Leviticus 27

Lahu Bible Edited © Thailand Bible Society and Bible Society of Myanmar, 2010, 2020.

← Chapter 26 Jump to:

1Gʼuiˬsha Moˉseˍ hta‸ cuˇ leh, awˬ liˇ awˬ hkʼaˇ chi teˇ hpaˍ Iˉsaˍreˍlaˆ chaw hui hta‸ kʼoˆ maˍ piˇ ve yoˬ.

2Chaw teˇ gʼaˇ a shu yawˇ awˬ to Gʼuiˬsha hta‸ chiˇ a‸ piˇ tuˬ ka ti‸ te ve kʼo, awˬ hawˉ lo kʼoˆ taˍ ve hkʼe awˬ hpfuhˇ kʼoˆ cheˆ piˇ leh, yawˇ hta‸ gʼa hpehˇ piˇ ve yoˬ.

3Hawˉ hkʼaˆ a sha‸ 20 hkʼaw‸ te leh 60 hkʼaw‸ hkʼa gaˬ ve, teˇ gʼaˇ 50 hteh‸, - Yaˇ miˇ ma a sha‸ 20 hkʼaw‸ te leh 60 hkʼaw‸ hkʼa gaˬ ve teˇ gʼaˇ 30 hteh‸, - Yaˇ paˍ a sha‸ 5 hkʼaw‸ te leh 20 hkʼaw‸ hkʼa gaˬ ve teˇ gʼaˇ 20 hteh‸, - Yaˇ miˇ a sha‸ 5 hkʼaw‸ te leh 20 hkʼaw‸ hkʼa gaˬ ve teˇ gʼaˇ 10 hteh‸, - Yaˇ paˍ ehˉ a sha‸ 5 hkʼaw‸ awˬ hawˉ ve teˇ gʼaˇ 5 hteh‸, - Yaˇ miˇ ehˉ a sha‸ 5 hkʼaw‸ awˬ hawˉ ve teˇ gʼaˇ 3 hteh‸, - Hawˉ hkʼaˆ paˍ a sha‸ 60 awˬ hkʼoˆ ve teˇ gʼaˇ 15 hteh‸, - Yaˇ miˇ ma a sha‸ 60 awˬ hkʼoˆ ve teˇ gʼaˇ 10 hteh‸, chi hkʼe gʼa taˆ cheˆ piˇ ve yoˬ.

8Gʼuiˬsha hta‸ chiˇ a‸ piˇ tuˬ ka ti‸ te ve chaw oˇ ve lehˬ, haˍ gʼawˇ jaˇ leh hpu piˇ tuˬ maˇ cawˬ ve kʼo, yawˇ hta‸ paw hkuˇ geh gʼa shiˍ kʼai piˇ ve yoˬ. Paw hkuˇ lehˬ yawˇ hta‸ chaˬ nyi leh yawˇ piˇ gʼa ve awˬ hpfuhˇ hkʼe ceh gʼa kʼoˆ cheˆ piˇ ve yoˬ.

9Chaw teˇ gʼaˇ lehˬ, to nuˇ to shaˆ teˇ hkeh Gʼuiˬsha hta‸ piˇ tuˬ ka ti‸ te ve kʼo, ceˇ oˇ ve lehˬ gʼa da‸ kehˬ piˇ ve yoˬ.

10Yawˇ lehˬ Gʼuiˬsha hta‸ piˇ tuˬ ka ti‸ te taˍ ve ceˇ oˇ ve hta‸ yuˬ leh, awˬ nu ve teˇ hkeh hta‸ kʼaw‸ pa maˇ hpeh‸. Yawˇ oˇ hkʼe te ve kʼo, ceˇ oˇ ve nyiˇ hkeh hkeh hta‸ Gʼuiˬsha ve mawˇ teh‸ gʼa shawˍ ve yoˬ.

11Yawˇ piˇ tuˬ ve ceˇ lehˬ, maˇ da‸ maˇ kehˬ ve kʼo, yawˇ lehˬ ceˇ oˇ ve hta‸ paw hkuˇ geh gʼa yuˬ kʼai ve yoˬ.

12Paw hkuˇ lehˬ ceˇ oˇ ve hta‸ awˬ hpfuhˇ kʼoˆ cheˆ leh, hpu gʼa keu piˇ ve yoˬ.

13Chaw oˇ ve lehˬ ceˇ oˇ ve hta‸ kʼaw‸ vuiˬ hkʼaw‸ gaˇ ve kʼo, awˬ hpfuhˇ kʼoˆ cheˆ taˍ ve hpu oˇ ve leh awˬ leuˉ htawˇ ngaˇ pun teˇ pun gʼa kʼaw‸ keu piˇ ve yoˬ.

14Chaw teˇ gʼaˇ Gʼuiˬsha hta‸ yawˇ ve yehˬ chiˇ a‸ piˇ gaˇ ve kʼo, paw hkuˇ lehˬ yehˬ oˇ ve hta‸ chaˬ nyi leh, hkʼaˬ ma cawˇ ve awˬ hpfuhˇ gʼa kʼoˆ cheˆ piˇ ve yoˬ.

15Chaw oˇ ve lehˬ yehˬ oˇ ve hta‸ teˇ pawˆ kʼaw‸ vuiˬ hkʼaw‸ gaˇ ve kʼo, yawˇ lehˬ awˬ hpfuhˇ kʼoˆ cheˆ taˍ ve hpu oˇ ve leh, awˬ leuˉ htawˇ ngaˇ pun teˇ pun gʼa kʼaw‸ piˇ ve yoˬ.

16Chaw teˇ gʼaˇ Gʼuiˬsha hta‸ yawˇ ve ti mi chiˇ a‸ piˇ gaˇ ve kʼo, ti mi oˇ ve hkʼaw caˬ yawˇ hkʼaˬ ma sheˍ ve hta‸ nyi leh, awˬ hpfuhˇ gʼa kʼoˆ cheˆ piˇ ve yoˬ. Caˬ yawˇ teˇ hkʼawˍ lawˇ ve hpu ngaˇ chi hteh‸ cawˇ ve yoˬ.

17Yawˇ lehˬ ti mi oˇ ve hta‸ Juˇbiˍliˍ peuˬ hkʼaw‸ nawˉ la‸ haˉ chiˇ a‸ piˇ ve kʼo, kʼoˆ cheˆ taˍ ve awˬ hpfuhˇ hkʼa biˇ gʼa piˇ ve yoˬ.

18Ya‸ hkʼaˇ, awˬ hkʼaw‸ nawˉ awˬ yanˇ a ciˉ maw la htaˇ heh‸ chiˇ a‸ piˇ ve kʼo, paw hkuˇ lehˬ awˬ hkʼaw‸ nawˉ teˇ pawˆ Juˇbiˍliˍ hkʼaw‸ hkʼaˬ htaˆ kʼaw‸ gaˬ tuˬ ve hta‸ shawˍ nyi leh awˬ hpfuhˇ gʼa yawnˇ piˇ ve yoˬ.

19Chaw oˇ ve lehˬ, yawˇ chiˇ a‸ piˇ taˍ ve ti mi oˇ ve hta‸ kʼaw‸ vuiˬ hkʼaw‸ gaˇ ve kʼo, yawˇ lehˬ kʼoˆ cheˆ taˍ ve awˬ hpfuhˇ leh awˬ leuˉ htawˇ ngaˇ pun teˇ pun gʼa kʼaw‸ keu piˇ ve yoˬ.

20Yawˇ lehˬ ti mi oˇ ve hta‸ Gʼuiˬsha geh maˇ kʼaw‸ vuiˬ hkʼaw‸ sheˍ gʼuˇ suhˍ, awˬ nu ve chaw teˇ gʼaˇ hta‸ hawˇ piˇ ve kʼo, ti mi oˇ ve hta‸ yawˇ kʼaw‸ vuiˬ hkʼaw‸ tuˬ a hkaw-anˬ maˇ cawˬ.

21Awˬ hkʼaw‸ nawˉ Juˇbiˍliˍ hkʼaw‸ gaˬ la ve teˇ yanˇ, ti mi oˇ ve lehˬ Gʼuiˬsha ve ti mi teh‸ gʼa shawˍ leh paw hkuˇ ve mawˇ hpeh‸ la ve yoˬ.

22Chaw teˇ gʼaˇ lehˬ, yawˇ vuiˬ yuˬ taˍ ve ti mi Gʼuiˬsha hta‸ chiˇ a‸ piˇ gaˇ ve kʼo,

23paw hkuˇ lehˬ, Juˇbiˍliˍ hkʼaw‸ hkʼaˬ htaˆ gaˬ la tuˬ ve hta‸ shawˍ nyi leh, awˬ hpfuhˇ gʼa kʼoˆ cheˆ piˇ ve yoˬ. Yawˇ lehˬ awˬ hpfuhˇ oˇ ve hta‸ oˇ ve teˇ nyi tiˉ awˬ hkʼaw lo gʼa keu piˇ ve yoˬ. Hpu oˇ ve Gʼuiˬsha ve hpu hpeh‸ la ve yoˬ.

24Juˇbiˍliˍ hkʼaw‸ gaˬ la ve teˇ yanˇ, ti mi oˇ ve awˬ shehˍ hpaˇ, maˇ heˆ kʼo yawˇ ve awˬ ceuˬ awˬ hkʼaˇ hta‸ gʼa kʼaw‸ hkʼaw‸ piˇ ve yoˬ.

25Awˬ hpfuhˇ oˇ ve hkʼa peu-eˬ lehˬ, bon yehˬ hkʼaw awˬ hkanˉ teh taˍ ve hkʼe gʼa hpeh‸ piˇ ve yoˬ.

26Awˉ lawˉ peuˇ paw la ve ceˇ teˇ hkeh le le Gʼuiˬsha ve mawˇ hpeh‸ ve yoˬ. Chaw teˇ gʼaˇ ka‸ chi hkʼe ve ceˇ hta‸ yuˬ leh Gʼuiˬsha hta‸ chiˇ a‸ piˇ tuˬ a hkaw-anˬ maˇ cawˬ.

27Ya‸ hkʼaˇ, maˇ da‸ maˇ kehˬ ve ceˇ teˇ hpaˍ geh awˉ lawˉ peuˇ paw la ve awˬ yehˇ teˇ hpaˍ hta‸ kʼaw‸ vuiˬ hkʼaw‸ hpeh‸ ve yoˬ. Chi hkʼe kʼaw‸ vuiˬ hkʼaw‸ gaˇ ve kʼo, kʼoˆ cheˆ taˍ ve awˬ hpfuhˇ leh awˬ leuˉ ngaˇ pun teˇ pun gʼa keu piˇ ve yoˬ. Awˬ yehˇ oˇ ve hta‸ maˇ kʼaw‸ vuiˬ hkʼaw‸ ve kʼo, awˬ hkanˉ teh taˍ ve hkʼe awˬ nu ve chaw hta‸ hawˇ piˇ hpeh‸ ve yoˬ.

28Ya‸ hkʼaˇ, Gʼuiˬsha hta‸ piˇ cheˆ taˍ peuˬ ve chaw yaˇ, ceˇ leh ti mi chi hkʼe ve teˇ hpaˍ hta‸ hkʼaˬ ve chaw teˇ gʼaˇ maˇ kʼoˆ, vuiˬ yuˬ ve, maˇ heˆ kʼo hawˇ piˇ ve te maˇ hpeh‸.

29Chi hkʼe piˇ cheˆ taˍ peuˬ ve awˬ ceuˬ hta‸ kʼaw‸ vuiˬ hkʼaw‸ maˇ hpeh‸. Gʼa tiˇ pehˍ piˇ ve yoˬ.

30Awˬ shiˍ awˬ nu leh iˉ shiˍ teˇ chi pun teˇ pun lehˬ, Gʼuiˬsha ve mawˇ hpeh‸ ve yoˬ.

31Chaw teˇ gʼaˇ lehˬ teˇ chi pun teˇ pun ve awˬ shiˍ awˬ nu oˇ ve teˇ hpaˍ hta‸ kʼaw‸ vuiˬ hkʼaw‸ gaˇ ve kʼo, kʼoˆ cheˆ taˍ ve awˬ hpfuhˇ leh awˬ leuˉ ngaˇ pun teˇ pun gʼa keu piˇ ve yoˬ.

32Ceˇ caˬ teˇ hpaˍ htawˇ teˇ chi hkeh teˇ hkeh lehˬ Gʼuiˬsha ve mawˇ hpeh‸ ve yoˬ. Ceˇ gʼaw nyi leh teˇ chi hkeh gaˬ ve teˇ hkeh lehˬ, Gʼuiˬsha ve mawˇ hpeh‸ ve yoˬ.

33Awˬ shehˍ hpaˇ lehˬ awˬ to da‸ ve leh maˇ da‸ ve hta‸ maˇ gʼa nyi. Yawˇ ve ceˇ hta‸ gʼaw kʼai leh, teˇ chi hkeh gaˬ ve teˇ hkeh gʼa yuˬ piˇ ve yoˬ. Oˇ ve teˇ hkeh awˬ tan, awˬ nu ve teˇ hkeh kʼaw‸ yuˬ pa piˇ ve te maˇ hpeh‸. Oˇ hkʼe te ve kʼo, oˇ ve nyiˇ hkeh hkeh Gʼuiˬsha ve mawˇ hpeh‸ kʼai leh, kʼaw‸ vuiˬ hkʼaw‸ tuˬ a hkaw-anˬ maˇ cawˬ.

34Gʼuiˬsha lehˬ, Siˉnaˆ hkʼaw hkʼoˆ lo Moˉseˍ hta‸ cuˇ leh awˬliˇtawˇhkawˇ chi teˇ hpaˍ Iˉsaˍreˍlaˆ chaw hui hta‸ kʼoˆ piˇ ve yoˬ.

← Chapter 26 Jump to: