Exodus 35

Lugbara (E’yo Siza Alatararu Munguniri BIBLIA)

← Chapter 34 Jump to: Chapter 36 →

1Te Musa oku ’ba ongulumuru anzi Israelini ’diyi tualu, eri ’yo yi tia, E’yo Yehovani azile emi ma ’ye yi ’diyi, yi ’di.

2Emi ma nga azi o’du azia, te o’du aziriri ma ovu emi dri o’du alatararu, sabato ava liza inzitani Yehova driri; ’ba ngoni ngori azi ngapi o’du nderisiri, yi nga eri fu ra;

3emi ma edu aci pari emini ovuzuri ma alia dria o’du sabatonisi ku.

4Te Musa ’yo ’ba ongulumuru anzi Israelini ’diyi ma tia kini, E’yo Yehovani azileri eri ’di.

5Emi a’i, emi eselia afa feza Yehova driri; ’ba alu alu lepi afa fepi ceni yi asisi ’diyi ma eji afa feza Yehovani: meleni, kani dahabuni, kani molani;

6kani bongo blururi, kani okalakokalaruri, kani ekaruri, kani bongo mile be nyiriaruri; kani ndripodo,

7kani kabiloago ma enyi ojale ekaruri, kani yianya enyiriko; kani pati asarauni,

8kani tala odu, kani afa aji be arikariru osazu odu osule osuri ma alia, azini obiese vele ve arikariruri ma aliari,

9kani oni onikiru ’diyi azini oni osule osu ’diyi o’bazu koti alinari pi ma ruaa bongo agatiari be.

10Eco ’ba dria ondua be asia emi eselia ’diyi ma emu, afa dria Yehovani azile ’diyi ’yezu:

11bere, hema erini, afa eri ma dri a’bupiri pie, afa eciza ’diyi pie, bau erini ’diyi pie, pati rwe rwe ’diyi pie, pati agoferu ’diyi pie, ’bile erini ’diyi, pie;

12sanduku pie, paci eri ’duzu, ’diyi pie, oguna yikiniri pie, bongo jo ale awazuri pie;

13mesa pie, pati eri ’duzu ’diyi pie, afazu eri vile ’diyi pie dria, mikate ecetaruri pie;

14talapati acini dizuri pie, afa erini ’diyi pie dria, tala ma ada ’diyi pie, tala odu pie;

15pari obiese vezuri pie, pati eri ’duzu ’diyi pie, odu osule osuri pie, obiese vele ve arikariruri pie, bongo hematileni ’ile bere tiliari pie;

16pari edeta veza edezuri pie, keikei erini molaruri pie, pati eri ’duzu ’diyi pie, afazu ’erini ’diyi pie dria, awala rua ojizuri pie, pani pie;

17bongo ’ile irii kalaasi ’diyi pie, pati erini agoferu ’diyi pie, ’bile yini pie, bongo ’He irii ma kalitilia ’diyi pie;

18alo hema vile ’diyi pie, alo irii vile ’diyi pie, baka yini be;

19bongo cile onyiru tu ’bani azi ngazu pari alatararuria ’diyi pie, bongo alatararu kuhani Aroni vile ’diyi pie, bongo anzipi vile ’diyi pie, yini azi kuhanini ngazu ’diyi.

20’Ba ongulumuru anzi Israelini ’diyi dria yi nga Musa vurisi ra,

21’Ba dria alu alu ava yi ma asiarini yi engale omileni ’diyi, azini ’ba dria alu alu yi ma ol’indini fele ma ’yeni ’diyi, yi eji afa feza Yehova dri, azi hema ti ecizaniri ’yezu, azi erini ’yezu dria bongo alatararu ’diyi be.

22’Ba yi eca agupi pie oku pie; ’ba dria lepi afa fepi ceni yi asisi ’diyi, yi eji onyiafa, nzia bia ’diyi pie, driadriamva pie, ocoko pie, onyiafa meleru ndu ndu dria ’diyi pie, ’ba dria alu alu yi fe mele awa’diforu Yehova dri.

23Isu ’ba azini alu alu ka ovu bongo blururi be, kani okalakokalaruri, kani ekaruri, kani bongo mile be nyiriaruri, kani ndripodo, kani kabiloago ma enyi ojale ekaruri, kani yianya ma enyiriko, yi eji yi ra.

24’Ba dria alu alu ecopi afa dahaburu kani molaru fepiri, yi fe eri Yehova dri awa’diforu; azini ’ba dria alu alu ovupi pati asarauni ecopi azi hemani ngazuri be ’diyi, yi eji eri ra.

25Oku dria asi ondua be ’diyi yi pi bongoba drisi, yi eji afa yini pileri, kani blururi, kani okalakokalaruri, kani ekaruri, kani mile be nymaruri;

26oku dria ava yi ma asiarini yi engale omile onduasini ’diyi pi ndripodo.

27’Ba ’wara yi eji oni onikiru, oni osule osu ’diyi o’bazu koti alinari pi ma ruaa bongo agatiari be,

28yi eji afa aji be arikariruri pi odu be, talani dizu azini odu osule osuri osazu, azini obiese arikariru vele veri edezu.

29Anzi Israelini, agupi be oku be dria alu alu yi ma asini yi engale ceni afa ejizu azi dria Yehovani ndra azile Musa tia ma ’yeri ’yezu ’diyi, eji afa feza awa’diforu Yehova dri ekile yi ma asini lelerile.

30Te Musa ’yo ’ba Israelini ’diyi ma tia, Emi ne, Yehova omve Bezalelini rusi ’bo, Uri Huri mvi ma mva, suru Yudaniari;

31azini eri fe eri ga tre Orindi Mungunisi, onduasi, e’yo vazasi, e’yo nizasi, azini ondua azi ndu ndu dria ’yezurisi,

32egazu azi onduouni ’yezu, azi ngazu melesi, azini dahabusi, azini molasi,

33azini oni osuza ’diyi olizu, azini endrilendri opazu pati ruaa, azi ndu ndu dria onduasi ngazu.

34Azini eri ’ba e’yoni Bezaleli ma asia lezu ’ba azini imbazu indi, eri’i tualu Oholiaba Ahisamaki mvi suru Daniniari be,

35Eri ga yi asia tre onduasi, azi ndu ndu dria ngazu, azi wura lizu aya ma ruaari pie, azi onduouni ’yeleri pie, azi onduouni wura cizu bongo bluru, kani okalakokalaru, kani ekaru, kani bongo mile be nyiriaruri ma ruaari, azi bongo cazuri pie, azi ndu ndu onduou driani ’yele ’diyi ’yezu.

← Chapter 34 Jump to: Chapter 36 →