Genesis 19

Lugbara (E’yo Siza Alatararu Munguniri BIBLIA)

← Chapter 18 Jump to: Chapter 20 →

1Malaika iri nga eca Sodomua ondresi; de Loti ri Sodomu ma kali tilea. Loti ka yi ndre ra, eri nga enga uru muzu dri fuzu yi be, Zeri nga avu va o’bukuru nyakua,

2nga ’yo ra, Emi ndre, opi mani la, emi oja emi ’doleru, ma zi emi tia, emi fi ati’bo emini ma joa, emi la ini ’dorisi ’doa, emi pa ojizu; emi nga di enga o’bitisi drio muzu emi geria ndo. Te yi nga ’yo ra, ’Dini yo, te ama nga te amve ini be ra.

3Eri nga yi omi okposi; yi nga yi oja eri vu fizu eri ma joa; eri nga omu ’ba yi dri, nga mikate akufi kokoru ozo, yi nga nya ra.

4Te de nga yi lani ku, ’ba aku ndea ’diyi, ada yi ’ba Sodomua ’diyi, nga jo ace kuru, yi ’ba dria engapi kala dria ma alia ’diyi, karile piyi ’ba ’wara pie dria;

5yi nga Lotini omve, nga ’yo tinia, ’Ba emupi mi vu ini ’dosi ’diyi yi ngoa ya? Mi ofu yi amve, ama ma ni yi beni.

6Loti nga efu amve yi vu jotilea, nga jotile opi i vutia ci,

7nga ’yo ra, Ma zi emi tia matusi, ma adripi, emi ma ’ye onzi ’dini ku.

8Mi ndre, ma ovu ezoanzi agupi nipi ku ’diyi be iri; ma zi emi tia, emi ku ma ofu yi emi vu, emi ma ’ye yi ekile emini lelerile; te emi ma ’ye ’ba ’diyi aluni ku, yini efile karia mani ma etia ’borisi.

9Te yi nga ’yo ra, Mi,da mi ’doa ra! Nga ’yo vini, Agu ’diri emu ndra ’ani’boru, le vini i ’ba amboru e’yo lizu! Ama nga mi ’ye onzi aga ’ba nde ’diyi ra curu’do. Yi nga eri omi ci, ada yi omi Lotini okposi, nga yi osi ogogo jotile nyozu.

10Te ’ba nde nga yi ma dri eju, nga Lotini ese yi vu joa, nga jotile opi ci.

11Yi nga ’ba ovupi jotilea ’diyi ma mile ofu ra, ma ndre angu ku beni, ’ba were ’diyi pi ’ba ’wara pie dria, ’dini yi nga ande oye jotile ndazu.

12’Ba nde yi nga ’yo Loti ma tia, ’Ba mini azini ’dia indi ya? Mi ezopi ma agupi piyi, agianzi mini pie, ezoanzi mini pie, ’ba mini azini aku ’dori ma alia ’diyi pie dria, mi ma ofu yi pari ’doriarisi ra;

13a’disiku ama nga pari ’dori ma dri ja ra, yi ma awuni cale amboru tu Yehova ma miliarisi, azini Yehovani ama ti epele drini jazurisi.

14Loti nga di fu amve e’yo ’yozu ’ba e’dopi i ma ezopi jepi ’diyi ma tia, nga ’yo kini, Emi enga uru, emi fu pari ’doriarisi ra; Yehovani ngale aku ’dori ma dri jalerisi. Te eri e’da ’ba ezoanzi erini jepi ’diyi milia ’ba aparaka ’yepirile.

15Etuni efuria o’bitisi, malaika nga Lotini ari kini, Mi enga, mi ’du loku mini pi ezoanzi mini iri ovupi indi ’doa ’diyi be, mi fu, mi kazu dri jazu e’yo onzi aku ’dorini be tualu ku.

16Te eri nga i dri ici ’dani; ’dini ’ba nde nga yi ma dri obi, oku pie, ezoanzi erini pie dria, Yehovani ovuria yikisi eri vu, yi nga eri ofu amve, nga eri ’ba aku ma tia amveleru.

