Exodus 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te agupi alu suruti Leviniri eri je zamva Levinirini okuru.

2Oku nderi isu mva, osi agupimvani; eri ka ne eri ovu mva onyi beni, eri zi eri mba na.

3Eri ka eco eri zi dika ku, eri ’du afazu acalakaru edele omisiri, eri e’bura aleni odri pisi ese be; eri ’ba mva nderi alenia, eri ’ba eri omi talaa yi tia.

4Amvini nga pa so re, nezu a’dini nga mva nde ’yeni ya.

5Te Farau zi nga esi yia rua ojizu, azini ezoanzi erini ati’baru ’diyi ri aci yi tisi; eri nga afazu nderi ne omi talaa, eri nga ati’bo erini zanaru alu ma ti e eri e’duzu.

6Te eri ka afazu tile zi ’bo, eri ne mva nderi ra; te mi ne, mvani wu wu. Eri ’ba yiki mva nderi vu, eri ’yo, Mva ’ba Ebraniani ma aziri awa’do!

7Amvipini nga di ’yo Farau zi tia,Mi le ma mu mini oku alu Ebraniani omve mva nderi ma indriaru eri endruzu ra ya?

8Te Farau zi ’yo tinia, Mi mu. Odruna nderi mu ra, omve mva ma andrini’i.

9Farau zi ’yo tinia, Mi ’du mva ’diri, mi endru eri ma dri, ma nga mi ofe ra. Oku nga di mva nderi ’du ra, nga eri endru ra.

10Mva nderi zo ra, vutinia eri ji eri Farau zi vu, eri ofu mva eriniru. Eri ’da runi Musa’i, eri ’yo ra, mani mule eri esele yiarisi.

11Eri eca ’dini ewu Musani zozu ’boria, eri fu i adripi vu, eri ne teri nzizaru yini; te eri ne ’ba alu Misiriouru erini adripi alu ini Ebraniouru coria.

12Te eri one angu kuru kuru, ka ’ba isu ku eri fu ’ba nde Misiriouru ra, nga avuni zi cinya alia.

13Dru ’dini eri efu, ne agupi Ebraniani iri yini yi ofuria; te eri ’yo agu nde i agini ’yepi onziri tia kini, Mi mi adrini fu a’disi ya?

14Eri omvi e’yo kini, A’di ’ba mi opiru kani ’ba e’yo lipiru ama driliani ya? Mi le ma fu mini ’ba Misirini fulerile ya? Te Musa ovu urisi, kini, Adaru, ni de e’yo nderi ’bo.

15Farau ka e’yo nderi eri ra, eri ndru Musani fuzu. Te Musa apa Farau ma miliasi ra, nga di adri angu Midianinia, eri ri, yi a’di tia ’dale.

16Isu de kuhani Midianiari ovu ezoanzi be aziri; yi emu yi ko, yi oko yi oguru kabiloni yi mvuzuri ma alia tre yi ati ma kabilo dri.

17Te ’ba kabilo ocepi, azi ’diyi eca, dro yi ra; te Musa nga enga yi aza kozu, nga yi fe kabilo yini dri.

18Yi ka emvi Rueli ata yini vu, eri ’yo, Emi emvi andru mbele ’dinile a’di e’yosi ya?

19Te yi ’yo, Agu Misiriouru pa ama ’ba kabilo ocepi ’diyi dri, oko yi ama dri indi, fe kabilo dri indio

20Te eri yo ezoanzi eri ni tia, Eri ngoa ya? Emi ku agu ’diri ’daa a’disi ya? Emi omve eri, ma nya nyaka indio

21Musa a’i ovuzu tualu agupi nderi be, te eri fe Musa dri i zi Ziporani; okuru.

22Eca osi agimva, ’cia runi Gerisomu’i; a’disiku eri ’yo ra, Ma ndra ani’boni angu juruni ma eselia,

23Eri eca ’dini ewu azinisi opi Misiriari dra ra. Anzi Israelini yi ota matusi azi okporurisi, yi owu owu, awu yini ca Mungu vu azi okporu yini ’yele ati’ba yinisi.

24Te Mungu eri otata yini matusiri ra, azini Mungu ega aziza ini yi ma eselia Iburahimu pi, Isaka pie, Yakobo pieri ma e’yo dika,

25Mungu ne anzi Israelini, azini Mungu ega e’yo yini ra.

← Chapter 1 Jump to: Chapter 3 →