci, emi ne pata Yehovani erini e’dio ngale ’yele emi dri andruri; a’disiku ’ba Misirini emini ne andru ’diyi, emi ngani asi yi ne dika ewule ewule ku.

14Yehovani nga a’di’di emi drini,emi nga ovuciri.

15Te Yehova ’yo Musa tia, Mi owu ma vua’die’yosi ya? Mi ’yo anzi Israelini tia yi ma mu drile.

16Mi su kali mini uru, mi eju mi dri miri dria, mi co eseleni; anzi Israelini nga mu miri ma eselesi nyaku angaza ma driasi ani.

17Te ma’i, mi ne, ma nga ’ba Misirini ’diyi ma asi ’ba mbazaru, yi nga fi yi vutisi; te ma nga mani inzita isu Farau vu, ’ba ongulumuru erini dria pie, gari ombani erini pie, ’ba erini nzupi akanya dria ’diyi be.

18’Ba Misirini ’diyi nga ni ma Yehova’i ani, ma ka nga mani inzita isu Farau vu, gari ombani erini pie, ’ba erini nzupi akanya dria ’diyi be ’boria.

19Te malaika Munguni mupi ’ba ongulumuru Israelini ma driliari, eri oja i muzu yi vutiasi; azini iriti pa sopi piriru yi driliari oja i engazu yi driliarisi muzu yi vutialeru indi;

20eri mu ri angu ’ba Misirini ’diyini ovuzuri ma eselia ’ba Israelini be. Iriti nde pi angu biza nde be yi indi, te iriti fe diza inisi; aluni ecani ogogo aziniri vu ku ini rra ani.

21Te Musa eju i dri miri dria; te Yehova fe miri awa i ini nderisi dria oli okporu engapi etuni efuriarisi, eri oja miri nyaku angazariru, yiniri co esele ra,

22Anzi Israelini nga fi miri eseliasi nyaku angazaru driasi; yi nde ovu ekile abile yi dri ndia azini yi dri ejia.

23Te ’ba Misirini ’diyi bi yi vuti, yi fi miri eseliasi yi vutia, akanya Farauni dria, gari ombani erini pie, ’ba nzupi akanya dria ’diyi be dria.

24Eri eca ’dini angu trasi, Yehova lu ’ba ongulumuru Misirini ’diyi vu engazu aci piriru ma alia iriti beriasi, eri ecandi ’ba ongulumuru Misirini ’diyi tu.

25Eri onze gari yini ma pa ra, ’dini sezani ovu di ani nzizaru; e’yo ’disi ’ba Misirini ’yo ra, Ama ma nzu Israeli ma miliasi; Yehovani a’di ’dile yi beni ’ba Misirini vurisi.

26Te Yehova ’yo Musa tia, Mi eju mi dri miri dria, ’dini yi nderi ma omvi i dika ’ba Misirini ma dria beni, gari ombani yini pie, ’ba nzupi akanya dria ’diyi be.

27Musa eju i dri miri dria, te anguni atiria miri nderi mvi okpo ini okuri vusi; ’ba Misirini yi o’bi apazu ra, te Yehova oze ’ba Misirini ’diyi ’barra miri alia.

28Yi nderi nga di emvi, a’bu gari yini pie, ’ba nzupi akanya dria ’diyi pie, adaru ’ba ongulumuru Farauni fipi yi vutisi miri alia ’diyi be dria; yi ma alua aceni ku.

29Te anzi Israelini aci yini nyaku angazaru ma dria miri eselesi; yi nde ovu abile yi ma dri ndia azini dri ejia indi.

30’Dinile etu nderisi Yehova pa Israeli ’ba Misirini dria; azini ’ba Israelini ne ’ba Misirini ’diyi ma avu cinya dria yi tia.

31’Ba Israelini ne azi amboru Yehovani ’yele ’ba Misirini ’diyi ma ruaari, ’ba ongulumuru yi ru ani Yehovani tu; yi a’i Yehova pi ati’bo erini Musa be iri tro.

← Chapter 13 Jump to: Chapter 15 →