17Te eri nga eca ’dini, yi ka yi ofu amve ’bo, eri nga ’yo, Mi apa mi idri pazu; mi lu vile mi ngukualeru ku, mi ma te Angu Dalakaru ma alia dria ku; mi ma apa oni dria, mi kazu dri jazu ku.

18Te Loti nga ’yo yi tia, Te di, opi mani, ’dini yo;

19mi ndre, ati’bo mini isu asi ndriza mi milia ’bo, te mi ’ba yiki mini, mini ecele ma dri mini ma idri pazuri, amboru tu; ma econi apa oni dria ku, e’yo onzi kazu ma isuzu ’dale, mani ani drazu ku.

20Te mi ndre, aku ’dori eri ogogo apazu vunia, eri werearu tu. Kirikiri mi fe ma apa ’dale foeri ovuni werearu ku ya? ma orindini nga ovu idriru ani.

21Eri nga ’yo eri tia, Mi ndre, ma a’i vini mi e’yo ’dirisi ’bo indi, ’dini ma ngani aku mini e’yoni ’yole ’diri ogu va ku.

22Mi ’ye mbele mbele, mi apa ’dale; a’disiku ma econi afa azini ’yezaru ku de nga mi cani ’dale ku. ’Da aku nde ma ru Zoari’i ani.

23Isu de etu tu ’bua nyaku dria ’bo, Lotini ecazu Zoariarisi.

24Yehova nga di kibiriti pi fe aci be ’dizu Sodomu pi ma dria Gomora be, engazu Yehova vu ’bua;

25eri nga aku ’dayi ogu ra, Angu Dalakaruri dria pie, ’ba dria aku nde ’dia ’diyi pie, afa idiza nyakuari pie dria.

26Te oku erini eri ma vutia nga di lu vile, nga ofu ani pati idiale a’iru.

27Iburahimu nga fu o’bitisi drio mu pari ndra erini pa sozu Yehova ma driliaria;

28eri nga lu angu Sodomu pi vuleru Gomora be, Angu dria Dalakaruri pie dria, eri nga ndre ra, te mi ne, angu nde ma acika tu uru acika aci eja odrozanirile.

29Te eri nga eca ’dini, Mungu ka ndra aku Angu Dalakaruria ’diyi dri ja ra, Mungu ega Iburahimu ma e’yo ra, pe Loti ma ti fuzu dri jaza nde ma aliarisi, o’du erini ndra aku Lotini ovuzu alenia ’diyi ma dri jazurisi.

30Loti nga fu Zoariarisi, nga tu oni dria, nga ovu ’daa ezopi iri ’diyi be, erini rule ovuzu Zoariarisi; eri nga ovu oni gule ma alia, eri’i ezopi iri ’diyi be.

31Zamva osipi okori nga di ’yo wereri ma tia kini, Ama atini ’ba dezani, azini vini agupi aluni nyakua ngapi fipi ama vu ekile ’ba nyakua ’diyi driani ’yelerileni yo.

32Ama mu, ama fe ama atini patiefi ma su mvuzu, ama ma la eri be ani, ama ma mba ama ori ma ta ama ati dri.

33Yi nga fe yi ma atini patiefi ma su mvuzu ini ’dasi; zamva okori nga di fi la i ati be; te ati nini e’yo erini lazu vari pi engata erini engazu ururi be dria ku.

34Te eri nga eca drusi ’dini, zamva okori nga ’yo wereri ma tia, Mi ndre, ma la ma ati be ini ajerisi ra; ama ma fe eri ma mvu vini patiefi ma su ini ’disi ’dini; mi nga di fi la eri be, ama ma mba ama ori ma ta ama atisi.

35Yi nga di fe yi atini patiefi ma su mvuzu ini ’dasi indi; zamva wereri nga enga fi la eri be; te ati nini e’yo erini lazu vari pi engata erini engazu ururi be ku.

36’Dini Loti ma ezopi isu di ’a yi ma ati be.

37Zamva okori osi mva, nga runi ’da Moabu’i; agu nderi eri suru ’ba Moabuni ma a’biru kpere ecazu o’du andru ’dosi.

38Zamva wereri nga, mva osi agupiani indi, ’da runi Benami’i; agu nderi eri suru ’ba Amonini ma a’biru kpere ecazu o’du andru ’dorisi.

← Chapter 18 Jump to: Chapter 20 →