Exodus 9

Lugbara (E’yo Siza Alatararu Munguniri BIBLIA)

← Chapter 8 Jump to: Chapter 10 →

1’Di ma vutia Yehova ’yo Musa tia, Mi fi Farau vu, mi ’yo tinia kini, Yehova Mungu ’ba Ebranianiri ’yo ’dini, Mi ku ’ba mani ma mu azi ngazu ma dri.

2A’disiku mi ka ga yi dri geriko feko si, mi ka yi ombe i ’dani,

3mi ne, dri Yehovaniri nga ovu ti mini ocele ’diyi dria, akanya mini pie, akanya mini nyiri ’diyi pie, ngamia mini pie, anyapa emini pie, azini kabilo mini o’biru ’diyi pie; azo alukaani onziri nga yi bini.

4Te Yehovani nga ti ’ba Israelini, ’diyi ma esele co ’ba Misiria ’diyini be, te anyapa dria ovupi anzi Israelini ’diyiniri ma aluni ngani dra ku.

5Te Yehova pe o’duniri, nga ’yo, Dru Yehovani nga e’yo ’dori ’ye i angua.

6Dru ’dini Yehova ’ye e’yo nderi ra; ti angu Misirinia ’diyi yi odra dria ra, te ti anzi Israelini, ’diyini odrani aluni ku.

7Te Farau eri pe ojio ti, te mi ne, ti ’ba Israelini ’diyini drani aluani ku. Te Farau ma asi mba okporu ’dani, kuni geri yi dri muzu ku.

8Te Yehova eri ’yo Musa pi tia Aroni be, Emi omvu ofuta pari aci eduzuriari emi dria, Musa ma oyi eri uru ’bua Farau ma milia.

9Eri nga i oja irifuraru angu Misirini ma dria dria, nga efu apipi afipi bileru ’ba ruaa, anyapa ma ruaariru indi, angu Misirini ma alia dria.

10Ka’dini yi nga ofuta pari aci eduzuriari omvu, nga pa so Farau drilia ra, Musa nga eri oyi uru ’bua, eri efu apipi afipi bileru ’ba ruaa, anyapa ruaariru.

11’Ba ojouru econi pa sozaru Musa milia apipi nde ’diyi ma e’yosi ku, apipi ndeni ’ba ojouru ’diyi opile, ’ba angu Misirinia ’diyi be dria indirisi.

12Te Yehova ’ba Farau ma asi mbazaru, eri erini e’yo yini ku; ekile Yehovani ’yole Musa tiarile.

13Te Yehova ’yo Musa tia, Mi enga o’biti kula kula, mi so pa Farau drilia, mi ’yo tinia, Yehova Mungu ’ba Ebranianiri ’yo ’dini kini, Mi ku ’ba mani ma mu azi ngazu ma dri.

14A’disiku pale ’dorisi ma nga dra maturu mani dria ma ti pe asi mini ma alia, ati’ba mini ’diyi ma dria, ’ba mini ’diyi ma dria indi, ’dini mi ma ni ani Mungu azini i sipi male nyaku drisi driani yo.

15Ma eco te ndra ma dri ejuzu, mi cozu ’ba mini be azo muanisi, te’do emi ori avi nyakua ’bo;

16te di ada ma fe mi so pa ’dani e’yo ’dirisi, okpo mani ecezu mi dri ani, ’dini ru mani ma, ovu kuzaru nyaku drisi dria ani.

17Mi ’ba mi amboru ’ba mani ma drilia kiri ’dani, mi kuni yi muzu ku ya?

18Mi ne, dru ekile etu ’doni, ma nga fe si onzi turi ma ’de, si anga ’depi angu Misirinia oku ’dinini ku, engazu anguni i ’baria ecazu curu’dori.

19E’yo ’dirisi curu’do mi pe ’ba ti ti mini ofizu dria mbele, anyapa azini iribia ’diyi be dria; a’disiku ’ba dria azini anyapa dria ovupi amve, ofile joa ku ’diyi, sini nga yi co, yi nga odra ra.

20’Ba e’yo Yehovani rupi ati’ba Farauni ma eseliari, fe ati’ba ini ma apa joa anyapa ini be;

21te ’ba e’yo Yehovani egapi kuri ku anyapa ini iribia, ati’ba ini be amve.

22Te Yehova ’yo Musa tia, Mi eju mi dri uru ’bua, ’dini si ma ’de angu Misirini dria dria ani, ’ba ma dria, anyapa dria, afa engaza nyakuari dria ma dria indi, angu Misirini ma alia.

23Musa nga di kali ini su ’bua; te Yehova pe ovi noza ti tualu si be, diza aciru era nyakua. Yehova fe si ’de angu Misirini ma dria;

24’dini si ’de ra, azini aciri di ne ne si nde ma eselia, ocokoru tu, ekile nga andra ’depi angu Misirinia engazu suru nderini e’dozuria oku kurile.

25Si nderi co angu Misirini dria, afa dria ovupi amve ’diyi, ’bani kani anyapani; azini si nderi co vini afa engaza nyakuari dria, onyo pati angu nde alia ’diyi dria indio

26Alu kiri angu Goseni pari anzi Israelini ’diyini ovuzuria, si ’deni ku.

27Te Farau pe ojio ma ti Musa pi omvezu Aroni be, eri ’yo yi tia, Ma eza paleko ’dorisi ra; Yehovani,alatararu, te ma’i ’ba mani be, ama ’ba onzini.

28Mi ’ba matu Yehova vu zitasi; ovi okporu si be ’diyi fu di dri curu’do ’bo; ma nga geri fe emi dri ra, emi ngani ovu ’doa dika ku.

29Te Musa nga ’yo tinia, Ma ka fu aku amboruarisi ’bo, ma-nga ma dri aja uru Yehova vu; ovi ma nozani nga i de ra, si ngani ’de dika ku, ’dini mi ma ni nyaku ovu Yehovani.

30Te ma ni ra, mi’i ati’ba mini ’diyi be, kiri emi ngani nga Yehova Munguni ru ku.

31(Isu de si oco pamba pi anya be ’bo, a’disiku anyani ’yale yarisi, azini pambani fu ’balerisi.

32Te coni nganu pi burusu be ku,a’disiku yi engani nga ku.)

33i Musa nga di fu Farau vurisi aku amboarisi, nga i dri aja uru Yehova vu; te ovi noza pi si be nga ovu ciri, azini ozoo nde nga ati ra.

34Te Farau ka ndre ozoo pi si pie ovi noza pie de yi ra, eri ere i e’yo onzi ’yezu, ’ba i asi mbazaru, eri’i ati’ba ini be.

35Asi Farauni ovu mbazaru, te eri kuni anzi Israelini ’diyi dri muzu ku; ekile Yehovani ’yole Musa tisirile.

← Chapter 8 Jump to: Chapter 10 →