Exodus 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Yehova ’yo Musa tia kini, Mi fi Farau vu, mi ’yo eri tia, Yehova ’yo ’dini kini, Mi ku ’ba mani ma mu, ma nga azi ma dri ani beni.

2Te mi ka ga yi dri geri feko si, mi ne, ma nga angu mini co dria odrudrusi traa kalatinia;

3yi ara nga ga odrudrusi tre tre, yi nga efu fi jo Olinia, nga fi jo mini lazuri ma alia, nga tu pari mini lazuri ma dria, azini yi nga fi ati’ba mini ma joa, ’ba mini ma dria indi, yi nga otu atiliku dria kpere wari mikate itizu ’diyi ma alia indi

4odrudru nde ’diyi nga ombu mi ruaa, azini ’ba mini ma ruaa, azini ati’ba mini dria ma ruaa indi.

5Yehova ’yo Musa tia, Mi ’yo Aroni tia, Mi eju mi dri kali be yi ara ’diyi ma dria, yi nyiri ’diyi pie, azini yi atipi ati ’diyi pie, odrudru ofuzu angu Misirini ma dri dria ani

6Te Aroni nga di i dri eju yi Misirini dria ra; odrudru efu ani, a’bu angu Misirini ma dri dria ci.

7Te ’ba ojouru yi ’ye ’dini indi ondua yini olenirisi, yi ofu odrudru angu Misirini ma dria.

8’Di ma vutia Farau nga Musa pi omve Aroni be kini, Emi zi Yehova tia, odrudru dria drozu ma vusi, ’ba mani ’diyi be; te ma nga ku ’ba ma mu edeta edezu Yehova dri ani beni.

9Musa eri ’yo Farau tia, Mi enya mi e’yo ’dori ma alia masi: ma zi Mungu mi dri, ati’ba mini dri azini suru mini dri, odrudru ma dri jazu dria emi vusi, jo emini ma aliasi o’du ngorisi, ’dini odrudru ma ovu kiri yi ara ma alia a’dule beni ya?

10Te eri ’yo tinia, Drusi. Musa ’yo ra, Ma ovu mini ’yolerile, ’dini mi ma ni Mungu azini i sipi Yehova Mungu amanileri aluni yo.

11Odrudru nga mi ku, jo mini ’diyi pie, ati’ba mini pie, azini ’ba mini ’diyi pie dria; yi nga ace kiri yi ara alia a’dule.

12Te Musa pi Aroni be yi fu Farau vusi; Musa owu Yehova vu odrudru erini ofule Farau vu ’diyi Ma e’yosi.

13Te Yehova ’ye ekile Musani ’yolerile; te odrudru odra dria jo aliasi, dri driasi, azini amvuasi dria,

14Yi otro yi ma avu tualu ngulu ngulu, angu nga ani ngu onzi tu.

15Te Farau ka ndre oli li i ruaa were ’bo, asini mba kongoloko, eri erini yi ku; ekile Yeho’vani ’yolerile.

16Te Yehova ’yo Musa tia kini, Mi ’yo Aroni tia, mi eju kali mini, mi co irifura nyakuari, eri ma oja i uriru angu Misirini ma alia dria.,

17Yi ’ye ’dini; Aroni eju i dri kali be, co irifura nyakuari ra, uri efu ’ba ruaa azini anyapa ruaa indi; Irifura! nyakuari dria oja i uriru angu Misirini ma alia dria dria.

18Te ’ba ojouru yi o’bi ’ye ’dini indi ondua yini olenirisi uri ofuzu, te econi yi dri ku. Uri ovu ’ba ruaa azini anyapa ruaa dria.

19’Di ma vutia ’ba ojouru nga di ’yo Farau tia kini, ’Dori drileju Munguni fo! Te Farau ma asi ovu mbazaru, erini yi ku; ekile Yehovani ’yolerile.

20Te Yehova ’yo Musa tia, enga o’bitisi kula kula, mi mu pa so Farau ma drilia; mi ne, eri fu mu yia; mi ’yo tinia, Yehova ’yo ’dini, Mi ku ’ba mani ma mu, ma nga azi ma dri ani.

21Te ka oga ’ba mani dri muko si, mi ne, ma nga onyu konyu o’biru ma ti pe mi dria, ati’ba mini pie, ’ba mini pie dria, jo emini ma alia indi; jo ’ba Misirini ’diyini nga ga tre onyukonyu o’birusi, yi nga nyaku ’bani ovuzu driniari a’bu ci.

22Te ma nga angu Goseni ’ba: manini ovuzu aleniari ma esele co, ’dini onyukonyu o’biru ’diyi ma ovu ’daa ku; ’dini mi ma ni ma Yehova ovupi nyaku eseliari’i beni.

23Ma nga ’ba mani esele co ’ba mini be. Eceta ’diri nga i ’ye drusi.

24Yehova ’ye ’dini ra; onyukonyu: o’biru onzi candi fepi ’diyi fi Farau vile joa, azini ati’ba erini ma joa indi; angu Misirini dria ovu di ezazaru onyukonyu nde ’diyisi.

25Te Farau omve Musa pi Aroni be kini, Emi mu edeta edezu Mungu emini dri angu ’doria,

26Te Musa ’yo ra, Econi amani: ’yezaru ’dinile ku; ama nga edeta ’ba Misiria ’diyini ngule onziri ede Yehova Mungu amani dri. Mi ne, onyiru ama ede edeta ’ba Misiria ’diyini ngule onziri yi ma milia ya? Yi ngani ama o’be onisi ku ya?

27Ama nga mu o’du pale na roko dria edeta edezu Yehova Mungu amani dri, ekile erini ngale azita fele ama dririle.

28Te Farau ’yo ra, Ma nga geri fe emi dri ra ’bo, emini edeta edezu Yehova Mungu eminiri dri roko dria; te bani emi mu re tu i ku. Emi zi ma dri indi fo.

29Te: Musa ’yo, Mi ne, ma di fu mi vusi, ma nga zi Mungu tia onyukonyu o’biru ma ku Farauni drusi, ati’ba, lerini pie, ’ba erini be; te di Farau ma ’ye lokirisi dika geri ogazu ’ba dri muzu edeta edezu Yehova dri ku.

30Musa fu Farau vusi, zi Yehova tia ra.

31Yehova nga di ’ye ekile Musani ’yolerile, eri ’du onyukonyu o’biru ’diyi Farau vusi, ati’ba erini pie, ’ba erini be ra; aluni aceni ku.,

32Te Farau ’ba asi ini mbazaru, dika o’du ’dirisi indi, kuni yi dri geri muzu ku.

← Chapter 7 Jump to: Chapter 9 →