Leviticus 14 — Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha lehˬ, hkiˬ tu‸ a naˍ mehˉ kʼai peuˬ ve chaw teˇ gʼaˇ da‸ tuˬ kehˬ tuˬ hkʼaˬ hkʼe gʼa te cawˇ ve awˬ lawn chi teˇ hpaˍ Moˉseˍ hta‸ kʼoˆ piˇ ve yoˬ.

2Hkiˬ tu‸ a naˍ mehˉ kʼai peuˬ ve chaw teˇ gʼaˇ hta‸ paw hkuˇ geh gʼa shiˍ kʼai piˇ ve yoˬ.

3Paw hkuˇ lehˬ, chaw oˇ ve hta‸ fa la awˬ baˬ hpawˇ lo shiˍ kʼai leh, gʼa chaˬ nyi ve yoˬ. Hkiˬ tu‸ a naˍ mehˉ kʼai peuˬ ve kʼo,

4paw hkuˇ lehˬ chaw oˇ ve hta‸ da‸ kehˬ ve ngaˆ nyiˇ hkeh, htawˇ baˉ teˇ maˬ, nyiˉ-ehˍ ve aˉ caˆ hkeh teˇ caˆ leh huˇsoˆ teh‸ kʼoˆ ve suhˆ kʼaˉ teˇ maˬ gʼa yuˬ veu laˇ tcuh ve yoˬ.

5Paw hkuˇ lehˬ, ngaˆ ehˉ hta‸ iˉ kaˆ keu taˍ ve je‸ muˬ hkʼu hkʼoˆ teh leh gʼa tiˇ pehˍ ve yoˬ.

6Yawˇ lehˬ awˬ nu ve ngaˆ teˇ hkeh hta‸ yuˬ leh, htawˇ baˉ, nyiˉ-ehˍ ve aˉ caˆ hkeh, leh huˇsoˆ awˬ hpa‸ geh teˇ geh awˬ suhˍ oˇ ve hkʼaw gʼa tuˍ keu ve yoˬ.

7Oˇ hkʼe te peuˬ hkʼaw‸ nawˉ, yawˇ lehˬ hkiˬ tu‸ a naˍ na-e la peuˬ ve chaw oˇ ve hta‸ suhˍ pawˆ hkʼa gaˬ gʼa hpeh‸ pfuhˍ piˇ leh, yawˇ kʼaw‸ da‸ la peuˬ ve awˬ lawn gʼa kʼoˆ maˍ piˇ ve yoˬ. Yawˇ lehˬ te‸ chehˇ ve ngaˆ oˇ ve hta‸ gʼa hpehˇ peu ve yoˬ.

8Chaw oˇ ve lehˬ, yawˇ veu‸ deh taˍ ve veu‸ kʼaˇ hta‸ gʼa tsuhˇ baˬ leh oˉ kʼoˍ gʼa nuˆ ve yoˬ. Peuˬ hkʼaw‸ nawˉ, iˉ kaˆ gʼa hehˉ ve yoˬ. Oˇ hkʼe te peuˬ kʼo, yawˇ kʼaw‸ da‸ kehˬ la leh, fa la lo kʼaw‸ kʼo‸-e hpeh‸ ve yoˬ. Ya‸ hkʼaˇ, yawˇ ve yehˬ hkʼaw maˇ gʼa lo‸-e. Yehˬ baˬ lo suhˍ nyi gʼa chehˇ taˍ ve yoˬ.

9Suhˍ nyi teˇ nyi gaˬ htaˇ yawˇ lehˬ uˉ hkeh mvuh, paˇ tcuhˆ, mehˆ mvuh leh awˬ to hkʼoˆ lo cawˬ ve awˬ mvuh hkʼa peu-eˬ hta‸ gʼa chiˇ baˬ ve yoˬ. Yawˇ veu‸ deh taˍ ve veu‸ kʼaˇ hta‸ gʼa kʼehˆ tsuhˇ leh, iˉ kaˆ gʼa kʼaw‸ hehˉ ve yoˬ. Oˇ hkʼe te peuˬ htaˇ heh‸, yawˇ kʼaw‸ da‸ kehˬ la ve yoˬ.

