Genesis 30

Lugbara (E’yo Siza Alatararu Munguniri BIBLIA)

← Chapter 29 Jump to: Chapter 31 →

1Rakeli ka ndre i tini anzi Yakobo dri ku, Rakeli ovu di a’yasi i amvi be; nga ’yo Yakobo ma tia, Mi fe anzi ma dri fo, kani ku ma ma dra ra.

2Yakobo nga ani ovu aokosi Rakeli be, eri nga ’yo ra, Ma Munguni, ori ogapi mi dri tikokorusiri’i ya?

3Eri nga ’yo ra, Mi ndre zamva mani ati’boru Bilani; mi fi eri vu, eri ma oti anzi mani bizaru dria, ma ma ovu vini ani anzi be erisi beni.

4Eri nga Bila zamva ini ati’boruri fe eri dri okuru; Yakobo nga di fi eri vu,

5Bila nga mva isu i ma alia, nga agupimva ti Yakobo dri.

6Rakeli nga ’yo ra,Mungu li e’yo mani ’bo, eri eri o’duko mani indi, eri fe agimva ma dri ’do; e’yo ’disi ’da ani runi Dani’i.

7Bila zamva Rakelini ati’boruri nga mva isu dika, nga vini mva azini ti Yakobo dri.

8Rakeli nga ’yo ra, Ma ’ba a’ya ma amvi be afusi okporu, ma nde di eri ra; nga ani runi ’da Nafutali’i.

9Lea ka di ndre eri asi anzi tizu ’bo, eri nga zamva ini ati’boru Zilipani ’du fe Yakobo dri okuru.

10Zilipa zamva ati’boru Leaniri nga agupimva ti Yakobo dri.

11Lea: nga ’yo ra, ’Di drilebani! nga ani runi ’da Gadi’i,

12Zilipa zamva ati’boru Leaniri nga vini mva azini ti Yakobo dri.

13Lea nga ’yo ra,Ma di ayiko be! Ezoanzini ngale ma omvele ayikoru’irisi; ’cia ani runi i Aseri’i.

14Rubeni fu mu, ewu ’bani nganu lozurisi, nga olianziri agofukuru isu amvua, nga yi eji i andri Lea dri. Rakeli nga ’yo ani Lea ma tia, Ma zi mi tia, mi fe mi mvi ma agofuku ma azi ma dri.

15Eri nga ’yo eri tia, Mini ma agupi pazu rari mi milia eri e’yo wereni ya? Mi le ma mvi ma agofuku pa indi ya? Te Rakeli ’yo te kini, E’yo ’disi eri nga la mi be ani ini ’dirisi, mi mvi ma agofukusi beni.

16Yakobo nga ibi emvi amvuarisi ondresi, Lea nga fu mu dri fu eri be, nga ’yo ra, Mi ma fi ma vu; mani mi jele ada mi dri esezu ma mvi ma agofukusirisi. Eri nga la eri vu ini ’dasi

17Mungu eri e’yo Leani ra, eri nga mva isu i ma alia, nga agupimva towiri ti Yakobo dri.

18Lea ’yo ra, Mungu ofe oya mani ’bo, mani ma zamva ati’boruri fele ma agupi dririsi; nga ani runi ’da Isakari’i!

19Lea nga vini mva isu dika, nga agupimva aziari ti Yakobo dri.

20Lea ’yo ra, Mungu fe lonyi ma dri onyiru tu; agupi mani nga adri ma be curu’do, mani agianzi otile eri dri aziarisi; nga ani runi ’da Zebuloni’i,

21Vutinia eri nga zamva ti ra, nga runi ’da Dina’i.

22Te Mungu nga vini Rakeli ma e’yo ega ra, Mungu nga bile co eri vu, nga eri ma opojo zi mva tizu.

23Eri nga mva isu i ma alia, nga agupimva ti, nga ’yo ra, Mungu nze drinza mani ’bo;

24eri nga eri ma ru ’da Yusufu’i, ’yozu kini, Yehova ma o’ba mva azini ma dri indi fo!

25Te eri nga eca ’dini Rakelini Yusufuni tizu ’borisi, Yakobo nga ’yo Labani ma tia, Mi fe geri ma dri mvizu ma vile paria, ama vile angua.

26Mi fe ma dri oku mani ’diyi pi anzi mani be, mani azi ngale mi dri yi ma e’yosi ’diyi, mi ku ma ma mu; mini azi mani ngale mi dri ’bori nile rarisi.

27Labani nga ’yo eri tia, Mi ka ovu asi ndrizasi ma vu, mi te nga ani ’doa; mani nile andrisi kini Yehova fe asi ndriza ma dri e’yo minisi rarisi.

28Eri nga ’yo ra, Mi li oya mini mini leleri ma dri, ma nga fe ra.

29Eri nga ’yo eri tia, Mi ni azi mani ngale mi driri pi, e’yo anyapa minini ovuzu ma vu onyiruri be ra.

30A’disiku de nga mani ecaria ku, mi ovu anyapa be were toko, te curu’do yi ezu o’biru ’bo; azini Yehova fe asi ndriza mi dri pari dria mani ma ojazu muzuria. Te ma nga di afa oku ’ba ma vile joa ’diyi dri indi a’dungari ya?

31Eri nga ’yo ra, Ma nga di mi dri a’di afa fe ya? Yakobo nga ’yo ra, Mi ngani afa fe ma dri aluni ku; te mi ka e’yo ’diri ’ye ma dri, ma nga anyapa mini ongulumuru ’diyi oce dika, ma nga yi ta mba ra:

32ma nga aga kabilo mini ongulumuru ’diyi ma eselesi dria andru, kabilo dria wura be nyunyuru ’diyi pi opezu kabilo lokoberu ’diyi pie, kabilo dria iniru ’diyi pie, azini ndri ma eselia ma nga lokobe ’diyi pi ope nyunyuru ’diyi be; anyapa ’dinile ’diyi nga ovu oya maniru.

33Ka’dini e’yo mani kililiruri nga ma e’yo eti nze ceni etu drozirisi, mi ka nga emu oya mani ovupi mi miliari ma e’yo ndazuria. Ndri ma eselia anyapa dria ovupi nyunyuru ku ’diyi pi, kani lokoberu ku ’diyi pie, azini kabilo eselia iniru ’diyi dria, mi ka nga yi isu ma be ci, yi ma ovu lazaru ekile afa ’bani ogule ’diyile.

34Labani nga di ’yo kini, Awa’dini! ’Yeke, ma ovu mini ’yolerile,

35Etu ’dasi Labani nga ndriago wura olizaru ’diyi pi onze dria lokoberu ’diyi be, ndriaroni wura be nyunyuru ’diyi pi, lokoberu ’diyi be, anyapa dria rua emve be emve be ’diyi pie, kabilo dria iniru ’diyi pie dria, nga yi fe ocezu anzipiyi dri;

36nga i ma esele co Yakobo be acita o’du pale nanile; Yakobo nga di anyapa Labanini ma joloko acepi ’diyi oce’i,

37Yakobo nga di masa pati pi ma arakala ede kaliru, pati alimanderuri pie, lokoroji pie, nga yi ma o’boko oli emvesi inisi, nga fe zani emveru kali nde ma ruaa ’diyi ma e’da ce,

38Eri nga kali nde erini o’bokoni olile ’bo ’diyi osu anyapa ma drilia, yi geri pari ’bani yi osuzuria ’diyi ma alia, pari nde anyapa ongulumuruni adrizu emuzu yi mvuzuria; de isu yi adri emu amva anzi tizu yini emuria yi mvuria ’ada.

39Anyapa nga yi amva kali nde ’diyi ma drilia, anyapa nde nga ani anzi oti wura be olizaru azini nyunyuru azini lokobero.

40Yakobo nga kabiloanzi ope, nga anyapa ma mile oja kabilo wura be olizaru ’diyi pi vu kabilo dria iniru anyapa ongulumuru Labanini ma eselia ’diyi be; te eri nga anyapa i vile ongulumuru ’diyi o’ba ndu, ’bani yi anyapa ongulumuru Labani vile ’diyi be tualu ku.

41Te eri nga eca ’dini anyapa okpo be tu ’diyi ka anzi oti, Yakobo nga kali osu yi drilia yi geri nde ma alia, yi ma amva yi anzi tizu kali nde ma eselesi beni,

42te anyapa ka ovu okpo kokoru eri osuni di kali ku; ’dini kabilo okpo kokoru ’diyi Labanini, te okporu tu ’diyi Yakoboni.

43Agu nde fu afa e’iru tu aga ra, eri ovu di anyapa be o’biru tu, ati’ba ezoanziru ’diyi pie, agupiru ’diyi pie, ngamia pie, akanya pie dria.

← Chapter 29 Jump to: Chapter 31 →