Exodus 32

Lugbara (E’yo Siza Alatararu Munguniri BIBLIA)

← Chapter 31 Jump to: Chapter 33 →

1’Ba ongulumuru ka ndre Musani te ’dale, sini va oni driarisi ku, ’ba ongulumuru oku yi Aroni vu, ’yo tinia, Mi enga, mi ede ama dri adrou ngapi ama dri cepi ’diyi; te agu Musaru nde ndra ama ofupi angu Misiriniasiri, ama nini ku kani a’di ’ye erini yani.

2Te Aroni ’yo yi tia, Emi tru nzia meleru ovupi oku emini ma bia ’diyi, azini agupianzi emini ma bia I’diyi, azini ezoanzi emini ma bia ’diyi, emi eji yi ma vu.

3Te ’ba dria otru nzia meleru yi bia ’diyi, eji yi Aroni vu.

4Eri a’i yi yi ma driasi, ede wurani aya afa opazurisi, ede kojaa ma wura mele akapi acisirisi ani; te yi ’yo kini, Israeli la! Adrou emini, emi ofupi angu Misiriniasi ’diyi yi ’di!

5Aroni ka e’yo ’diri ndre ra, ede pari edeta edezuri kojaa nderi drilia; azini Aroni azi e’yoni kini, Dru omu Yehovani.

6Dru ’dini yi enga o’bitisi kula kula, yi ofe edeta vezaru ’diyi, yi eji edeta asi anzuruni ’diyi; ’ba ongulumuru yi ori va nyaka nyazu azini afa mvuzu, azini yi enga avita avizu.

7Te Yehova ’yo Musa tia, Mi nga, mi si va; a’disiku ’ba mini ’diyi, mini ofule angu Misiriniasi ’diyi, eza yi ’bo;

8yi oja yi kalaa mbele geri mani azile yi dririasi ’bo; yi ede yi dri kojaa ma wura mele akapi acisirisi, yi inzi eri ’bo, yi ede edeta eri dri ’bo, yi ’yo ra, Israeli la! Adrou emini, emi ofupi angu Misiriniasi ’diyi yi ’di!

9Yehova ’yo vini Musa tia kini, Ma ne suru ’diri ’bo, te mi ne, eri ovu ombe mbaza be;

10e’yo ’disi curu’do mi ku ma, adra mani ma di aciru yi ruaa, ma ma ja yi dri ani; te ma nga mi ofu suru amboru.

11Te Musa ’ba matu Yehova Mungu erini vu, eri ’yo ra, Yehova la, adra mini di aciru suru mini, mini ofule angu Misiriniasi okpo amborusi azini dri okporusiri ma ruaa a’di e’yosi ya?

12’Ba Misiria ’diyi nga ’yo kini, Eri ofu yi angu Misiriniasi kiri yi ’yezu onzi ka, yi ofuzu oni eselia, yi dri jazu nyaku ma driasi, ’dini a’disi ya? Mi ku adra okporu mini fo, mi oja asi mini e’yo onzi mini lele ’yele suru mini vurisi.

13Mi ega e’yo Iburahimu pini, Isaka pie, Israeli pieri, ati’ba mini mini oyo sozu yi vu mi ngulupi ma rusi ’diyi, ’yozu yi tia, Ma nga fe ori’ba emini ma ezu ekile ’bi’bio ’bua ’diyile, te ma nga angu dria mani e’yoni ’yole ’diri fe dria a’bianzi emini dri, yi nga eri nya awitaru ewule ewule.

14Te Yehova omvi i asi, ku e’yo onzi erini ’yole i nga ’ye ’ba erini vuri ra.

15Musa oja i, si oni driarisi va, eri ma dria oni e’yo eti nzezani ’diyi iri, oni nde ’diyi ma ruaa si e’yo irile irile; e’yo ovu sizaru yi ma agatialeru ci, azini ngukualeru ci iri tro.

16Oni nde ’diyi ovu azi Munguni ’yeleri, sizaniri Mungu sini, opa eri oni nde ’diyi ma ruaani.

17Te Yo sua ka cere ’ba ongulumuru ’diyini o’beleri eri ra, eri ’yo Musa tia, ’Di alicereni pari ’bani hema yini asozuria.

18Te eri ’yo ra, Ovuni ’ba oyupi yini agale omba aliarisi ’diyi ma o’duko ku, ovuni vini ’ba owupi juruni yi agale rarisi ’diyi ma o’duko ku, te ma eri mani ’ba ongo ngopi ’diyi ma cere’i.

19Eri eca ’dinile, eri ka eca ogogo pari ’bani hema yini asozuria, eri ne mbele wura kojaani azini ’ba ongo tupi ’diyi be, te adra ga Musa ma asi acile, eri ’be oni ovupi eri ma dria ’diyi va, onyo yi oni etia.

20Eri ’du kojaa ma wura yini edeleri, ve eri acisi, ’i eri furaru, ere eri yi a’di ma milia, eri emvu Israeli anziyi ani.

21Te Musa ’yo Aroni tia, ’Ba ’diyi ’ye mini a’duni ya, mini ezata ambo ’di ejizu yi ma dria ’dinini ya?

22Te Aroni omvi e’yo, Opi mani ma adra ma di adru ku fo; mi ni ra ’ba nde ’diyi ra, yi ’ba yi asi e’yo onzi ’yezu.

23Te yi ’yo ma tia, Mi ede ama dri adrou ngapi ama dri cepi ’diyi; a’disiku agu Musaru nde ndra ama ofupi angu Misiriniasiri, ama nini ku a’di ’ye erini yani.

24Te ma ’yo yi tia, ’Ba alu alu ka ovu mele be, ma tru eri; ’dini yi fe eri ma dri, ’ma nga eri ’be ada, kojaa ’dori nga efu ani.

25Te Musa ka ne ’ba ongulumuru yi ’ba e’yo ’ye saaru (a’disiku Aronini yi kule ’yele saarurisi, ’ba juruni yi oguzu),

26etu nderisi Musa nga pa so pari yini hema asozuri ma kalitilia, kini, ’Ba alu alu ovupi Yehova vuleru ’diyi ma emu ma vu. Te Levi anziyi oku yi dria eri vu.

27Te eri ’yo yi tia, Yehova Mungu Israelini ’yo ’dini, Emi dria alu alu ma su sei emini emi opilia, emi ad ’dale ’dole ’dile pari ’bani hema asozuri ma eselia, engazu kalitile aluri vu cazu aziniria, te emi dria alu alu ma fu emi adripi, emi dria alu alu ma fu emi agyi, emi dria alu alu ma fu ’ba ovupi aku emini ejeliari.

28Levi anziyi ’ye erile Musani ’yolerile; te o’du ’dasi ’ba odra ’ba ’diyi ma eselia ekile alifu nale.

29Musa ’yo, Andru emi fe emi ngulupi Yehova dri ovuzu alaru, emi dria alu aluni ovuzu jururu emi eselia emi anzipi be, azini emi adripi be; eri ma fe ani asi ndriza emi dri andru beni.

30Eri eca ’dini drusi, Musa ’yo ’ba ongulumuru tia, Emi eza e’yo onzi amboru ’bo Curu’do ma tu Yehova vu; kani ma nga eco e’yo onzi emini edezaru ra yani.

31Te Musa mvi Yehova vu kini, Eyawa! ’Ba ’diyi yi eza e’yo onzi amboru ’bo; yi ede yi dri adrou meleru ’bo.

32Te curu’do, mi ka le e’yo onzi yini wu ra-ka ’dini yo, ma zi mi ria kirikiri, mi ini ma buku mini sileri ma aliasi ra.

33Te Yehova ’yo Musa tia, ’Ba e’yo onzi ’yepi ma vuri, ma nga eri ini buku mani ma aliarisi’i.

34Te curu’do mi mu, mi ce ’ba ’diyi ma dri pari mani ’yole ndra mi tiaria; mi ne, malaika mani nga mu mi drilia. Te o’du mani yi andrizurisi, ma nga e’yo onzi yini ma aroti ofe yi ruaa.

35Te Yehova co ’ba ongulumuru ’diyi, yini kojaa Aronini edeleri edelerisi.

← Chapter 31 Jump to: Chapter 33 →