Genesis 25

Lugbara (E’yo Siza Alatararu Munguniri BIBLIA)

← Chapter 24 Jump to: Chapter 26 →

1Iburahimu nga oku azini je runi Ketura’i.

2Eri nga Zimirani pi oti eri dri, Yokisani pie, Medani pie, Midiani pie, Isibaki pie, Sua pie.

3Yokisani nga Seba pi oti Dedani be. Anzi Dedanini yi ’ba Asurini piyi, ’ba Letusini pie, ’ba Leumini pie.

4Anzi Midianini yi Efa pi, Eferi pi, Hanoki pi, Abida pi, Elidaa pie. ’Diyi dria anzi Keturani.

5Iburahimu fe afa dria erini ovuzu yi be ’diyi Isaka dri.

6Te oku ati’baru Iburahimuni bile ’diyi ma anzi dri, Iburahimu nga afa feza ofe, nga yi ma ti pe eri ma mvi Isaka vurisi re, de nga erini ovuria idriru, muzu a’iyoaleru kpere angu kala etuni efurialeruria.

7O’du eli Iburahimuni ovuzu idriru ’diyini yi ’di, eli turu alu drini kali aziri drini towi.

8Iburahimu ma ava fu ra, eri nga dra ra, de eri de fu dri ci, eri ’ba dezani eli be kakau, nga di mu ’ba ini odrapi ’bo ’diyi vu.

9Anzi erini Isaka pi Isimaeli be nga eri ma avu sa oni gule Makipelani, amvu Efironi Zohari ’ba Hitini ma mvini ovupi Mamire ma driliari ma alia,

10amvu nde Iburahimuni jele anzi Hetini driri’i. Yi sa Iburahimu ma avu ’dale oku erini Sara be.

11Eri nga eca ’dini, Iburahimu ka dra ’bo, Mungu nga asi ndriza fe mvi erini Isaka dri. Isaka ovu Beerilahai-roja.

12Isimaeli Iburahimu mvi, Hagari Misiri ezoru Sara ma zamva ati’boruni tile Iburahimu driri ma a’bianzi yi ’di.

13Anzi Isimaelini ru yini vusi, azini a’bianzi yini vusi, yi ’di: Isimaeli ma mva okori Nebayoti’i; Kedari pi, Adibeeli pi, Mibisamu pi,

14Misima pi, Duma pi, Masa pi.

15Hadadi pi, Tema pi, Yeturi pi. Nafisi pi, Kedema pie.

16Anzi Isimaelini yi ’dini, yi ma ru ’diyi’i, aku yini vusi azini hema asoza yini vusi yi opi mudri drini iri suru yini vusi.

17(Eli Isimaelini ovuzu idriru ’diyi yi ’di, eli turu alu drini kali oa drini aziri; avani fu ra dra ra, mu ’ba erini odrapi ’bo ’diyi vu.)

18Yi nga adri engazu Havilaa kpere Suri Misiri ma driliaria, mini muria Asuriaaleru; eri adri ndra i adripi dria ma milia ’aa’daleru.

19A’bianzi Isaka Iburahimu mvini yi ’di: Iburahimu ti Isaka’i.

20Isaka ma eli ka ca kali su ’bo, eri nga Rebeka Betueli ’ba Suriani Padani-aramuari ma zi, amvipi Labani ’ba Suriani, je eri ma okufu,

21Isaka nga matu ’ba Yehova vu oku erini ma e’yosi, erini ovule ondorurisi; Yehova nga matu erini ’baleri eri ra, oku erini Rebeka nga mva isu i ma alia ra.

22Anzi nga ri afu fu eri ma alia; eri nga ’yo ra, Ka ovu ’dini, ma ovu idriru a’disi ya? Eri nga mu e’yo zi Yehova vu,

23Yehova nga ’yo eri tia, Suru iri ovu opojo mini alia, suru iri nga yi esele co ndu ndu kpere engazu mi alia; suru aluri nga ovu okpo be aga suru aziniri ra, mva amboru nga azi nga wereri dri.

24O’du erini mva osizuri ka eca ’bo mi ndre, anzi ejuru ovu eri ma alia.

25Mva okori nga efu ekaru, eri ma rua dria ekile bongo ’biko berile; yi nga runi ’da Esau’i.

26Vutinia adripi erini nga efu ra, de eri ma dri bi Esau ma paedu ci; ’da runi Yakobo’i. Isakani de ’dasi eli kali azia, okuni anzi osiria

27Anzi nde nga zo ra; Esau eri ’ba za gbipi onduasi, ’ba ’a’api aseariru, te Yakoboni ’ba e’yereni ’a’api hemaari’i.

28Te Isaka le Esauni erini za erini gbileri nyalerisi; te Rebeka le ini Yakobo’i.

29Yakoboni de enyasa tibi a’di; Esau nga eca asearisi, ’ye ebi abirisi.

30Esau nga ’yo Yakobo tia, Mi fe mbe tibi mini ekaru awa’dari, ma zi mi tia; ma ebi abirisi ’do. (E’yo ’disi ’da runi Edomu’i.)

31Yakobo nga ’yo ra, Mi fe e’yo mini Ovuzu karimvaruri jema driraka.

32Esau nga ’yo ra, Mi ndre, ma ’ye dra abirisi cucuru’do; e’yo mani ovuzu karimvaruri nga di ma aza ko ngoni ngoni ya?

33Yakobo nga ’yo ra, Mi so oyo ma be raka. Eri nga oyo so eri be ra, eri nga di e’yo erini ovuzu karimvaruri fe je Yakobo dri ani.

34Yakobo nga di mikate fe Esau dri tibi osu nyirikia ajira be, eri nga nya ra, nga mvu ra, nga di enga mu i ma geria ndo. ’Dini Esau nga di e’yo erini ovuzu karimvaruri ’ba aparakaru.

← Chapter 24 Jump to: Chapter 26 →