Genesis 18

Lugbara (E’yo Siza Alatararu Munguniri BIBLIA)

← Chapter 17 Jump to: Chapter 19 →

1Yehova nga i e’da eri vu kumara Mamireni ma tia, erini riria hema ma tilea etuni driria tu ’dia ’di.

2Eri nga i ma mile enga uru luzu, te mi ndre, ’ba na so pa eri ma drilia. Eri ka yi ndre ’bo, eri nzu engazu hema tilearisi muzu dri fuzu yi be, nga avu kpere nyakua va,

3nga ’yo ra, Opi mani la, ma ka asi ndriza isu curu’do mi milia ’bo, ma zi mi tia, mi aga drile I ati’bo mini kuzu ’dini ku.

4’Ba ma eji yi were, emi oji emi pa, emi ma li ava pati etia,

5te ma nga enya eji were, emi ma omi emi asi, emi nga di mu drile ndo-emini ecale ati’bo emini vu e’yo ’dirisi ’borisi. Yi nga a’i ra kini, Mi ’ye mini ’yolerile.

6Iburahimu nga fi mbele mbele hema alia Sara vu, nga ’yo ra, Mi ede anyafura ’ile inikiniruri afa afa o’bizurisi na mbele, mi eti eri mbele ovazu enyaru.

7Iburahimu nga nzu anyapa erini o’biru ’diyi vu, nga kojamva nguzaru onyiruri ebi, fe ati’bo dri, eri nga eri li lozu mbele mbele.

8Eri nga buta odu pi ’du lesu pie, kojamva erini a’dileri pie, nga yi asa yi ma palaa; eri nga pa so yi ma ageia pati etia, yi nga nya ra.

9Yi nga ’yo eri ma tia, Oku mi vile Sarani ngoa ya? Eri nga ’yo ra, Emi ndre, eri hemaa.

10Eri nga ’yo ra, Ma nga emvi mi vu ada ewuni caria, te mi ndre, oku mini Sarani nga mva ti ra. Te Sara nga e’yoni eri, erini de ovuria hema ovupi eri ma ngukualeruri ma tilea.

11Isu de Iburahimu pi Sara be yi dezaru, eli be kakau; a’bi suza okuniri de i curu’do Sara ma ruaa ’bo.

12Sara nga asisi, kini, Ma ka de ’bo, ma nga ovu ayiko be, de opi mani de vini ’bo indi ya?

13Yehova nga ’yo Iburahimu ma tia kini, Sarani ogu a’disi ya, kini, Ma ka de ’bo ma nga mva ti ra ada ya?

14Afa azini ewaru ecopi Yehovani ndepini ci ya? Ma nga emvi mi vu ewu te azile ’borisi, ewuni ecaria, Sarani nga mva ti ra.

15Te Sara nga ga si kini, Ma guni ku; erini ovule urisirisi. Te eri ’yo, ’Dini ku, mi gu ra ada ada.

16’Ba nde nga enga ’daarisi, nga angu lu Sodomualeru; Iburahimu nga mu yi be yi jizu kuzu geria.

17Yehova nga ’yo ra, Ma nga e’yo mani ’yeleri oci Iburahimu dri ci, ya?

18de isu Iburahimuni nga ofu ovuzu suru amboru azini okporu ada, azini suru wudrikurua ’diyi dria nga ovu asi ndriza be erisi.

19A’disiku ma ni eri ’bo, eri ma azi e’yo ani anzi erini dri, ’ba eri ma joa ’diyi be, eri ma vutia, yi ma mba geri Yehovani ma ta, e’yo kililiruri pi ’yezu e’yo liza be; Yehova ma fe e’yo erini ’yole Iburahimusi ’bori ma ’ye i eri vu beni.

20Yehova nga ’yo ra, Wuta Sodomu pini Gomora berini ovule amboru, e’yo onzi, yinini ovule ewaru turisi,

21e’yo ’disi ma nga si va curu’do, ma ma ndre ani kani yi ’ye tro tro ekile wuta ecapi ma vu ’borile yani; ka ’dini ku ma nga ni ra.

22’Ba nde ’diyi nga yi oja engazu ’daarisi, nga drile fe muzu Sodomualeru, te Iburahimu nga ini pa so ’dani Yehova ma drilia.

23Iburahimu nga si ogogo, nga ’yo, Mi nga ’ba kililiru ’diyi ma dri ja ’ba onzi ’yepi ’diyi be tualu ya?

24Kani ’ba kililiru ’diyi ovu aku nde ma alia kali towi; mi nga pari nde ma dri ja yiki kokoru ’ba kali towi alenia ’diyisi?

25’Dini ku; ’yezu ’dinileri sini mi ku, ’ba kililiru ’diyi ofuzu ’ba azi omi ’yepi ’diyi be tualu, ’ba kililiru ’diyi ’bazu ovuzu ’ba azi omi ’yepi ’diyile tro tro ’dini ku! E’yo ’diri sini mi ku! Mungu angu wudrikuru dria ma e’yo lipiri ngani ’ye kililiru ku ya?

26Yehova nga ’yo kini, Ma ka Sodomua ’ba kililiru ’diyi isu kali towi aku nde ma alia, ka’dini ma nga pari dria ku e’yo yinisi ra.

27Iburahimu nga e’yo omvi kini, Mi ndre nga, ma fi e’yo ’yozu Yehova tia, ma’i ovupi irifura azini ofutaruri.

28’Ba kali towi kililiru ’diyi ma azi towi ka ovu yo, mi nga aku eza dria dria ’ba towi ’diyi ma e’yosi ya? Eri ’yo eri tia, Ma ngani eri eza ku, ma ka ’ba kililiru kali su drini towi isu ’dale ciria.

29Eri nga ’yo eri tia dika, Te kani mi nga ’ba isu kali su, ka’dini e’yo ngoni ya? Eri nga ’yo ra, Ma ngani eri eza ’ba kali susi ku.

30Eri nga di ’yo ra, Opi ma ovu aokosi ku fo! te ma nga e’yo ’yo. Te ’ba alenia ka ovu kali na, e’yo ngoni ya? Eri nga ’yo kini, Ma ngani eri eza ku, ma ka ’ba kali na isu ’dale ci.

31Te eri nga ’yo ra, Mi ndre nga, ma ede ma asi e’yo ’yozu Opi ma tia. ’Ba alenia ’diyi ka Ovu kali iri? Eri ’yo eri tia, Ma ngani eri eza ’ba kali iri ma e’yosi ku.

32Eri nga ’yo ra, Opi ma ovu aokosi ku fo! ma nga di e’yo ’yo kiri pale alu ’di. Kani mi nga ’ba isu alenia mudri, ka’dini e’yo ngoni ya? Eri nga ’yo kini, Ma ngani eri eza ’ba mudrisi ku.

33Yehova nga di mu ra, ka de ti ecizu Iburahimu be ’boria; Iburahimu nga di mvi i paria.

← Chapter 17 Jump to: Chapter 19 →