Exodus 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1’Di ma vutia Musa pi Aroni be yi mu, yi ’yo Farau be, Yehova Mungu Israelini ’yo ’dini, Mi ku ’ba mani ’diyi ma mu omu ’bazu ma dri roko dria ani.

2Te Parau kini, Yehovani a’di’i ya, mani o’duko erini erizu, Israeli kuzu muzu ani ya? Ma nini Yehovani ku, azini vini indi ma ngani Israeli ku muzu ku.

3Te yi ’yo, Mungu ’ba Ebranianiri fu dri ama be ’bo; ama matu ’ba mi vu, kiri kiri mi ku ama mu o’du pale na roko dria, edeta edezu Yehova Mungu amaniri dri, eri kazu ama ofuzu muasi ku, kazu vini ama olizu seisi ku.

4Te opi Misiriari ’yo yi tia, Emi Musa, Aroni, emi fe ’ba ’diyi ayuna ku a’di e’yosi ya? Emi mu emini teri eminia!

5Parau ’yo ra, ’Ba angu ’doria ’diyi yi kakau, emi ava liza fe yi dri teri kuzu ’doni ya!

6O’du nderisi Farau fe azita ’ba yi agei tepi azi ngaria ’diyi dri, azini ’ba Israelini yini opele yi drilia ’diyi dri kini,

7Emi ma asi yi dri ase biriki ’bezu ekile ndra okorileri fe dika ku; emi ku yi ma ngulupi ma mu ase nde okuni.

8Te kalafe birikini ndra yini adrile ’beleri, emi li yi dri ’dani, emi omvi kalafe nderi vile aluni ku; a’disiku yini ovule ovuoururisi; e’yo ’disi yi wu kini, Mi ku ama mu edeta edezu Mungu amani dri.

9Emi fe azi nzizaru azini ’ba ’diyi dri drinia dika, ’dini yi ma nga azi nde okporu, yi ma nga e’yo inzoru ’diyi eri ku ani beni.

10’Ba yi drilia yi agei tepi azi ngaria ’diyi fu ra, tualu ’ba Israelini yini opele yi drilia ’diyi be, yi ’yo ’ba ongulumuru ma tia kini, Farau ’yo ’dini, Ma ngani emi dri ase fe ma’ini ku.

11Emi ngulupi ma mu ase nda emi’i, pari emini ngazu ecozu isuzuria; te yi ngani azi emini omvi vile aluni ku.

12’Dini ’ba Israelini ere yi angu Misirini drisi dria, ’du pati okuzu ase paria.

13Te ’ba yi drilia yi agei tepi azi ngaria ’diyi odro yi ongusi, kini, Emi de azi emini, ayuna etu vusi etu vusiri, ekile andra emini ’yele ewu aseni ovuzu indirisirile.

14Yi oco ’ba ’ba yi agei tepi Farauni ’diyini opele anzi Israelini ma drilia ’diyi, yi zi yi tia, Emi deni ayuna emini biriki ’bezuri aje azini andru ekile ndra okorile ku a’di e’yo efisi ya?

15’Di ma vutia ’ba anzi Israelini yini opele yi ma drilia ’diyi emu Farau vu wuzu kini, Mi ’ye ’dini ati’ba mini vu a’di e’yosi ya?,

16Yi feni ase ati’ba mini dri ku, te yi ’yo ama ria, Emi ’be biriki! Te mi ne, yi oco ari’ba mini oco oco; te di e’yo onziniri ’ba mi ngulupi vile ’diyini.

17Te eri ’yo, Emi ovuouni, emi ovuouni; e’yo ’disi fe emi dri ’yo ani, kini, Mi ku ama mu edeta edezu Yehova dri.

18Emi mu cucuru’do azi nde ngazu; te yi ngani emi dri ase fe aluni ku, te ti emi nga biriki ma kalafe ’be ’dani.

19Te ’ba anzi Israelini ma drilia ’diyi, yi ka e’yo nde eri kini, Emi ma omvi biriki emini ma kalafe aluni ku, azini ayuna etu vusiri aluni ku indi; yi ni adaru e’yo yini eca onzi.

20Yi ka efu Farau vusi ’bo, yi isu yi Musa pi Aroni be yini pa soria geria;

21yi ’yo yi tia, Yehova ma ne, ma li e’yo emini, a’disiku emi fe ama aji ngu onzi Farau ma milia, ati’ba erini ma milia indi, ’dini emi fe sei yi dri ama ofuzu emi’i.

22Musa mvi Yehova vu, ’yo eri tia, Opi, mi ’ye ’ba mini onzi ’dini a’di e’yosi ya? Mi pe ma ti a’di e’yosi ya?

23Te engazu mani ecazu Farau vu e’yo ’yozu mi rusirisi, eri ’ye ’ba ’doyi onzi, te mi pani ’ba mini aluni ’de ku.

← Chapter 4 Jump to: Chapter 6 →