Exodus 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Te Musa eri ovu kabilo i ma anyi Yetero, kuhani Midianiarini ma agei tezu; eri oce yi roko ma ngukuasi, eri eca oni Munguni Horebua.

2Malaika Yehovani efu eri ma milia aci dipi pati ali ma ruaari ma alia. Te Musa ndre ra, te mi ne, aci di pati nde ma ruaa, te veni eri aluni ku.

3Musa ngaa ’yo ra, Ma nga ma oja eceta amboru ’diri vu, e’yo pati alini vezu kuri nezu.

4Te Yehova ka ndre eri oja i kalaa nezu, Mungu omve eri o’dukosi engazu pati nderi alia kini, Musa, Musa! Eri kini, Ma ’do’i.

5Eri ’yo ra, Mi esi ’doa ogogo ku, mi tru enyiriko mi paari ra, a’disiku pari mini pa sozu ’diri eri alatararu.

6Eri ’yo indi, Ma Mungu mi atini, Mungu Iburahimuni, Mungu Isakani, Mungu Yakoboniri’i. Te Musa zi i mile ra, erini ovule urisi Mungu nezurisi.

7Yehova ’yo ra, Ma ne adaru inzata ’ba mani Misiri ma alia’diyini, ma eri awu yini ’ba yi drilia ’yi ecandipi azisi ’diyi ma e’yosi; ma ni candi yini ra,

8ma esi va ’bo yi opazu ’ba Misiria ’diyi ma dria, yi ofuzu angu nderiasi yi ejizu ofizu angu onyiru amboru ma alia, angu nde gapi tre lesu pisi anyu beri ma alia, angu nde pari ’ba Kanania ’diyi pini, Hitini pie, Amorini pie, Perizini pie, Hivini pie, Yebusini pieri.

9Te curu’do mi ne, anzi Israelini ma awu eca troa ma vu uru, ma ne indi inzata ’ba Misiria ’diyini yi inzazui i ra.

10Mi emu di, ma nga mi ti pe Farau vu, ’dini mi ma ofu ’ba mani anzi Israelini Misiriarisi ani.

11Te Musa ’yo Mungu tia, Ma a’di’i ya muzu Farau vu, mani ngazu anzi Israelini ofuzu Misiriarisi?

12Eri ’yo ra, Adada ma nga ovu mi be tualu; e’yo ’diri nga ovu mi dri ecetaru kini ma pe mi ti ma’i; mi ka ’ba mani ofu Misiriasi ’bo, emi nga azi nga ma dri oni ’dori dria.

13Musa ’yo Mungu tia kini, Mi ne, ma ka nga eca anzi Israelini vu ’bo, ma ka nga ’yo yi be kini, Mungu emi a’bipiniri pe ma ti emi vu, yi ka nga ’yo ma tia kini, Ru erini a’di’i ya? ma nga e’yo omvi yi tia ngoni ya?

14Te Mungu ’yo Musa tia, MA INDI MANI OVULE INDIRILE. Azini eri ’yo ra, Mi nga ’yo ’dinile anzi Israelini tia kini, MA INDI pe ma ti emi vuni,

15Azini Mungu ’yo vini Musa tia, Mi nga ’yo ’dini anzi Israelini tia, Yehova. Mungu emi a’bipiniri, Mungu Iburahimuni, Mungu Isakani, Mungu Yakoboni, eri epe ma ti emi vuni: ru mani ’dani ’daniri eri ’di’i, azini e’yo egaza ’bani ma e’yo egazu cazu a’bianzi dria vuri eri ’di’i.

16Mi mu, mi oku ’ba ’wara Israelini tualu, mi ’yo yi tia kini, Yehova Mungu emi a’bipini, Mungu Iburahimuni, Isakani, Yakoboniri, efu ma milia ’bo kini, Ma andri emi ’bo ada, ma ne e’yo yini ’yele emi vu Misiriari ra.

17Te ma ’yo ’bo, Ma nga emi ofu engazu candi emini Misiriari ma alia,emi ejizu ofizu angu ’ba Kanania ’diyi pini, Hitini pie, Amorini pie, Perizini pie, Hivini pie, Yebusini pie, angu nde gapi tre lesu pisi anyu beri ma alia.

18Yi nga e’yo mini eri ra; mi nga mu mi’i, ’ba ’wara Israelini ’diyi be opi Misiriari vu, emi nga ’yo eri tia, Yehova Mungu ’ba Ebranianiri fu dri ama be ra; te curu’do ama zi mi tia, kiri kiri mi ku ama mu o’du pale na roko dria, ama ma ede edeta Yehova Mungu amani dri ani.

19Te ma ni ra, opi Misiriari ngani emi ku muzu ku, yo, ka tro dri okporusi ti.

20Ma nga dri mani eju Misirini cozu e’yo ambo osutaru dria mani ngale ’yele angu yini ma eselia ’diyisi; ’di ma vutia eri nga emi ku muzu ndo.

21Te ma nga fe ’ba Misiria ’diyi ma ovu asi ndrizasi suru ’diri vu; eri nga eca ’dini, emini muria emi ngani fu pirini ku,

22te oku dria yi nga zi ’ba aku yini ma ejeli ’diyi pi tia, ’ba ovupi yi ma joa ’diyi be, yi ma fe yi dri onyiafa dahaburu, onyiafa meleru pie, bongo suza be, emi nga afa ’diyi osu agianzi emini ma ruaa ezoanzi emini be; emi nga ’ba Misiria ’diyi ma afa opa eminiru ’dinile.

← Chapter 2 Jump to: Chapter 4 →