10Hiˉ nyi teˇ nyi gaˬ htaˇ, yawˇ lehˬ yawˬ awˬ paˍ nyiˇ hkeh, te‸ chiˉ awˬ kuiˉ awˬ haiˇ maˇ cawˬ leh teˇ hkʼaw‸ gaˬ peuˬ ve yawˬ awˬ ma teˇ hkeh, shaˍlonˍ chu hkaw‸ taˍ ve caˬ hkʼa meu-e shehˆ panˇ leh shaˍlonˍ chu teˇ kaw bon yehˬ lo gʼa yuˬ kʼai ve yoˬ.

11Paw hkuˇ lehˬ, chaw oˇ ve leh yawˇ yuˬ veu laˇ ve tanˇ tuˬ teˇ hpaˍ hta‸ aˉ po kʼo bon yehˬ yehˬmiˉhpe‸ lo gʼa yuˬ kʼai ve yoˬ.

12Paw hkuˇ lehˬ, yawˬ awˬ paˍ teˇ hkeh leh shaˍlonˍ chu teˇ kaw hta‸ yuˬ leh, Gʼuiˬsha hta‸ kʼaw‸ hkʼaw‸ piˇ ve tanˇ tuˬ gʼa tanˇ piˇ ve yoˬ.

13Yawˇ lehˬ yawˬ ehˉ oˇ ve hta‸ da‸ kehˬ ve chehˇ kuiˬ lo gʼa tiˇ pehˍ ve yoˬ. Awˬ lawn kʼo, Gʼuiˬsha hta‸ kʼaw‸ hkʼaw‸ piˇ ve tanˇ tuˬ htawˇ venˇbaˆ hpehˇ ve tanˇ tuˬ hkʼa shuˍ da‸ kehˬ jaˇ leh, paw hkuˇ teˇ hpaˍ ve caˇ tuˬ hpeh‸ ve yoˬ.

14Paw hkuˇ lehˬ awˬ suhˍ hta‸ yuˬ leh chaw oˇ ve la‸ sha paˉ naˍ paw, la‸ ma peuˍ, leh hkui ma peuˍ hta‸ gʼa shehˆ piˇ ve yoˬ.

15Paw hkuˇ lehˬ shaˍlonˍ chu hta‸ yuˬ leh yawˇ ve la‸mehˍ paˉ la‸ taw kʼaw hkʼaw keu peuˬ hkʼaw‸ nawˉ,

16la‸ sha paˉ ve la‸ naw tuˍ keu leh Gʼuiˬsha mehˆ gʼuˇ suhˍ lo suhˍ pawˆ hkʼa gaˬ gʼa hpeh‸ pfuhˍ piˇ ve yoˬ.

17Oˇ hkʼe te peuˬ hkʼaw‸ nawˉ, yawˇ lehˬ yawˇ ve la‸ taw kʼaw hkʼaw cawˬ ve shaˍlonˍ chu leh awˬ suhˍ hta‸ yuˬ leh, chaw oˇ ve hpaˇ ve la‸ sha paˉ naˍ paw, la‸ ma peuˍ, leh hkui ma peuˍ hta‸ gʼa shehˆ piˇ ve yoˬ.

18Yawˇ ve la‸ taw kʼaw hkʼaw cawˬ taˍ sheˍ ve shaˍlonˍ chu hkʼa peu-eˬ ve hta‸ yuˬ leh, chaw oˇ ve hpaˇ ve oˉ kʼoˍ hta‸ gʼa shehˆ piˇ ve yoˬ. Chaw oˇ ve kʼaw‸ da‸ kehˬ la tuˬ oˇ hkʼe gʼa te piˇ ve yoˬ.

19Oˇ hkʼe te peuˬ hkʼaw‸ nawˉ, paw hkuˇ lehˬ venˇbaˆ hpehˇ ve tanˇ tuˬ hta‸ tuˉ tanˇ piˇ leh, chaw oˇ ve da‸ la kehˬ la tuˬ gʼa te piˇ ve yoˬ. Yawˇ lehˬ aˬ miˍ tuˉ tanˇ piˇ tuˬ ve yawˬ ehˉ hta‸ tiˇ pehˍ leh,

20awˬ shiˍ awˬ nu tuˉ tanˇ tuˬ geh teˇ geh tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ. Chi ve lehˬ, chaw oˇ ve kʼaw‸ da‸ kehˬ la tuˬ te piˇ ve awˬ liˇ awˬ hkʼaˇ hpeh‸ ve yoˬ. Chi hkʼe te ve hkʼaw, chaw oˇ ve kʼaw‸ da‸ kehˬ la ve yoˬ.

21Chaw oˇ ve lehˬ, haˍ gʼawˇ jaˇ leh tanˇ piˇ tuˬ ve yawˬ ehˉ nyiˇ hkeh maˇ cawˬ ve kʼo, Gʼuiˬsha hta‸ kʼaw‸ hkʼaw‸ piˇ ve tanˇ tuˬ awˬ pon, yawˬ awˬ paˍ teˇ hkeh, shaˍlonˍ chu hkaw‸ taˍ ve caˬ hkʼa meu-e teˇ panˇ leh, shaˍlonˍ chu teˇ kaw gʼa yuˬ laˬ ve yoˬ.

22Yawˇ lehˬ aˉ pui kʼaˍ nyiˇ hkeh maˇ heˆ kʼo, guˇ nyiˇ hkeh hta‸ htawˇ gʼa yuˬ laˬ ve yoˬ. Aˉ pui kʼaˍ teˇ hkeh hta‸ venˇbaˆ ponˬ tuˬ gʼa tanˇ piˇ leh, awˬ nu ve teˇ hkeh hta‸ aˬ miˍ gʼa tuˉ tanˇ piˇ ve yoˬ.

23Hiˉ nyi teˇ nyi gaˬ htaˇ, yawˇ lehˬ mawˇ oˇ ve teˇ hpaˍ hta‸ paw hkuˇ geh aˉ po kʼo bon yehˬ yehˬmiˉhpe‸ lo gʼa yuˬ laˬ ve yoˬ.

24Paw hkuˇ lehˬ, yawˬ ehˉ oˇ ve leh shaˍlonˍ chu hta‸ yuˬ leh Gʼuiˬsha hta‸ gʼa tanˇ piˇ ve yoˬ.

25Yawˇ lehˬ yawˬ ehˉ oˇ ve hta‸ tiˇ pehˍ leh, awˬsuhˍ hta‸ yuˬ peuˬ hkʼaw‸ nawˉ, chaw oˇ ve hpaˇ ve la‸ sha paˉ naˍ paw, la‸ ma peuˍ, leh hkui ma peuˍ hta‸ gʼa shehˆ piˇ ve yoˬ.

26Paw hkuˇ lehˬ shaˍlonˍ chu hta‸ yuˬ leh yawˇ ve la‸ mehˍ paˉ la‸ taw kʼaw hkʼaw keu peuˬ hkʼaw‸ nawˉ,

27la‸ sha paˉ ve la‸ naw tuˍ keu leh, Gʼuiˬsha mehˆ gʼuˇ suhˍ lo suhˍ pawˆ hkʼa gaˬ gʼa hpeh‸ pfuhˍ piˇ ve yoˬ.

28Yawˇ lehˬ shaˍlonˍ chu hta‸ yuˬ leh chaw oˇ ve hpaˇ ve la‸ sha paˉ naˍ paw, la‸ ma peuˍ, leh hkui ma peuˍ hta‸ gʼa shehˆ piˇ ve yoˬ.

29Yawˇ ve la‸ taw kʼaw hkʼaw cawˬ taˍ sheˍ ve shaˍlonˍ chu hta‸ chaw oˇ ve oˉ kʼoˍ hta‸ gʼa shehˆ piˇ ve yoˬ. Chi ve lehˬ, yawˇ kʼaw‸ da‸ kehˬ la tuˬ te piˇ ve awˬ liˇ awˬ hkʼaˇ hpeh‸ve yoˬ.

30Oˇ hkʼe te peuˬ hkʼaw‸ nawˉ, yawˇ lehˬ aˉ pui kʼaˍ teˇ hkeh hta‸ yuˬ leh,

31yawˇ venˇbaˆ ponˬ tuˬ gʼa tanˇ piˇ ve yoˬ. Awˬ nu ve teˇ hkeh hta‸ aˬ miˍ gʼa tuˉ tanˇ piˇ ve yoˬ. Chi ve lehˬ, chaw oˇ ve kʼaw‸ da‸ kehˬ la tuˬ te piˇ ve awˬ liˇ awˬ hkʼaˇ hpeh‸ ve yoˬ.

