Leviticus 21

Lahu Bible Edited © Thailand Bible Society and Bible Society of Myanmar, 2010, 2020.

← Chapter 20 Jump to: Chapter 22 →

1Gʼuiˬsha Moˉseˍ hta‸ cuˇ leh Aˍronˍ awˬ ceuˬ awˬ hkʼaˇ paw hkuˇ teˇ hpaˍ hta‸ chi hkʼe kʼoˆ piˇ ve yoˬ.

2Paw hkuˇ hkʼaˬ ve teˇ gʼaˇ maˇ kʼoˆ, yawˇ ve awˬ pa awˬ e, awˬ yaˇ, awˬ nyi paˍ, awˬ nyi ma suh-e ve maˇ heˆ kʼo,

3awˬ nu ve chaw suh-e kuiˬ lo maˇ gʼa kʼai.

4Yawˇ kʼai ve kʼo, a shu yawˇ awˬ to hta‸ cha‸ chiˆ tuˬ te ve yoˬ.

5Paw hkuˇ lehˬ uˉ hkeh mvuh, paˇ tcuhˆ hta‸ chiˇ baˬ leh a shu yawˇ awˬ to hta‸ shawˆ hkʼaw ve hkʼaw, dawˇ haˍ ve awˬ heˆ maˇ gʼa te.

6Yawˇ lehˬ gʼa da‸ kehˬ piˇ leh, ngaˬ ve awˬ me‸ awˬ hponˇ hta‸ maˇgʼa te luˬ. Yawˇ lehˬ ngaˬ hta‸ gʼa tuˉ tanˇ laˇ leh, hkʼaˬ htaˆ ka‸ gʼa da‸ kehˬ piˇ ve yoˬ.

7Paw hkuˇ lehˬ, meh maˬ lanˉ, shu kaoˇ ya‸ peuˬ ve yaˇ miˇ, leh shu baˬ taˍ ve yaˇ miˇ hta‸ maˇ gʼa heuˆ. Awˬ lawn kʼo, yawˇ lehˬ da‸ kehˬ ve chaw hpeh‸ ve yoˬ.

8Chaw yaˇ teˇ hpaˍ lehˬ, paw hkuˇ hta‸ da‸ kehˬ ve chaw teh‸ gʼa shawˍ taˍ ve yoˬ. Awˬ lawn kʼo, yawˇ lehˬ ngaˬ hta‸ tuˉ tanˇ laˇ chehˇ ve pa taw yoˬ. Ngaˬ lehˬ Gʼuiˬsha hpeh‸ ve yoˬ. Ngaˬ lehˬ da‸ kehˬ jaˇ leh, ngaˬ ve chaw teˇ hpaˍ hta‸ da‸ kehˬ piˇ taˍ ve yoˬ.

9Paw hkuˇ ve yaˇ miˇ teˇ gʼaˇ meh maˬ lanˉ hpeh‸ ve kʼo, yawˇ lehˬ a shu yawˇ awˬ pa ve awˬ me‸ awˬ hponˇ hta‸ te luˬ ve pa taw, yawˇ hta‸ aˬ miˍ gʼa tuˉ pehˍ ve yoˬ.

10Paw hkuˇ lonˉ hpeh‸ ve chaw lehˬ, yawˇ ve oˉ kʼoˍ hta‸ naˍ manˇ pfuhˍ leh paw hkuˇ ve veu‸ kʼaˇ hta‸ veu‸ deh taˍ peuˬ ve kʼo, oˉ kʼoˍ maˇ puiˍ leh buiˇ keu maˇ gʼa te chehˇ. Yawˇ ve veu‸ kʼaˇ hta‸ tzuh‸ suhˍ leh dawˇ haˍ ve awˬ heˆ maˇ gʼa te.

11Yawˇ lehˬ ngaˬ hta‸ chiˇ a‸ laˇ taˍ peuˬ ve chaw hpeh‸ ve pa taw, yawˇ awˬ to hta‸ cha‸ chiˆ tuˬ maˇ gʼa te.

12Yawˇ ve awˬ pa awˬ e suh-e ve maˇ kʼoˆ, awˬ nu ve chaw hkʼaˬ ve teˇ gʼaˇ suh-e ve maˇ kʼoˆ, yawˇ maˇ gʼa ca nyi. Oˇ hkʼe te ve kʼo, yawˇ lehˬ ngaˬ ve aˉ po kʼo bon yehˬ hta‸ cha‸ chiˆ tuˬ te ve yoˬ.

13Yawˇ lehˬ, yaˇ miˇ haˉ hta‸ tiˉ gʼa heuˆ ve yoˬ.

14Mehˇchawˇma, shu baˬ taˍ ve yaˇ miˇ leh meh maˬ lanˉ hta‸ maˇ gʼa heuˆ. Yawˇ ve awˬ ceuˬ awˬ hkʼaˇ awˬ hkʼaw lo ve yaˇ miˇ haˉ hta‸ tiˉ gʼa heuˆ ve yoˬ.

15Oˇ hkʼe maˇ heˆ kʼo, yawˇ ve yaˇ teˇ hpaˍ lehˬ maˇ da‸ maˇ kehˬ ve chaw hpeh‸ la ve yoˬ. Ngaˬ lehˬ Gʼuiˬsha hpeh‸ leh, yawˇ hta‸ paw hkuˇ lonˉ hpeh‸ la piˇ tuˬ leuˆ yuˬ taˍ ve yoˬ, teh‸ Gʼuiˬsha kʼoˆ ve yoˬ.

16Gʼuiˬsha Moˉseˍ hta‸ cuˇ leh Aˍronˍ leh yawˇ ve yaˇ teˇ hpaˍ hta‸ chi hkʼe kʼoˆ piˇ ve yoˬ.

17Nawˬ hui ve awˬ ceuˬ awˬ hkʼaˇ teˇ hpaˍ awˬ hkʼaw lo, awˬ kuiˉ awˬ haiˇ cawˬ ve chaw hkʼaˬ ve teˇ gʼaˇ maˇ kʼoˆ, ngaˬ hta‸ tuˉ tanˇ tuˬ maˇ gʼa yuˬ tuˉ tanˇ laˇ. Nawˬ hui teˇ co peuˬ teˇ co chi ve hta‸ gʼa dawˇ nawˇ taˍ ve yoˬ.

18Chi hkʼe ve chaw lehˬ, ngaˬ hta‸ maˇ gʼa tuˉ tanˇ laˇ. Mehˆ cuˉ ve chaw, hkui luˬ ve chaw, chaw hpeh‸ maˇ da‸ ve chaw,

19hkui luˬ la‸ luˬ ve chaw,

20caw‸ kʼaw‸ ve chaw leh chaw teh‸ nehˉ teˇ hpaˍ, mehˆ teˇ paˉ tiˉ cawˬ ve chaw, hkiˬ tu‸ keuˆ ve chaw, awˬ tawnˇ paˍ hpeh‸ ve chaw,

21chi hkʼe ve Aˍronˍ awˬ ceuˬ awˬ hkʼaