Exodus 15

Lugbara (E’yo Siza Alatararu Munguniri BIBLIA)

← Chapter 14 Jump to: Chapter 16 →

1Etu nderisi Musa pi anzi Israelini be yi ngo ongo ’diri Yehova dri, ’yozu kini, Ma nga ongo ngo Yehova dri, erini juru agale diza be turisi; akanya pi ’ba nzupi eri driari be, eri o’be yi miri ma alia ’bo.

2Yehova eri ovu okpo mani azini ongo mani, eri oja i pata maniru indi; ’diri Mungu mani, ma nga eri inzi ra, eri ovu Mungu ma atini, ma nga eri ’ba uru.

3Yehova eri ’ba ombaniri; ru erini Yehova’i.

4Gari ombani Farau vile ’diyi azini ’ba ongulumuru erini ’diyi be, eri o’be yi miri alia ’bo; azini ’ba asikari drilia erini opele ’diyi yi o’de Miri Ekaru etia ’bo;

5Yi aliru a’bu yi ra; yi si va yi aliru etia ekile onile ’bo.

6Yehova la, mi dri ndiri eri dizaru okpo minisi, Yehova la, mi dri ndiri eri ari’ba amani onyo nyingiriki.

7Ambo mini agapi driarisi, mi ’ba engapi mi ruaa ’diyi oze ’barra va; mi adra mini ma ti pe, eri yi ve ekile ase a’wile.

8Ava efupi mi ma omvuliarisi Yi mirini oku yi tualu ngurru, yi mirini so pa uru otukole, yi aliruri miri ma asia ku ku.

9Ari’bo ’yo ra, Ma nga yi vuti dro, ma nga yi bi, ma nga afa yini mani opale ’diyi awa ra, e’yo ma asini lele ’yeleri nga i ’ye yi ruaa. Ma nga sei mani nze, ma drini nga yi dri ja ra.

10Mi fe oli mini li, miri a’bu yi ani; yi o’de va yi amboru aliru etia ekile ’ye efile.

11Yehova la, adrou ’diyi eselia a’di ovu milenini ya? A’di ovu mileni dizaru alatara mini ma aliasi, uri fezu inzita alia, e’yo osutaru ’yezuni ya?

12Mi eju mi dri ndiri, nyaku oki yi ra.

13Asi ndriza minirisi mi ce ’ba mini onzele ’diyi ma dri, mi ce yi dri okpo minisi cazu kpere pari alatararu mini ovuzuria.

14Suru yi eri ’bo, yi ya ya urisi; rua suza bi ’ba Filistia ’diyi ra.

15Etu nderisi opi Edomua ’diyi ma mile oka tu; ’ba okporu Moabua ’diyi ma rua ’ba ya ya; ’ba Kanania ’diyi dria aka di ’bo.

16Uri okporu ’de yi dria asi otiza be; wu okporu minisi yi oji dri ekile onile, ecazu ’ba minini agazu zozu ’boria, Yehova la, ecazu ’ba mini jele ’bo ’diyini agazu zozu ’boria.

17Mi nga yi ofi, sa oni mini awurusoru ma dria, Yehova la, pari nde mini edele mi dri ovuzu aleniari, Yehova la, pari alatararu nde mi drini ’baleri.

18Yehovani nga opi nya ’dani ’danini.

19Te akanya Farauni gari ombani erini be fi miri eseliasi ’ba nzupi akanya dria ’diyi be, te Yehova omvi yi mirini yi ma dria; te anzi Israelini ri aci nyaku angazaru ma dria miri eseliasi.

20Te Miriamu nabi okuru, Aroni amvi, eri ’du arimva eri dria; oku dria efu eri vutia arianzi be, ongo inzitani tuzu indi.

21Te Miriamu omvi e’yo yi tia: Emi ngo ongo Yehova dri, erini juru agale diza be turisi; akanya pi ’ba nzupi driniari be, eri o’be yi miri alia ’bo.

22Te Musa ce Israeli dri drile engazu Miri Ekarua, yi fi roko Suri ma alia; yi ad o’du pale na, te isuni yi ku.

23Yi ka ca Maraa, isu yi econi yi Marani mvuzaru ku, yini ovule drazarurisi; e’yo ’disi ’da runi Mara’i.

24Te ’ba ongulumuru ono Musa ruaa, kini, Ama nga di a’dimvuya?

25Te eri wu Yehova vu; Yehova nga di pati ece eri dri, eri ’be eri yi alia, yi nderi nga i oja aluzaru ani. ’Dale pari nderia eri azi azita yi dri e’yo aziza be, o’bi yi vini ’dale indi,

26azini eri ’yo, Mi ka o’duko Yehova Mungu minirini eri asi tezasi, mi ka e’yo ovupi onyiru eri miliari ’ye, bile cozu e’yo erini azileri vu, azita erini dria ma ta mbazu, ma ngani azo mani ’bale ’ba Misiria ’diyi ma ruaa ’diyi ’ba mi ruaa aluni ku; mani ovule Yehova mi rua atipiri’irisi.

27Te yi ca Elimua, pari yi a’di adiza mudri drini irini azini itu kali azirini ovuzuria; yi aso hema yini ’dale.

← Chapter 14 Jump to: Chapter 16 →