Exodus 33

Lugbara (E’yo Siza Alatararu Munguniri BIBLIA)

← Chapter 32 Jump to: Chapter 34 →

1Yehova ’yo Musa tia, Mi nga ’doarisi, mi tu ’dale, mi’i azini ’ba mini ofule angu Misiriniasi ’diyi be, cazu angu mani oyoni sole Iburahimu pi vu, Isaka pie, Yakobo pieria, ’yozu kini, Ma nga eri fe ori mini dri.

2Te ma nga malaika ma ti pe mi drilia, te ma nga ’ba Kananini pi dro, ’ba Amorini pie, ’ba Hitini pie, ’ba Perizini pie, ’ba Hivini pie, ’ba Yebusini pie;

3cazu angu gapi tre lesu pisi, anyu beria; te ma ngani tu emi eselia ku, emini ovule suruti ombe mbaza berisi, ’dini ma kazu emi dri jazu geria ku.

4’Ba ongulumuru ka e’yo kuza onzi ’diri eri ra, yi nga ovu candisi; ’ba aluni suni onyiafa i ruaa ku.

5Te Yehova ’yo Musa tia, Mi ’yo anzi Israelini ’diyi ma tia, Emi ovu suruti ombe mbazaniri; ma ka te tu emi eselia etu were ti, ma te emi dri ja ra, E’yo ’disi emi tru di onyiafa emini, ’dini ma ma ama ani e’yo mani ngale ’yele emi ruaari.

6Israeli anzi yi otru di onyiafa yi ruaa ra, engazu oni Horebua asini su dika ku.

7Te Musa adri hema ’du aso amve, pari ’ba ongulumuruni hema yini asozuri be re; ’da runi hema ti ecizaniri’i. Te eri nga eca ’dini, ’ba dria alu alu Yehovani ndrupiri yi adri fu muzu hema ti ecizani ovupi amve pari ’bani hema asozuri be reria,

8Eri eca ’dini, Musa ka fu mu amve hema nderia, ’ba alu alu dria enga uru pa sozu hema yini ma tilia, Musa ma vuti luzu kpere erini ’firia hema aliaria.

9Te eri eca ’dinile, Musa ka fi hema ma alia ’bo, iriti pa sopi piriruri esi va, pa sozu hema ma tilia, te Yehova ’yo ’eyo Musa be.

10Te ’ba nde dria ne iritini pa soria piriru hema tilia, te ’ba nde dria enga uru inzita inzizu, ’ba dria alu alu hema yini ma tilia.

11Te Yehova ’yo Musa be milia milia, ekile ’bani e’yo ’yole i agyi berile. Te Musa oja i dika fizu pari ’bani hema asozuria, te Yosua Nuni mvi, karilau eri aza kopiri, funi hema aliasi amve ku.

12Te Musa ’yo Yehova tia, Mi ne, mi ’yo ma tia kini, Mi ji ’ba ’diyi uru; te mi eceni nga ma dri ’ba mini ngale tini pele ma be tualuri ku. Te di, mi ’yo ra, Ma ni mi rusi, mi isu vini asi ndriza ma milia ’bo.

13Ka adri ’dini curu’do ma zi mi tia, ma ka asi ndriza isu mi ma milia ’bo, mi ece curu’do geri mini ’diyi ma dri, ma ma ni mi ani, ’dini ma ma isu asi ndriza mi milia ani beni. Mi ma osu indi kini, suru ’diri yi ’ba mini.

14Te eri omvi e’yo ra, kini, Ma ngulupi nga mu mi be, ma nga fe mini ava li.

15Te eri ’yo eri tia, Te mi ngulupi ka mu ma be ku, mi ji ama ngazu ’doarisi ku.

16Te ’ba yi nga ni ngoni ngoni, ama isu asi ndriza mi milia, ma’i ’ba mini ’diyi be ’bo ya? Yi ngani ni mini mule ama be indirisi ’dini ku ya? ’dini ma’i ’ba mini ’diyi be, ama co esele ’ba nyakua ’diyi be dria.

17Yehova ’yo Musa tia, Ma nga e’yo mini ’yole ’diri ’ye ra; mini asi ndriza isule ma milia ’borisi, azini mani mi nile rusirisi.

18Musa ’yo, Ma zi mi tia, mi ece ma dri diza mini.

19Te Mungu ’yo, Ma nga fe onyi mani dria ma aga mi drilia, ma nga Yehova ma ru olu mi drilia; ma nga asi ndriza ’ba ’ba mani lele asi ndriza ’bale vuniari vu, ma nga yiki ’ba ’ba mani lele yiki ’bale vuniari vu.

20Te eri ’yo ra, Mi econi ma mile ndrezaru ku; a’disiku ’ba econi ma ndrezaru, vutinia ovuzu idriru ku.

21Te Yehova ’yora, Mi ne, pari ma ageia indi, mi nga pa so oni dria;

22azini eri nga eca ’dinile, ma dizani agaria ma nga mi ’ba onigulea, ma nga mi a’bu ma drisi cazu mani agazu ’boria;

23te ma nga ma dri omvi, mi nga ma nguku ne’i; te ma mile ngani i e’da mi dri ku.

← Chapter 32 Jump to: Chapter 34 →