Genesis 22

Lugbara (E’yo Siza Alatararu Munguniri BIBLIA)

← Chapter 21 Jump to: Chapter 23 →

1Eri nga eca ’dini e’yo ’diyi ma vutia, Mungu nga Iburahimuni o’bi, nga ’yo eri tia, Iburahimu! Eri nga a’i ra, Ma ’do.

2Eri nga ’yo ra, Mi ’du curu’do mvi mini ilipiliru, mini lele avasiri, adani Isaka’i, mi mu angu Moriania, mi fe eri edeta vezaniriru oni ’daa ’diyi ma azi, mani ngale e’yoni olule mi tiari, ma dria.

3Iburahimu nga di ani enga o’biti drio, nga enyi rizuri ’ba akanya erini ma dria, nga karile erini yi ’du iri, mvi Isaka be; eri nga eja osi edeta vezanirini, nga enga ra, nga mu pari Munguni e’yoni olule eri ma tia ’boria.

4O’du narisi Iburahimu nga i ma mile enga uru, nga pari nde ndre re ’dale.

5Iburahimu nga di ’yo karile erini ma tia, Emi te ’doa akanya be; ma’i mva be, ama nga mu ’dale, ama nga Mungu inzi ’dale, ama nga emu emi vu dika ndo.

6Iburahimu nga edeta vezaniri ma eja ’du ’ba mvi Isaka ma dria; eri nga aci pi ’du eli be i ma dria; yi nga mu iri tro tualu.

7Isaka nga ’yo i ati Iburahimu ma tia kini, Ma ati la! Eri nga ’yo ra, Ma ’do, mva mani. Eri ’yo ra, Mi ndre, aci eja be yi ’di; te kabilomva edeta vezaniri ngoa ya?

8Iburahimu nga ’yo ra kini, Mungu ma ngulupini nga kabilomva edeta vezaniri fe ra, mva mani. ’Dini yi iri tro nga mu tualu.

9Yi nga eca pari ndraka Munguni e’yoni olule eri ma tiaria, Iburahimu nga pari edeta edezuri si ’dale, nga eja oti drinia kililiru, nga i mvi Isakani ombe, nga eri ’ba pari edeta edezuri ma dria eja dria.

10Iburahimu nga i dri eju eli ’duzu i mvini lizu.

11Te malaika Yehovani nga eri omve engazu ’bualeru kini, Iburahimu la, Iburahimu la! Eri nga ’yo ra, Ma ’do.

12Eri nga ’yo eri tia, Mi ’ba mi dri mva ma ruaa ku, mi ’ye eri aluni ku; a’disiku ma ni curu’do mi ru Mungu ada, mini mi mvi, mi mvi fiipiliruri, gale fekokoru ma dri kurisi.

13Iburahimu nga i mile enga uru, nga lu ra, te mi ndre, eri ma vutia kabiloago su i ma o’yu jere ma alia kirikiri; Iburahimu nga mu kabiloago nde bi, nga eri ede edeta vezaruriru i mvi ma paria.

14Iburahimu nga pari nde ma ru ’da Yehovayire’i; ekile yini ’yole kpere andrurile, Eri nga ovu fezaru oni Yehovani ma dria ra.

15Malaika Yehovani nga Iburahimuni omve pale iririsi engazu ’bualeru,

16nga ’yo kini, Ma so oyo ma ngulupi ma rusi ’bo, Yehova ’yo ra, mini e’yo ’diri ’yelerisi, mini mi mvi, mi mvi ilipiliruri, gale fekokoru kurisi,

17mani asi ndriza feria ma nga asi ndriza fe mi dri ra, mani feria mini ezuzuria ma nga fe mi orini ezuzu ekile ’bi’bio ’bua ’diyile, ekile cinya miri ma tiarile. Ori mini nga ari’ba yini ma kalitile pa yi ma afaru ra;

18ori mini ma alia, suru dria nyakua ’diyi nga asi ndriza isu, mini ma o’duko erile ’borisi.

19’Dini Iburahimu nga di emvi karile erini vu, yi nga enga ra, nga mu tualu Beerisebaa; Iburahimu nga ovu Beeri-sebaa ’daa.

20Eri nga eca ’dini e’yo ’diyi ma vutia, ’ba nga olu Iburahimuni kini, Mi ndre, Milika oti vini anzi mi adripi Nahori dri ’bo:

21mva erini okori Uzi’i pi, adripi erini Buzi pi, Kemueli Aramu ati pi.

22Kesedi pi, Hazo pi, Pilidasi pi, Yidilafu pi, Betueli pie.

23Betueli nga Rebekani ti. Milika oti anzi ’diyi aro Nahori Iburahimu ma adripi dri.

24Oku erini ati’boruri, runi Reuma’i, eri ti vini Teba pi, Gahamu pi, Tahasi pi, Maaka pie.

← Chapter 21 Jump to: Chapter 23 →