Genesis 26

Lugbara (E’yo Siza Alatararu Munguniri BIBLIA)

← Chapter 25 Jump to: Chapter 27 →

1Liki nga ’de dika angu ndea ovuni liki oko ndra ewu Iburahimu ngareri’i ku. Isaka nga mu Abimeleki opi ’ba Filisitiaa ’diyi ma driliari vu Geraria.

2Yehova nga i e’da eri vu, nga ’yo ra, Mi si Misiria ku; mi ma ovu angu mani ngale e’yoni olule mi tiari ma alia.

3Mi ovu angu ’diri ma alia ani’boru, ma nga ovu mi be, ma nga asi ndriza fe mi dri; a’disiku ma nga angu ’diyi dria fe mi dri ori mini be, ma nga oyo ndraka mani sole mi ati Iburahimu beri fe ma so pa kirikiri.

4Ma nga fe ori mini ma ezu karakarau ’bi’bio ’bua ’diyile, ma nga angu ’diyi fe dria ori mini dri; ori mini ma alia suru nyakua ’diyi dria nga asi ndriza isu;

5Iburahimuni o’duko mani erilerisi, erini aziza mani pi ma ta mbale azita mani pie, e’yo mani azile ’diyi pie, azita mani sile ’diyi pie driarisi.

6Isaka nga di ovu Geraria.

7’Ba angu ndea ’diyi nga e’yo zi tinia oku erini ma e’yosi; eri nga ’yo ra, Eri ma amvipini; erini ovule urisi ’yozu, Eri oku mani-risi, kini, ’Ba angu ndea ’diyi kazu ma fuzu Rebeka ma e’yosi ku; erini ovule ndrizaru ’ba ma miliarisi.

8Eri nga eca ’dini, eri ka ovu ’daa ewu izu ’bo, Abimeleki opi ’ba Filisitiaa ’diyini nga angu ndre derisasi, eri lui ra, te mi ndre, Isaka pi avi avi oku ini Rebeka be.

9Abimeleki nga Isakani omve, nga ’yo ra, Mi ndre, eri oku mini ada ada; te mi ’yo ndra, Eri ma amvipini ngoni ngoni ya? Isaka nga di ’yo eri tia, Mani ’yole, Ma kazu drazu eri ma e’yosi ku-risi.

10Abimeleki nga ’yo ra, E’yo mini ’yele ama be ’diri ngoni ya? Kani ’ba nde ma azi ka ndra la oku minisi e’yo ega kokoru, mi ndra nga e’yo onzi eji ama ruaa ama ndezu.

11Abimeleki nga e’yo azi ’ba erini ma tia dria kini, ’Ba agu ’di pi ma rua elopi oku erini beri nga ovu fuzaru ada ada.

12Isaka nga ori ri angu ndea ’daa, eli nde ’dasi eri nga efi kaza isu pale turu alu. Yehova nga eri dri asi ndriza fe,

13agu nde nga efu ovuzu amboru, eri nga zo vini dika dika kpere cazu amboru tu.

14Eri lonyi be, kabilo o’biru ’diyi pi, ti o’biru ’diyi pie, ’ba eri ma joa ’diyi kakau tu; ’ba Filisitiaa ’diyi ovu ani a’yasi tu.

15(Isu de yi a’di dria i ndra eri ma ati ma ati’bani gale ewu eri ma ati Iburahimuni ngarerisi ’diyi, ’ba Filisitiaa ’diyi ku nyaku yi nde ma alia tre, opi yi nde ma ti ci.)

16Abimeleki nga ’yo Isaka ma tia, Mi fu ama anguarisi fo, mini ovule okporu tu ama agazu rarisi.

17Isaka nga enga ’daarisi ra, nga hema aso e’bu Gerariaria, nga ovu ’dale.

18Isaka nga yi a’di yini ndra gale i ma ati Iburahimu ngarerisi ’diyi ga dika; ’ba Filisitiaa ’diyini yi ma ti opile ci drata Iburahimuni ma vutiarisi; eri nga yi ma ru o’da fe ekile ndra eri ma atini yi ma ru o’dale ’bori ma vule.

19Ati’ba Isakani nga ’bile ga e’bua, nga yi a’di egapi egari isu ’dale;

20te ’ba ti ocepi Geraria ’diyi nga agata ga ’ba Isakani ti ocepi ’diyi be, kini, Yi nderi amani. Eri nga ani yi a’di, nde ma ru ’da Eseki’i,’yini agata gale eri berisi.

21Yi nga yi a’di aziniri ma ’bile ga, nga vini agata ga yi nderi ma e’yosi indi, eri nga runi ’da Sitina’i.

22Eri nga enga ’daarisi, nga mu yi a’di aziniri ma ’bile ga, te ’disiria yi gani agata yi ndesi ku; e’yo ’disi eri nga runi ’da Rehoboti’i, kini, Yehova ede di pari ama dri walaru ’bo, ama nga efi ka angua ra.

23Engazu ’daarisi eri nga di tu Beeri-sebaa.

24Yehova nga i e’da eri vu ini alu ’dasi, nga ’Yo ra, Ma Mungu mi ati Iburahimuniri; mi ru ku, mani ovule mi berisi, mani ngale asi ndriza fele mi dri, mani ngale ori mini ezule kakau ati’bo mani Iburahimu ma e’yosirisi.

25Eri nga pari edeta edezuri si ’dale, nga Yehova ma ru omve, nga i ma hema aso ’daa. Ati’ba Isakani nga yi a’di ma ’bile ga ’daa indio.

26Abimeleki pi nga di mu eri vu engazu Geraria, agyi erini Ahuzati pie, Fikoli ambo asikari erini o’biru ma driliari be.

27Isaka nga ’yo yi tia, Emi eca ma vu a’disi ya, de isu emi ngu ma onzi, azini emi dro ndra ma emi vile anguarisi ’bo?

28Yi nga ’yo eri tia, Ama ndre ada Yehova ovu mi be tualu; ka’dini ama ’yo ani, Onyiru ama iri tro, ama’i mi be, ama ma so oyo ama eselia mi be ci, ama ma azi aziza mi be indi,

29kini, mi ngani ama ’ye onzi ku, ekile amani mi rua elole ku, te amani mi ’yele lu onyiru mi ti pezu mvizu asi anzurusirile. Mi di curu’do ’ba Yehovani ’bale asi ndriza beriruri’i.

30Eri nga omu ’ba yi dri, yi nga nyakanya,nga afa mvuza mvu.

31Yi nga enga o’biti kula kula, nga oyo so yi ma eselia ci; ’dini Isaka nga di yi ti pe mvizu, yi nga ni mu eri kuzu asi anzurusi.

32Eri nga eca ’dini o’du nde ’dasi, ati’ba Isakani nga eca ra, nga yi a’di ma ’bile yini galeri ma e’yo olu eri tia, nga ’yo eri tia, Ama isu yi ’bo.

33Eri nga di runi ’da Siba’i; e’yo ’disi aku nde ma ru ovu Beeri-seba ecazu kpere andru.

34Esau ma eli ka ca kali su ’bo, eri nga Yuditi Beeri ’ba Hitini ma zi pi je okuru Basemati Eloni ’ba Hitini ma zi be;

35oku nde ’diyi fe eyikiza candiru tu Isaka pi ma asia Rebeka be.

← Chapter 25 Jump to: Chapter 27 →