Leviticus 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Gʼuiˬsha Moˉseˍ hta‸ cuˇ leh,

2Iˉsaˍreˍlaˆ chaw hui hta‸ chi hkʼe kʼoˆ piˇ ve yoˬ. Ngaˬ lehˬ nawˬ hui ve Gʼuiˬsha hpeh‸ ve yoˬ.

3Teˇ pawˆ htaˇ, nawˬ hui chehˇ jaw taˉ ve Eˇjiˇtu‸ chaw, maˇ heˆ kʼo chi beu‸ ngaˬ nawˬ hui hta‸ shiˍ kʼai laˇ tuˬ ve Hkaˍnanˍ mvuhˇmiˬ hkʼaw chehˇ ve chaw hui te ve hkʼe nawˬ hui taˇ te.

4Ngaˬ ve awˬliˇtawˇhkawˇ teˇ hpaˍ hta‸ na yuˬ leh, ngaˬ kʼoˆ ve hkʼe te-o. Ngaˬ lehˬ nawˬ hui ve Gʼuiˬsha hpeh‸ ve yoˬ.

5Ngaˬ piˇ taˍ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ leh te-o. Oˇ hkʼe te ve kʼo, nawˬ hui gʼa te‸ chehˇ tuˬ yoˬ. Ngaˬ lehˬ Gʼuiˬsha hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

6Gʼuiˬsha lehˬ, yawˇ hui hta‸ awˬ liˇ chi teˇ hpaˍ piˇ taˍ ve yoˬ. Nawˬ ve awˬ viˉ awˬ nyi hkʼaˬ ve teˇ gʼaˇ hta‸ maˇ kʼoˆ haˉ chawˇ maˇ gʼa te.

7Nawˬ pa ve awˬ miˇ ma hta‸ haˉ chawˇ maˇ gʼa te. Nawˬ pa ve awˬ me‸ awˬ hponˇ hta‸ taˇ te luˬ piˇ. Nawˬ e ve awˬ me‸ awˬ hponˇ hta‸ ka‸ nawˬ maˇ gʼa te luˬ piˇ.

8Nawˬ pa ve awˬ nu ve awˬ miˇ ma i teˇ hpaˍ hta‸ htawˇ, nawˬ haˉ chawˇ maˇ gʼa te. Yawˇ ve awˬ me‸ awˬ hponˇ hta‸ maˇ gʼa te luˬ piˇ.

9Nawˬ ve awˬ nyi ma hkʼaˬ ve teˇ gʼaˇ hta‸ maˇ kʼoˆ, haˉ chawˇ maˇ gʼa te.

10Nawˬ ve awˬ hawehˍ hta‸ haˉ chawˇ maˇ gʼa te. Oˇ hkʼe te ve lehˬ, nawˬ awˬ me‸ awˬ hponˇ luˬ ve yoˬ.

11Nawˬ pa ve awˬ miˇ ma i teˇ hpaˍ ve yaˇ miˇ hta‸ nawˬ haˉ chawˇ maˇ gʼa te. Yawˇ htawˇ nawˬve awˬ nyi ma hpeh‸ ve yoˬ.

12Nawˬ pa hpawˇ ve, maˇ heˆ kʼo nawˬ e hpawˇ ve aˉ shuˍ ma hta‸ nawˬ haˉ chawˇ maˇ gʼa te.

14Nawˬ ve aˉ shuˍ paˍ miˇ ma hta‸ nawˬ haˉ chawˇ maˇ gʼa te. Yawˇ htawˇ nawˬ ve aˉ shuˍ ma hpeh‸ ve yoˬ.

15Nawˬ ve awˬ hkuiˇ ma hta‸ nawˬ haˉ chawˇ maˇ gʼa te.

16Nawˬ ve awˬ nyi paˍ miˇ ma hta‸ htawˇ nawˬ haˉ chawˇ maˇ gʼa te.

17Nawˬ lehˬ mehˇchawˇma hta‸ ka‸, yawˇ ve yaˇ miˇ hta‸ ka‸ teˇ pawˆ tiˉ maˇ gʼa heuˆ. Yawˇ htawˇ nawˬ ve yaˇ miˇ hpeh‸ la peuˬ ve yoˬ. Chi hkʼe te ve lehˬ cha‸ chiˆ jaˇ ve yoˬ.

18Nawˬ miˇ ma maˇ suh sheˍ ve ceh ceh, nawˬ miˇ ma ve awˬ nyi ma hta‸ nawˬ maˇ gʼa heuˆ.

