Genesis 42

Lugbara (E’yo Siza Alatararu Munguniri BIBLIA)

← Chapter 41 Jump to: Chapter 43 →

1Te Yakobo nga ndre kini nyaka indi Misiria, Yakobo nga ’yo anzipi ini ma tia, Emi emi one one ’dini a’disi ya?

2Eri nga ’yo ra, Mi ndre, ma eri kini nyaka indi Misiria; emi si mu bani nyaka je ’dale, ama ma ovu di idriru, ama; kazu muzu odrazu ku beni.

3Yusufu adripi mudri nga di si mu nyaka je Misiria ani.

4Te Yakobo peni Benyamini Yusufu ma adri ma ti adripi ’diyi be tualu ku, erini ’yole, E’yo onzi kazu muzu eri ’yezu ku-risi.

5’Dini anzi Israelini emu nyaka jezu ’ba emupi ’diyi ma eselia, likini ovule angu Kananiniarisi.

6Yusufu ovu angu ma drilia govenaru; eri adri nyaka fe je ’ba angu ndea ’diyi drini, Adripi Yusufuni nga emu, nga avu kumutisi dri eluzu va eri inzizu.

7Te Yusufu nga i adripi ndre, nga yi ni fa, te eri nga i oja yi vu ’ba tokole, ri e’yo ’yo yi dria okposi. Eri ’yo yi tia, Emi enga ngoa ya? Yi ’yo ra, Ama enga angu Kananiaria emuzu nyaka jezu ’doa.

8Isu Yusufu ni i ma adripiyi ra, te yi’ini nini eri ku.

9Yusufu nga orobi ndra i obipi yi ma e’yosi ’diyi ma e’yo ega ra; nga ’yo yi tia, Emi ’ba angu ma orile gapi ’diyi, emi emu angu ’dori ma alio ndre.

10Yi nga ’yo eri tia, ’Dini ku, opi amani la, te ati’ba mini ’diyi eca nyaka jezu fo!

11Ama dria ’ba alu ma anzi, ama ’ba adani, ati’ba mini ovuni ’ba angu ma orile gapi ’diyi ku fo!

12Te eri nga ’yo yi tia, Inzoni, emi emu lu angu ’diri ma alio ndre.

13Te yi ’yo ra, Ama’i ati’ba mini, ama adripiru mudri drini iri, ’ba alu angu Kananiniari ma anzi; te mi ndre, mva wereari eri andru ama ati vu ’dale, te aluri yo.

14Te Yusufu nga ’yo yi tia, E’yo te mani ’yole emi tia kini, Emi emu i angu ma orile gazu-ri, eri bani ’di.

15Yi nga emi o’bi geri ’disi; Farau’i! emi ngani fu ’dosi ku,denga emi adri wereari ecani ’doa ku.

16Emi pe ’ba alu emi eseliani ma ti, eri ma eji emi adrini, te emi nga te aruru ’doa, ’ba ma o’bi e’yo emini ’yoleri beni, kani e’yo adaru emi alia ci yani; ka ku, Farau’i! emi ’ba angu ma orile gapi ’diyi ada.

17Eri nga yi dria ombe arujoa o’du na.

18Yusufu nga ’yo yi tia o’du narisi, Emi ma ’ye ’dini, emi ma ovu di idriru beni, mani Mungu rulerisi:

19emi ka ovu ’ba adaru ’diyi, ’ba ma ombe emi adri aluni emi eseliari kuzu arujoa ’de, te emi mu nyaka ji labiri emi vile akua ’diyi ma e’yosi,

20te emi eji emi adri wereari ma vu; ’dini ’ba nga ni e’yo emini ’yoleri eri adaru ani, emi ngani odra ku beni. Yi nga ’ye ’dini.

21Yi nga ’yo yi ma eselia, Ada ada, e’yo nde ama, ama adri ma e’yosi, a’disiku ama ndre ndra candi eri ma asiari ra, erini ndra matu ’baria ama vu, te ama erini ndra ku; ocoko ’diri eca ama Tuaa ani.

22Rubeni nga e’yo omvi yi tia kini, Ma ’yoni ndra emi ria kini, Emi ma ’ye onzi mva vu ku, ’dini ku ya? Te emi erini ku, E’yo ’disi, mi ndre, le di eri ma avuari ofe ama ruaa.

23Te yi vani kini Yusufu ni yi ma ti ra ’dini ku, ’ba ti ojapirini ovule yi ma eselia indirisi,

24Eri nga nguku oja yi vualeru, nga wu mindresi; nga di emvi yi vu ndo, nga e’yo ’yo yi be, nga Simeonini ’du yi ma eselia, oti, va yi ma milia ’de.

25Yusufu nga ’di azi kini ma to nyaka afazu yini ma alia tre tre, ma omvi ’ba dria alu alu ma silingi gunia ini ma alia vile, ma fe vini yi dri nyaka nyale geriari indi, nga ’ye yi dri ’dini,

26Yi nga di nyaka yini o’ba akanya yini ma dria, nga di dri ko ’darisi ra.

27Te ’ba alu yi ma eselia ka i ma gunia ma ti zi, lezu myaka fezu akanya ini dri pari yini lazuria, eri nga i ma silingi ndre ra; te mi ndre, eri oyu va gunia ma tia ogogo.

28Eri nga ’yo i adripi ma tia, Omvi ma silingi ’bo; eri va gunia ma tia ’do! Yi ma asi nga oti tu, yi nga yi oja rua yaza be yi agyi vu, kini, E’yo Munguni ’yele ama be ’doni ’dori ngoni ya?

29Yi nga ca yi ati Yakobo vu angu Kananiaria, nga e’yo dria yi ’yepi yi vu ’diyi olu eri tia, kini,

30Agu nde opiru angu nde ma driliari ’yo e’yo ama be ti okporu, ega kini ama ’ba angu nde ma orile gapi ’diyi.

31Te ama ’yo eri tia, Ama ’ba adani, ama ovuni ’ba angu ma orile gapi ’diyi ku;

32ama mudri drini iri adripiru, ama ata alu ma anzi; aluri yo, mva wereri ovu andru ama ati be angu Kanania.

33Agu nde opiru angu nde ma ’driliari nga ’yo ama tia, Ma nga ni emi ’ba adaru geri ’disi, emi ku emi adri alu emi eseliari ma be, emi ’du nyaka ji ’ba emi vile akua ’diyi dri abirisi, emi mu emi geria.

34Te emi ma eji emi adri wereari ma vu; ma nga ani ni emi ’ba angu ma orile gapi ’diyiru ku beni, te emi ’ba adaru, ’dini ma nga emi adrini omvi emi dri, emi nga ani afa oje angu ’dori ma alia.

35Te eri nga eca ’dini, yi ka: nyaka onze yi ma guniarisi, mi ndre, silingi ’ba dria alu aluni ombele ’diyi ovu gunia yini ma alia ci; yi yi ati pie, ka silingi ombele ’diyi ndre ra, yi ovu urisi.

36Yi ati Yakobo nga ’yo yi tia, Emi fe ma ovu anzi kokoru; Yusufuni yo, Simeonini yo, emi le vini Benyaminini ji ’dale indi; candi ’diyi dria ma dria.

37Rubeni nga di ’yo i ati ma tia kini, Mi ma ofu anzi mani iri ’diyi ra, ma ka nga eri omvi mi vu dika kuria; mi fe eri ma dri, ma nga eri omvi mi vu dika ma’i.

38Eri ’yo ra, Ma mvi ngani si emi be ’dale ku; eri ma adrini drale ’borisi, ace eri’i a’dule. E’yo onzi ka eri ’ye geri emini muzuria, emi nga di ma se ozoforo ma driari be ’bilia candi be emi’i.

← Chapter 41 Jump to: Chapter 43 →