32Chi ve lehˬ, hkiˬ tu‸ a naˍ na-e la peuˬ ve haˍ gʼawˇ jaˇ ve chaw teˇ gʼaˇ hta‸ kʼaw‸ da‸ kehˬ la tuˬ te piˇ ve awˬ liˇ awˬ hkʼaˇ hpeh‸ ve yoˬ.

33Yehˬ hta‸ yawˇ taˆ ve awˬ lawn hta‸ caˉ da‸ leh, Gʼuiˬsha Aˍronˍ hta‸ chi hkʼe kʼoˆ piˇ ve yoˬ. (Chi ve lehˬ, Iˉsaˍreˍlaˆ chaw teˇ hpaˍ Gʼuiˬsha piˇ taˍ ve Hkaˍ nanˍ mvuhˇmiˬ hkʼaw gaˬ htaˇ heh‸ yehˇ tuˬ ve awˬ liˇ awˬ hkʼaˇ hpeh‸ ve yoˬ)

35A shu yawˇ ve yehˬ yawˇ taˆ ve hta‸ gʼa mawˬ ve chaw lehˬ, paw hkuˇ hta‸ gʼa ca hto piˇ ve yoˬ.

36Paw hkuˇ yehˬ oˇ ve hta‸ maˇ ca nyi sheˍ gʼuˇ suhˍ, yehˬ hkʼaw cawˬ ve mawˇ hkʼa peu-eˬ hta‸ awˬ baˬ hpawˇ lo yuˬ tawˆ taˍ tuˬ gʼa kʼoˆ piˇ taˍ ve yoˬ. Oˇ hkʼe maˇ te taˍ ve kʼo, yehˬ hkʼaw cawˬ ve mawˇ hkʼa peu-eˬ ve hta‸ htawˇ maˇ da‸ maˇ kehˬ teh‸ gʼa shawˍ taˍ tuˬve pa taw yoˬ.

37Oˇ hkʼe te taˉ peuˬ hkʼaw‸ nawˉ, yawˇ yehˬ oˇ ve hta‸ gʼa ca nyi ve yoˬ. Yehˬ oˇ ve hta‸ yawˇ taˆ ve awˬ hkʼaˇ nawˉ-ehˍ, maˇ heˆ kʼo nyiˉ-ehˍ cawˬ taˍ ve hta‸ gʼa mawˬ ve kʼo,

38yawˇ lehˬ yehˬ oˇ ve hta‸ suhˍ nyi hkʼa gaˬ gʼa hoˆ baˬ taˉ ve yoˬ.

39Suhˍ nyi teˇ nyi gaˬ htaˇ, paw hkuˇ lehˬ yehˬ oˇ ve hta‸ teˇ pawˆ gʼa ca kʼaw‸ nyi ve yoˬ. Yawˇ taˆ ve pehˉ kʼai chehˇ ve hta‸ yawˇ gʼa mawˬ ve kʼo,

40yawˇ taˆ ve haˉ pui shiˍ oˇ ve teˇ hpaˍ hta‸ yuˬ tawˆ leh venˇ baˬ lo gʼa ca yuˬ kʼoˬ tcuh ve yoˬ.

41Peuˬhkʼaw‸ nawˉ, yehˬ awˬ hkʼaw paˉ hpawˇ ve gʼo‸ pa hta‸ gʼa gaˆ tsuhˇ tcuh ve yoˬ. Hkʼa gaˆ ce la ve maˇ da‸ ve awˬ ceuˬ hkʼa peu-eˬ hta‸ venˇ baˬ lo gʼa ca yuˬ kʼoˬ tcuh ve yoˬ.

42Oˇ hkʼe te peuˬ hkʼaw‸ nawˉ, yuˬ baˬ taˍ ve haˉ pui shiˍ awˬ tan, haˉ pui shiˍ awˬ suhˉ gʼa kʼaw‸ yuˬ keu ve yoˬ.

43Oˇ hkʼe kʼaw‸ gu te taˍ peuˬ hkʼaw‸ nawˉ, yehˬ oˇ ve hta‸ yawˇ teˇ pawˆ kʼaw‸ taˆ ve kʼo,

44paw hkuˇ awˬ to teˇ pawˆgʼa ca kʼaw‸ nyi ve yoˬ. Yawˇ taˆ ve oˇ ve pehˉ kʼai chehˇ ve kʼo, yehˬ oˇ ve lehˬ maˇ da‸ maˇ kehˬ.

45Yehˬ oˇ ve hta‸ gʼa hpaˆ baˬ ve yoˬ. Haˉ pui shiˍ teˇ hpaˍ, suhˆ teˇ hpaˍ, leh yehˬ te htaˇ yehˇ ve awˬ nu ve mawˇ hkʼa peu-eˬ hta‸ venˇ baˬ lo gʼa ca yuˬ baˬ ve yoˬ.

46Yehˬ oˇ ve hta‸ hoˆ taˍ peuˬ hkʼaw‸ nawˉ, hkʼa lo‸-e ve chaw hkʼa peu-eˬ mvuhˇ maˇ hpeu‸ la sheˍ ve ceh ceh maˇ da‸ maˇ kehˬ.

47Yehˬ oˇ ve hkʼaw zuh‸ ve chaw, leh oˇ kaˬ lo awˍ caˇ ve chaw hkʼa peu-eˬ a shu yawˇ ve veu‸ kʼaˇ gʼa kʼehˆ tsuhˇ ve yoˬ.

48Paw hkuˇ teˇ pawˆ ca kʼaw‸ nyi leh, yehˬ oˇ ve hta‸ kʼaw‸ gu taˍ peuˬ hkʼaw‸ nawˉ yawˇ maˇ kʼaw‸ taˆ ve kʼo, yawˇ lehˬ yehˬ oˇ ve hta‸ da‸ kehˬ la peuˬ, teh‸ gʼa shawˍ taˍ ve yoˬ.

49Yehˬ oˇ ve hta‸ kʼaw‸ da‸ kehˬ la piˇ tuˬ, yehˬshehˍ hpaˇ lehˬ ngaˆ nyiˇ hkeh, htawˇ baˉ teˇ maˬ, nyiˉ-ehˍ ve aˉ caˆ hkeh teˇ caˆ leh huˇsoˆ teh‸ kʼoˆ ve suhˆ kʼaˉ teˇ maˬ gʼa yuˬ laˬ ve yoˬ.

50Yawˇ lehˬ ngaˆ ehˉ oˇ ve teˇ hkeh hta‸ iˉ kaˆ keu taˍ ve je‸ mu‸ hkʼu hkʼoˆ teh leh gʼa tiˇ pehˍ ve yoˬ.

51Yawˇ lehˬ htawˇ baˉ, huˆsoˆ awˬ hpa‸, aˉ caˆ hkeh nyiˉ-ehˍ ve leh cawˬ taˍ sheˍ ve ngaˆ ehˉ teˇ hkeh hta‸ ngaˆ ehˉ awˬ suhˍ hkʼaw tuˍ keu leh, yehˬ hta‸ suhˍ pawˆ hkʼa gaˬ gʼa hpeh‸ pfuhˍ piˇ ve yoˬ.

52Chi ve lehˬ, yawˇ ve yehˬ hta‸ kʼaw‸ da‸ kehˬ la piˇ tuˬ te ve awˬ liˇ awˬ hkʼaˇ hpeh‸ ve yoˬ.

53Oˇ hkʼe te peuˬ hkʼaw‸ nawˉ, yawˇ lehˬ te‸ chehˇ sheˍ ve ngaˆ ehˉ oˇ ve hta‸ gʼa hpehˇ peu piˇ ve yoˬ. Chi ve lehˬ, yawˇ ve yehˬ hta‸ kʼaw‸ da‸ kehˬ la piˇ tuˬ te ve awˬ liˇ awˬ hkʼaˇ hpeh‸ leh, oˇ hkʼe te ve pa taw yehˬ kʼaw‸ da‸ kehˬ la ve yoˬ.

54Chi teˇ hpaˍ lehˬ, hkiˬ tu‸ a naˍ, shaˉ chuˇ tawˆ ve, aˬ miˍ chiˆ ve, mawˇ hta‸ yawˇ taˆ ve, leh yehˬ hta‸ yawˇ taˆ ve awˬ lawn hpeh‸ ve yoˬ. Hkʼaˬ ve teˇ ceuˬ da‸ kehˬ ve leh hkʼaˬ ve teˇ ceuˬ maˇ da‸ kehˬ ve hta‸ gʼa shiˍ tuˬ, awˬ liˇ awˬ hkʼaˇ chi teˇ hpaˍ hta‸ teh piˇ taˍ ve yoˬ.