19Yaˇ miˇ awˬ liˇ laˬ chehˇ ve yaˇ miˇ geh nawˬ maˇ gʼa ca zuh‸. Awˬ lawn kʼo, yawˇ lehˬ maˇ da‸ maˇ kehˬ.

20Shu miˇ ma hta‸ nawˬ haˉ chawˇ maˇ gʼa te. Oˇ hkʼe te ve kʼo, nawˬ lehˬ maˇ da‸ maˇ kehˬ ve chaw hpeh‸ la ve yoˬ.

21Nawˬ ve yaˇ hta‸ yuˬ leh Mawˇloˆ gʼuiˬsha hta‸ maˇ gʼa tanˇ piˇ. Oˇ hkʼe te ve lehˬ Gʼuiˬsha ve awˬ meh hta‸ cha‸ chiˆ tuˬ te ve yoˬ.

22Hawˉ hkʼaˆ chawˇ chawˇ peh‸ ve tzuhˆ ve maˇ gʼa te. Oˇ hkʼe te ve hta‸ Gʼuiˬsha canˇ ve yoˬ.

23Hawˉ hkʼaˆ maˇ kʼoˆ, yaˇ miˇ maˇ kʼoˆ to nuˇ to shaˆ hta‸ haˉ chawˇ maˇ gʼa te. Oˇ hkʼe te ve chaw lehˬ, maˇ da‸ maˇ kehˬ ve chaw hpeh‸ la ve yoˬ.

24Nawˬ hui lehˬ cha‸ chiˆ ve kanˉ chi teˇ hpaˍ hta‸ maˇ gʼa te. Buiˇshaˆaˉnaˆ chaw teˇ hpaˍ oˇ hkʼe te leh cha‸ chiˆ kʼai ve yoˬ. Chaw oˇ ve teˇ hpaˍ lehˬ, chi beu‸ nawˬ hui ca chehˇ tuˬ ve mvuhˇmiˬ hkʼaw chehˇ taˍ ve chaw hpeh‸ leh, Gʼuiˬsha yawˇ hui hta‸ gʼa‸ kʼoˬ piˇ tuˬ ve yoˬ.

25Yawˇ hui oˇ hkʼe te ve pa taw mvuhˇmiˬ oˇ ve cha‸ chiˆ kʼai ve yoˬ. Gʼuiˬsha yawˇ hui hta‸ ciˍ yanˍ piˇ leh, yawˇ hui hta‸ mvuhˇmiˬ oˇ ve hkʼaw gʼa‸ kʼoˬ piˇ ve yoˬ.

26Yawˇ hui oˇ hkʼe te leh, mvuhˇmiˬ hta‸ cha‸ chiˆ kʼai piˇ ve yoˬ. Ya‸ hkʼaˇ, nawˬ hui oˇ hkʼe maˇ gʼa te.

27Nawˬ hui Iˉsaˍreˍlaˆ chaw maˇ kʼoˆ, nawˬ hui geh ca chehˇ la taˍ ve chaw maˇ kʼoˆ, Gʼuiˬsha ve awˬliˇtawˇhkawˇ teˇ hpaˍ hta‸ hkʼa deh‸ gʼa na yuˬ ve yoˬ.

28Oˇ hkʼe te ve kʼo, mvuhˇmiˬ oˇ ve hkʼaw chehˇ ve chaw hta‸ ngaˬ gʼa‸ kʼoˬ piˇ ve hkʼe, nawˬ hui hta‸ gʼa‸ kʼoˬ laˇ tuˬ ve maˇ heˆ.

29Oˇ hkʼe te ve chaw hkʼaˬ ve teˇ gʼaˇ hta‸ maˇ kʼoˆ, Gʼuiˬsha ve chaw teh‸ maˇ kʼaw‸ shawˍ taˍ piˇ ve hta‸ nawˬ hui shiˍ taˍ ve yoˬ.

30Gʼuiˬsha kʼoˆ ve, Ngaˬ ve awˬliˇtawˇhkawˇ teˇ hpaˍ hta‸ na yuˬ-o‸. Nawˬ hui gʼuˇ suhˍ lo chehˇ taˍ ve chaw oˇ ve teˇ hpaˍ te ve hkʼe taˇ te. Awˬ na lo kʼoˆ taˍ ve cha‸ chiˆ ve kanˉ oˇ ve teˇ hpaˍ hta‸ htawˇ a ciˉ ka‸ taˇ te. Ngaˬ lehˬ nawˬ hui ve Gʼuiˬsha hpeh‸ ve yoˬ, teh‸ Gʼuiˬsha kʼoˆ ve yoˬ.

← Chapter 17 Jump to: Chapter 19 →