Genesis 38

Lugbara (E’yo Siza Alatararu Munguniri BIBLIA)

← Chapter 37 Jump to: Chapter 39 →

1Eri nga eca o’du ’dasi Yuda nga i adripi ku, nga si va nga i oja fizu ’ba Adulamuari azini ma akua, runi Hira’i.

2’Dale Yuda nga ’ba Kananini ma azi ma zamva ndre, runi Sua’i; eri nga eri ’du ra, nga la erisi.

3Eri nga mva isu ra, nga mva osi agupiani, eri nga runi ’da Eri’i.

4Eri nga mva isu dika, nga Vini osi agupiani, nga runi ’da Onani’i,

5Eri nga vini mva azini ti, nga runi ’da Sela’i. Osi eri de eri Kezibua.

6Yuda nga oku je Eri i ma mvi okori dri, runi Tamari’i,

7Te Eri, Yuda ma mvi okol’i, ovu’ba onzini Yehova ma milia; Yehova nga eri fu ani.

8Yuda nga ’yo Onani ma tia, Mi fi oku mi adripini vu, mi ’ye ’ba drapiri ma adrini adrile ’yelerile, mi ti mi adri ma ori.

9Te Onani ni ra kini ori ngani ovu erini ku; te eri nga eca ’dini, eri ka fi oku i adripini vu, eri nga orini ada nyakua, eri kazu ori tizu i adrini ku.

10E’yo nde erini ’yeleri ovu onzi Yehova ma milia; eri nga vini eri fu indio

11Yuda nga di ’yo i zia Tamari ma tia, Mi te awuzioru mi ati vile ’de cazu kpere ma mvi Selani ngaria mbaria; a’disiku eri ’yo ra, Eri kazu drazu eri ma adripile indi ku. Tamari nga mvi ani ovu i ma ati vile.

12O’du ka aga ra, Sua zi Yuda vile okuri nga dra ra; Yuda ka asi omiza isu ’bo, eri nga tu uru ’ba eri vile kabilo ’biko olipi ’diyi vu Timinaa, yi’i agyi Hira ’ba Adulamuari be.

13’Ba olu e’yo Tamarini ’kini, Mi nare, mi anyi etu Timinaa kabilo i vile ’diyi ma ’biko olizu.

14Eri nga ani bongo erini awuzioniri tru i ruaarisi ra, nga bongo ’beza ’be i ruaa, nga i a’bu ci, aga mu ri kalitile Enaimu ovupi geri, mupi Timinaari ma Haria; erini ndrele kini Sela mba ’bo, te yi feni i eri dri okuro kurisi.

15Yuda ka eri ndre ra, eri ega eri oku acipi saaruni, erini i mile a’bule cirisi.

16Eri nga i ja i eri vu geri kalaa, nga ’yo, Ma zi mi, mi fe a fi mi vu fo; erini nile kini eri i zia’i kurisi. Eri nga ’yo ra, Mi nga ma dri a’di afa fe, mi ka fi ma vuria?

17Eri nga ’yo ra, Ma nga mi dri ndriamva ndri o’biru ma eseliari fe’i, Eri nga ’yo ra, Mi nga ma dri afa ku toboru de nga mi peni eri ti ku ya?

18Eri nga ’yo ra, Ma nga mi dri a’di ma afa ku toboru ya? Eri nga ’yo ra, Driadriamva mini ecetaruri pi, baka mini pi, kali mi driari pie. Eri nga yi fe eri dri, nga fi la erisi, eri nga mva isu i alia erini.

19Eri nga enga ra, nga bongo ’beza ini tru ra, nga bongo ini awuzioniri su dika.

20Yuda nga ndrimva ndri o’biru ma eseliari ma ti pe agyi erini ’ba Adulamuari ma dria, afa toboru nde onzezu oku nde dri, te isuni eri ku.

21Eri nga di ’ba ovupi pari ndea ’diyi zi kini, Oku saaru ndra Enaimua geri tiari ngoa ya? Te yi ’yo eri tia, Oku saaroni oku ’doa yo.

22Eri nga di emvi Yuda vu, nga ’yo tinia, Ma isuni eri ku; ’ba pari ndea ’diyi ’yo vini indi kini, Oku saaruni oku ’doa yo.

23Yuda nga ’yo ra, Le te ma ’du afa nde i ma afaru, ama kazu drinza isuzu ku; mi ndre, ma pe ndriamva ’diri ma ti ra, te mi isuni eri ku.

24Eri nga eca ’dini, ka ca mba nale ’ba olu Yuda ma tia kini, Mi zia Tamari ofu mile aci be, azini vini mi ndre, ti mva aliru ’bo. Yuda nga ’yo ra, Emi eji eri ’doa, ma eve eri acisi.

25Yi ka eri ofu amve ’bo, eri pe ’ba ti anyi vu, kini, Mva ma aliari afa ’diyi ma e’ini. Eri nga ’yo ra, Mi ini nga,ma zi mi fo, afa ’diyi, driadriamva ecetaruri pi baku pie kali pie, bani yi a’dini ya?

26Yuda nga afa nde a’i ra, nga ’yo ra, Eri ma e’yo kilili aga mani ra, mani eri fele ma mvi Sela dri kurisi. Asini la erisi dika ku.

27Eri nga eca ’dini, o’du mvaazoni eri e’duzurisi, mi ndre, anzi yi ejoru eri ma opojoa.

28Eri nga eca ’dini, erini nga osiria, mva aluri ega dri esu amve; oku eri osipiri nga baka ekaru ’du a’di eri ma dria, kini, Mva ’diri efu okoni.

29Te eri nga eca ’dini, eri ka i dri se vile ’bo, mi ndre, adripi osi ra; eri nga ’yo ra, Mi asi pari mi dri okposi ’dini a’disi ya? ’Da runi ani Perezi’i.

30Eri ma adri baka ekaru be driari nga osi vileru, ’da eri ma ru Zera’i.

← Chapter 37 Jump to: Chapter 39 →