Genesis 43

Lugbara (E’yo Siza Alatararu Munguniri BIBLIA)

← Chapter 42 Jump to: Chapter 44 →

1Abiri ovu okporu tu angua.

2Te eri nga eca ’dini, yi ka nyaka yini ejile Misiriari nya de ’bo yi ati nga ’yo yi tia, Emi mu dika, emi je nyaka were ama dri.

3Yuda nga ’yo eri tia kini, Agu nde azi ndra e’yo ama tia asi driasi kini, Emi ngani ma mile ndre dika ku, pe lu emi adripi ma ovu emi be ka!

4Mi ka a’i ama adripi ti pezu ama be, ama nga si ’dale nyaka jezu mi dri;

5te mi ka eri ti pe ku, ama ngani si ’dale ku, agu ndeni ’yole ama tia, Emi ngani ma mile ndre dika ku, pe lu emi adripi ma ovu emi be ka, ’dinirisi.

6Israeli nga ’yo ra, Emi ’ye ma vu onzi ’yozu agu nde ma tia emi adri azini ci, ’diniri a’disi ya?

7Yi nga ’yo ra, Agu nde ozi ama e’yo okposi, ori’ba amani ma e’yo pie, kini, Emi atini nga idriru ya? Emi adri azini indi ya? Ama olu eri ma tia e’yo awa’diyile; ama eco ndra ni eri ndra ’ye ’yo kini, Emi eji emi adrini ’doa, ’diniri ngoni ngoni ya?

8Yuda nga ’yo i ati ma tia, Mi pe mva ma ti ma be, ama di nga dri ko mu ani, ama ma ovu di idriru, ama ma dra ku ama’i, mi pie, anzi nyiri amani ’diyi be dria.

9Ma nga tani mba ma’i; mi nga e’yoni zi ma tia. Ma ka eri eji mi vu idika ku, eri ’bazu mi milia ku, e’yo onziniri ma ovu ma dria ’dani ’dani;

10a’disiku ama ka ndra dri ici ku, te’do ama mvi ’dale pale iriria ’bo.

11Yi ati Israeli nga ’yo yi tia, Ka adri ’dini, emi ’ye ’dinile: emi ’du patiefi onyiru angu ’doria ’diyi ma azi afazu emini ma alia, emi ji afa feza agu nde dri, odu arikariru pi were, anyuoso were pie, afa arikariru ’diyi pie, ajinguru pie, patiefi pie, patiefi alimondiru ’diyi pie dria.

12Emi ’du silingi emi dria ndrarile ndrarile paleko iri; te emi ji silingi indra omvile gunia emini ma tia ’diyi emi dria; kani omvi ’dini tavisi yani.

13Emi ma ’du emi adrini indi, emi ko dri mu agu nde vu dika;

14Mungu okpoe’i ma fe emi dri yiki isuzu agu nde vu, eri ma tru emi dri emi adri aziri pi Benyamini be beni. Ma ka di nga ovu anzi kokoru, ma ma ovu di.

15’Ba nde nga afa feza nderi ’du ra, nga vini silingi ndrarile paleko iri ’diyi o’du yi ma Idria, nga Benyaminini ji indi; yi nga ra, nga si mu Misiria, nga pa so Yusufu ma milia ra.

16Yusufu ka Benyaminini ndre yi ma eselia, eri ’yo ’ba jo erini ma,agei tepiri ma tia, Mi ofi ’ba ’diyi joa, mi mu za li, mi ede afa ngonde, ’ba ndeni ngale nyaka etu agaduari nyale ma berisi.

17Agu nde ’ye Yusufuni azilerile; agu nde nga ’ba nde ofi Yusufu vile joa,

18’Ba nde ’diyi ovu ani urisi ’bani yi ofile Yusufu vile joarisi, yi nga ’yo ra, Yi ofi ama silingi ndraka omvile gunia amani ma alia ’diyi ma e’yosi, eri le e’yo nda ama ruaa, eri ma enga ani ama ruaa ombasi, ma obi ama ati’baru, ma opa akanya amani indi beni.

19Yi nga yi osi ’ba Yusufu ma jo ma agei tepiri vu ogogo, nga e’yo ’yo eri be jotilea,

20kini, Opi mani la, ama eca ndra okorisi nyaka jezu ada ada;

21te eri eca ’dini, ama ka ca ndra pari amani lazuria, ama zi gunia amani ma ti, te mi ndre, ’bai dria alu alu ma silingi ovu gunia erini ma tia, silingi nde yi ndra: o’bilerile pari ’da vusi; ama eji di yi dika ama dria indio

22Ama eji vini silingi azini nyaka jezu indio. Te ama nini ’ba silingi nde omvipi ama gunia ma aliari a’di’i yari ku.

23Eri ’yo ra, Emi asi ma ovu anzuru, emi ru ku; Mungu emini azini Mungu emi atiniri fe lonyi emi dri gunia emini ma aliani; ma’i, ma ’du ndra silingi emini ra. Eri nga Simeoni ofu yi vu.

24Agu nde nga ’ba nde ofi Yusufu vile joa, nga yi eji yini ani yi ma pa ojizu, eri nga nyaka fe akanya yini dri.

25Yi nga afa feza nde ede ngonde de nga Yusufu ecani etu agaduarisi ku, yini erile kini yi nga aka nya ’dalerisi.

26Yusufu ka eca akua ’bo, yi nga afa feza ovupi yi ma dria ’diyi eji eri vu joa, nga avu va nyakua eri inzizu.

27Eri nga yi ngoni yari zi, nga ’yo ra, Emi ati mbazauru emini ndra, e’yoni ’yoleri onyiru ya? Eri nga idriru ya?

28Yi nga ’yo ra, Ati’bo mini ama atini onyiru, eri nga idriru ra. Yi nga yi dri elu va eri inzizu.

29Eri nga i mile enga uru, nga i adripi Benyamini i andrini tileniri ndre, nga ’yo ra, ’Diri emi adri werea emini e’yoni olule ma tiari’i ya? Eri ’yo ra, Mungu ma fe mi dri asi ndriza fo, ma mvi ’la!

30Yusufu nga ’ye mbele mbele, i adripi ma avani i vale turisi, eri nga pari wuzu mindresiri nda. Eri nga fi jo aliza eriniri ma alia, nga wu mindresi’daa.

31Eri nga di i mile oji, nga fu ra; eri nga i asi imba, nga ’yo ra, Emi eji nyaka.

32Yi nga nyaka eji erini ndu, yini ndu, ’ba Misiria nyalea nyapi eri be ’diyini ndu indi; ’ba Misiria ’diyini adrile nyaka nyale ’ba Ebraniani be tualu kurisi, e’yo ndeni ovule e’yo ngule onzi ’ba Misiria ’diyi ma miliarisi.

33Yi nga ri eri ma milia, mva osile okori ri drile osita erini vusi, wereari eli erini wereri vusi, ’ba nde yi nga e’yo osu yi eselia.

34Eri nga nyaka eriniri ’du awa fezu yi dri, te esele fele Benyamini driri aga nyaka fele yi ma azi driri paleko towi. Yi nga di afa mvuza mvu, nga ovu ayikosi eri be.

← Chapter 42 Jump to: Chapter 44 →