Genesis 50

Lugbara (E’yo Siza Alatararu Munguniri BIBLIA)

← Chapter 49 Jump to:

1Yusufu nga i ’be i ati ma avu dria, wuzu drinia ’mindresi, nga eri ma o’bolo ndru.

2Yusufu nga e’yo azi ati’ba erini ’ba ojouru ’diyi ma tia kini yi ma ede eri ma ati ma avu arosi kazu mazu ku. ’Dini ’ba ojouru ’diyi nga di Israeli ma avu eli arosi ra;

3’ye e’yo nderi o’du kali su, a’disiku a vu efizu arosiri adri o’du nya ’dipi. ’Ba Misirini ’diyi nga eri wu o’du kali aziri.

4O’du eri wuzu ’diyi ka yi de ra, Yusufu nga ’yo ’ba Farau ma joa ’diyi ma tia kini, Ma ka asi ndriza isu emi vu ’bo, ma zi emi tia, emi ’yo e’yo Farau ma bilia kini,

5Ma ati, fe ndra mani oyo sozu kini, Mi ndre, ma nga dra ra; mi ma sa avu mani ’bile mani gale ma dri angu Kananiariuri ma alia. E’yo ’disi ma zi mi tia, mi fe ma tu mu uru ma ati ma avu sazu; te ma nga emvi dika,

6Farau nga ’yo ra, Mi tu uru, mi ati ma avu sazu yi ekile erini fele mi dri oyo sozurile.

7Yusufu nga di tu uru i ati ma avu sazu; ati’ba dria Farauni ’diyi pi nga mueri be tualu, ’ba ’wara eri ma joa ’diyi pie, ’ba ’wara dria angu Misiria ’diyi pie,

8’ba dria Yusufu ma joa ’diyi pie, adripi erini pie, ’ba eri ma ati ma joa ’diyi pie dria; kule vile angu Gosenia ’diyi yi kiri anzi nyirini a’dule, anyapa yini nyiri ’diyi pi ’wara ’diyi be.

9’Ba nzupi magalisi ’diyi pi, ’ba tupi akanya dria ’diyi be, nga tu mu eri be indi; yi ’ba ongulumuru karakarau ’tu.

10Yi nga ca akuma anya cozu Atadini Yoridania ’aa’dasiria, yi nga, awu owu ’dale wuta amboru candi be turisi; eri nga i atini owu o’du aziri.

11’Ba angu e’ipi ’ba Kanania ’diyi ka wuta akuma Atadiniari ndre ra, yi nga ’yo ra, ’Di ’ba Misiria ’diyi ma awu candiru turi’i; nga di angu nde ma ru ’da Abeli-miziraimu’i; angu nderi Yoridania ’aa’dasi.

12Anzi erini ’ye eri vu ekile erini azile yi tiarile;

13a’disiku anzi erini, nga eri ma avu ’du ji angu Kanania, nga eri sa oni gule amvu Makipelaa, ndra Iburahimuni jele awitaru amvu be tualu pari ’ba avu sazuriru Efironi ’ba Hetini dri Mamire ma driliaria.

14Yusufu nga di mvi Misiria, ka de i ati ma avu sazu ’bo, eri’i, adripi erini pie, ’ba dria tupi mupi eri be eri ma ati ma avu sazu ’diyi be.

15Yusufu ma adripi ka ndre yi ma ati dra ’bo, yi ’yo ra, Kani Yusufuni nga ama ngu onzi, nga e’yo onzi dria ndra amani ’yele i vu ma arioti dria ofe ama ruaa yani,

16Yi nga e’yo ti pe Yusufu vu ani kini, Mi ati azi e’yo de nga eri drani ku, kini,

17Emi ma ’yo Yusufu ma tia ’dini, kini, Ma zi mi tia, mi ma wu mi adripi ma e’yo onzi pi ezata yini be, yini ’yele onzi mi vurisi. Te di curu’do, ama zi mi tia, mi wu Mungu mi atiniri ma ati’ba ma ezata fo! Yusufu nga wu mindresi, yini e’yo ’diri ’yoria eri tia.

18Eri ma adripi nga vini mu yi eco va eri ma milia, yi nga ’yo ra, mi ndre, ama ati’ba mini,

19Yusufu nga ’yo yi tia, Emi ru ku; ma Munguni ya?

20Te emi’iruni, emi ega ndra ma ’yezu onzi; te Mungu ega e’yo ’yezu onyiru, e’yoni ecazu ekile andrurile, ’ba kakau ta mbazu idriru.

21Te di curu’do emi ru ku; ma nga nyaka fe emi dri, anzi emini nyiri ’diyi be. Eri nga ani yi ma asi omi, nga e’yo ’yo yi be asi ndrizasi.

22Yusufu ri Misiria, eri’i ’ba i ati ma joa ’diyi be dria; Yusufu ma eli ca ndra turu alu drini mudri.

23Yusufu nga Efiraimu ma anzi ndre cazu kpere a’bianzi na; osi vini Makiri Manase mvi ma anzi Yusufu ma li dria,

24Yusufu nga ’yo i adripi ma tia, Ma ’ye dra dra; te Munguni nga emi andri ada ada, nga emi ofu angu ’dori ma aliasi, emi ofizu angu andra erini oyo sozu fezu Iburahimu pi dri, Isaka pie, Yakobo pieria.

25Yusufu nga fe Israeli anzipini ma so oyo ci, kini, Munguni nga emi andri ada ada, emi nga fala mani o’du ’doarisi ji ’dale ra.

26’Dini Yusufu nga dra ra, de eri eli be turu alu drini mudri; yi nga eri ma avu efi arosi, nga eri ’ba sanduku ’ba,avu sazuri ma alia Misiria.

← Chapter 49 Jump to: