Leviticus 16

Lahu Bible Edited © Thailand Bible Society and Bible Society of Myanmar, 2010, 2020.

← Chapter 15 Jump to: Chapter 17 →

1Aˍronˍ ve yaˇ paˍ nyiˇ gʼaˇ maˇ da‸ kehˬ ve aˬ miˍ hta‸ yuˬ leh Gʼuiˬsha hta‸ sha hawnˉ tuˉ tanˇ piˇ ve pa taw, Gʼuiˬsha yawˇ huiˉ maˬ hta‸ tiˇ pehˍ piˇ peuˬ hkʼaw‸ nawˉ, Gʼuiˬsha Moˉseˍ hta‸ chi hkʼe kʼoˆ piˇ ve yoˬ.

2Nawˬ viˉ paˍ Aˍronˍ lehˬ awˬ yanˇ cawˇ ve teˇ yanˇ htaˇ heh‸, da‸ kehˬ jaˇ ve bawehˇ hkʼaw gʼa lo‸-e ve yoˬ. Awˬ lawn kʼo, ngaˬ lehˬ moˬ hkʼaw chehˇ taˍ leh, oˇ kaˬ lo teh taˍ ve ka ti‸ shaˉ caˆ ta kʼoˍ hkʼoˆ lo ya‸ la chehˇ ve yoˬ. Yawˇ maˇ na yuˬ ve kʼo, gʼa suh tuˬ yoˬ.

3Da‸ kehˬ jaˇ ve bawehˇ hkʼaw lo‸-e htaˇ, yawˇ lehˬ venˇbaˆ hpehˇ ve tuˉ tanˇ tuˬ awˬ pon nuˇ paˍ teˇ hkeh leh, aˬ miˍ tuˉ tanˇ tuˬ ve yawˬ paˍ teˇ hkeh gʼa yuˬ veu laˇ ve yoˬ, teh‸ Moˉseˍ hta‸ kʼoˆ piˇ ve yoˬ.

4Oˇ ve hkʼaw‸ nawˉ, Gʼuiˬsha Moˉseˍ hta‸ awˬ liˇ awˬ hkʼaˇ chi teˇ hpaˍ kʼoˆ maˍ piˇ ve yoˬ. Aˍronˍ lehˬ, da‸ kehˬ jaˇ ve bawehˇ hkʼaw maˇ lo‸-e sheˍ gʼuˇ suhˍ iˉ kaˆ gʼa hehˉ leh paw hkuˇ ve veu‸ kʼaˇ gʼa veu‸ deh taˍ ve yoˬ. Aˉ po‸ zuhˬ ma, haˍ htaw, haˍ pi caˆ leh uˉ nyiˉ chi teˇ hpaˍ hta‸ hkʼa deh‸ gʼa veu‸ deh taˍ ve yoˬ.

5Iˉsaˍreˍlaˆ chaw teˇ hpaˍ lehˬ, Aˍronˍ hta‸ venˇbaˆ hpehˇ ve tuˉ tanˇ tuˬ awˬ pon aˉ che‸ awˬ paˍ nyiˇ hkeh leh, aˬ miˍ tuˉ tanˇ tuˬ ve yawˬ ehˉ awˬ paˍ teˇ hkeh gʼa piˇ ve yoˬ.

6Yawˇ lehˬ, yawˇ awˬ to leh yawˇ ve yehˬ yaˇ kʼa yaˇ teˇ hpaˍ venˇbaˆ gʼa ponˬ tuˬ, nuˇ paˍ teˇ hkeh gʼa tuˉ tanˇ piˇ ve yoˬ.

7Oˇ hkʼe te peuˬ hkʼaw‸ nawˉ, yawˇ lehˬ aˉ che‸ nyiˇ hkeh hta‸ aˉ po kʼo bon yehˬ yehˬmiˉhpe‸ lo gʼa yuˬ kʼai ve yoˬ.

8Yawˇ lehˬ oˇ kaˬ lo huˉ taˍ leh Gʼuiˬsha awˬ pon teh‸ kʼoˆ ve haˉ pui shiˍ leh, Aˍzaˍseˍlaˆ awˬ pon teh‸ kʼoˆ ve haˉ pui shiˍ chi nyiˇ maˬ hta‸ gʼa hkaˆ yuˬ nyi ve yoˬ.

9Yawˇ lehˬ, Gʼuiˬsha awˬ pon hkaˆ yuˬ gʼa taˍ ve aˉ che‸ hta‸ tiˇ pehˍ leh, venˇbaˆ ponˬ tuˬ gʼa tanˇ piˇ ve yoˬ.

10Aˍzaˍseˍlaˆ awˬ pon hkaˆ yuˬ gʼa taˍ ve aˉ che‸ hta‸ yuˬ leh, Gʼuiˬsha hta‸ chiˇ a‸ piˇ peuˬ hkʼaw‸ nawˉ, chaw yaˇ teˇ hpaˍ ve venˇbaˆ hta‸ yuˬ baˬ tuˬ, aˉ che‸ oˇ ve hta‸ Aˍzaˍseˍlaˆ chehˇ kuiˬ heh puiˉ hkʼaw lo gʼa hpehˇ peu piˇ ve yoˬ.

11Aˍronˍ lehˬ, yawˇ awˬ to leh yawˇ ve yehˬ yaˇ kʼa yaˇ teˇ hpaˍ venˇbaˆ gʼa ponˬ tuˬ nuˇ paˍ oˇ ve hta‸ tuˉ tanˇ piˇ chehˇ htaˇ,

12yawˇ lehˬ tuˉ tanˇ kuiˬ hkʼoˆ lo cawˬ ve shiˉ gʼeu‸ leh sha hawnˉ nyiˇ kaˆ yuˬ veu leh da‸ kehˬ jaˇ ve bawehˇ hkʼaw gʼa lo‸-e ve yoˬ.

13Oˇ kaˬ Gʼuiˬsha mehˆ gʼuˇ suhˍ lo yawˇ lehˬ sha hawnˉ oˇ ve hta‸ aˬ miˍ shiˉ gʼeu‸ hkʼoˆ gʼa keu piˇ ve yoˬ. Oˇ kaˬ lo to‸ tawˆ la ve mvuhˇ hkʼawˇ lehˬ, ka ti‸ shaˉ caˆ ta kʼoˍ hta‸ hoˆ beh sheˬ ve pa taw, ta kʼoˍ oˇ ve hta‸ yawˇ maˇ gʼa mawˬ. Hkʼe te leh yawˇ maˇ gʼa suh.

14Yawˇ lehˬ nuˇ suhˍ hta‸ yuˬ leh, la‸ naw tuˍ keu peuˬ hkʼaw‸ nawˉ, ta kʼoˍ awˬ hoˆ hta‸ gʼa hpeh‸ pfuhˍ piˇ ve yoˬ. Ka ti‸ shaˉ caˆ ta kʼoˍ gʼuˇ suhˍ lo htawˇ suhˍ pawˆ gʼa hpeh‸ pfuhˍ piˇ ve yoˬ.

15Oˇ hkʼe te peuˬ hkʼaw‸ nawˉ yawˇ lehˬ chaw yaˇ teˇ hpaˍ venˇbaˆ gʼa ponˬ tuˬ, aˉ che‸ hta‸ tiˇ pehˍ leh, awˬ suhˍ hta‸ da‸ kehˬ jaˇ ve bawehˇ hkʼaw gʼa yuˬ kʼai ve yoˬ. Nuˇ suhˍ yuˬ leh hpeh‸ pfuhˍ piˇ ve hkʼe, aˉ che‸ awˬ suhˍ hta‸ htawˇ ta kʼoˍ awˬ hoˆ leh ta kʼoˍ gʼuˇ suhˍ lo gʼa kʼaw‸ hpeh‸ pfuhˍ piˇ ve yoˬ.

16Chi hkʼe te ve hkʼaw, yawˇ lehˬ Iˉsaˍreˍlaˆ chaw teˇ hpaˍ ve venˇbaˆ hta‸ pa taw cha‸ chiˆ kʼai ve da‸ kehˬ jaˇ ve bawehˇ hta‸ kʼaw‸ da‸ kehˬ la piˇ ve yoˬ. Yawˇ chi hkʼe gʼa te ve lehˬ, bon yehˬ chi ve maˇ da‸ kehˬ ve fa la awˬ kʼaw ji lo cawˬ taˍ ve pa taw yoˬ.

17Aˍronˍ da‸ kehˬ jaˇ ve bawehˇ hkʼaw da‸ tuˬ kehˬ tuˬ te chehˇ ve awˬ yanˇ hta‸ te leh, yawˇ kʼaw‸ tawˆ la htaˇ hkʼa gaˬ, chaw teˇ gʼaˇ ka‸ aˉ po kʼo bon yehˬ hkʼaw maˇ gʼa chehˇ taˍ. Yawˇ awˬ to pon, yawˇ ve yehˬ yaˇ kʼa yaˇ awˬ pon leh Iˉsaˍreˍlaˆ chaw hkʼa peu-eˬ awˬ pon, da‸ tuˬ kehˬ tuˬ te peuˬ hkʼaw‸ nawˉ,

18yawˇ lehˬ tuˉ tanˇ kuiˬ lo kʼai leh aˬ miˍ tuˉ tanˇ tuˬ gʼa ca kʼaw‸ tuˉ tanˇ piˇ ve yoˬ. Yawˇ lehˬ nuˇ suhˍ, aˉ che‸ suhˍ hta‸ htawˇ yuˬ kʼai leh, tuˉ tanˇ kuiˬ hkʼoˆ lo cawˬ ve awˬ hkaw teˇ hpaˍ hta‸ gʼa shehˆ piˇ ve yoˬ.

19Yawˇ ve la‸ naw awˬ suhˍ hkʼaw tuˍ keu leh, tuˉ tanˇ kuiˬ hta‸ htawˇ suhˍ pawˆ hkʼa gaˬ gʼa hpeh‸ pfuhˍ piˇ ve yoˬ. Chi hkʼe te ve hkʼaw, yawˇ lehˬ Iˉsaˍreˍlaˆ chaw hui ve venˇbaˆ hta‸ pa taw cha‸ chiˆ kʼai ve tuˉ tanˇ kuiˬ hta‸ kʼaw‸ da‸ kehˬ la piˇ ve yoˬ.

20Aˍronˍ lehˬ, da‸ kehˬ jaˇ ve bawehˇ hta‸ maˇ kʼoˆ, aˉ po kʼo bon yehˬ hkʼaw cawˬ ve awˬ nu ve mawˇ teˇ hpaˍ hta‸ maˇ kʼoˆ, da‸ tuˬ kehˬ tuˬ te piˇ peuˬ hkʼaw‸ nawˉ, yawˇ lehˬ Aˍzaˍseˍlaˆ awˬ pon leuˆ yuˬ taˍ ve aˉ che‸ hta‸ yuˬ leh Gʼuiˬsha hta‸ gʼa chiˇ a‸ piˇ ve yoˬ.

21Yawˇ lehˬ aˉ che‸ oˇ ve oˉ kʼoˍ hkʼoˆ lo yawˇ ve la‸ sheh nyiˇ paˉ taˍ leh, venˇbaˆ hkʼa peu-eˬ, haiˬ ve awˬ ceuˬ hkʼa peu-eˬ, Iˉsaˍreˍlaˆ chaw Gʼuiˬsha hta‸ te ya‸ ve awˬ ceuˬ hkʼa peu-eˬ Gʼuiˬsha hta‸ lawˬ hkawˉ leh, venˇbaˆ oˇ ve hkʼa peu-eˬ aˉ che‸ oˇ ve oˉ kʼoˍ hkʼoˆ gʼa yuˬ teh piˇ ve yoˬ. Oˇ hkʼe te peuˬ hkʼaw‸ nawˉ, chaw teˇ gʼaˇ hta‸ leuˆ yuˬ leh aˉ che‸ oˇ ve hta‸ heh puiˉ hkʼaw lo gʼa ca gʼa‸ peu tcuh ve yoˬ.

22Aˉ che‸ oˇ ve lehˬ, venˇbaˆ oˇ ve hkʼa peu-eˬ hta‸ pfuhˇ veu leh, chaw maˇ chehˇ ve mvuhˇmiˬ lo gʼa hpaw-e ve yoˬ.

23Oˇ hkʼe te peuˬ hkʼaw‸ nawˉ, Aˍronˍ lehˬ aˉ po kʼo bon yehˬ hkʼaw kʼaw‸ lo‸-e leh, yawˇ veu‸ deh taˍ ve paw hkuˇ ve veu‸ kʼaˇ hta‸ oˇ kaˬ lo gʼa kʼehˆ teh taˉ ve yoˬ.

24Yawˇ lehˬ da‸ kehˬ ve chehˇ kuiˬ lo iˉ kaˆ gʼa hehˉ leh, yawˇ ve veu‸ kʼaˇ hta‸ gʼa kʼaw‸ veu‸ ve yoˬ. Oˇ hkʼe te peuˬ hkʼaw‸ nawˉ, tuˉ tanˇ kuiˬ lo kʼai leh, yawˇ ve venˇbaˆ leh chaw chi ma ve venˇbaˆ awˬ pon, Gʼuiˬsha hta‸ gʼa tuˉ tanˇ piˇ ve yoˬ.

25Venˇbaˆ hpehˇ ve tuˉ tanˇ tuˬ awˬ pon, awˬ chu hta‸ yuˬ leh tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ.

26Aˉ che‸ oˇ ve hta‸ heh puiˉ hkʼaw lo Aˍzaˍseˍlaˆ geh ca gʼa‸ kʼoˬ piˇ shehˍ hpaˇ htawˇ, fa la lo maˇ kʼaw‸ la sheˍ htaˇ, iˉ kaˆ gʼa hehˉ leh veu‸ kʼaˇ gʼa kʼehˆ tsuhˇ taˉ ve yoˬ.

27Venˇbaˆ hpehˇ ve tuˉ tanˇ tuˬ awˬ pon tiˇ pehˍ taˍ ve nuˇ paˍ leh aˉ che‸ hta‸ fa la awˬ baˬ hpawˇ lo yuˬ tawˆ-e leh aˬ miˍ gʼa tuˉ baˬ ve yoˬ. Awˬ guiˬ kʼuˉ, awˬ shaˍ leh awˬ gʼuˬ tehˆ hkʼa peu-eˬ hta‸ ka‸ aˬ miˍ gʼa tuˉ baˬ ve yoˬ.

28Oˇ ve teˇ hpaˍ hta‸ aˬ miˍ ca tuˉ baˬ ve chaw htawˇ, fa la lo maˇ kʼaw‸ la sheˍ htaˇ iˉ kaˆ gʼa hehˉ leh veu‸ kʼaˇ gʼa tsuhˇ taˉ ve yoˬ.

29Awˬ hawˉ lo awˬ hkʼaˇ beˆ maˍ laˇ taˍ ve hkʼe, teˇ co peuˬ teˇ co awˬ nyi chi hta‸ gʼa te ve yoˬ. Ha pa suhˍ maˬ teˇ maˬ, teˇ chi nyi gaˬ la htaˇ, Iˉsaˍreˍlaˆ chaw leh yawˇ hui geh ca chehˇ la taˍ ve awˬ nu ve chaw hkʼa peu-eˬ, caˇ tuˬ ce leh te‸ chiˉ kanˉ maˇ gʼa te.

30Oˇ ve teˇ nyi htaˇ, yawˇ hui hkʼa peu-eˬ da‸ kehˬ la tuˬ, paw hkuˇ lehˬ venˇbaˆ hpehˇ ve tanˇ tuˬ gʼa tanˇ piˇ ve yoˬ.

31Awˬ nyi oˇ ve teˇ nyi lehˬ, da‸ kehˬ jaˇ ve awˬ nyi hpeh‸ ve pa taw, yawˇ hui hkʼa peu-eˬ caˇ tuˬ gʼa ce leh chaw teˇ gʼaˇ ka‸ kanˉ maˇ gʼa te. Awˬ liˇ chi teˇ co peuˬ teˇ co hkʼa deh‸ na yuˬ leh gʼa te ve yoˬ.

32Paw hkuˇ lonˉ hpeh‸ ve chaw teˇ gʼaˇ lehˬ, chaw yaˇ teˇ hpaˍ da‸ kehˬ la tuˬ gʼa te piˇ ve yoˬ. Yawˇ lehˬ paw hkuˇ ve veu‸ kʼaˇ hta‸ veu‸ deh leh,

33da‸ kehˬ jaˇ ve bawehˇ hta‸ maˇ kʼoˆ, aˉ po kʼo bon yehˬ hkʼaw cawˬ ve awˬ nu ve mawˇ teˇ hpaˍ hta‸ maˇ kʼoˆ, da‸ tuˬ kehˬ tuˬ gʼa te piˇ ve yoˬ.

34Awˬ liˇ chi ve hta‸ teˇ co peuˬ teˇ co hkʼa deh‸ na yuˬ leh gʼa te ve yoˬ. Iˉsaˍreˍ laˆ chaw hui hta‸ da‸ kehˬ la piˇ ve awˬ nyi chi hta‸ teˇ hkʼaw‸ teˇ pawˆ ceh tiˉ gʼa te ve yoˬ. Moˉseˍ lehˬ Gʼuiˬsha kʼoˆ piˇ taˍ ve hkʼe hkʼa deh‸ na yuˬ leh te ve yoˬ.

← Chapter 15 Jump to: Chapter 17 →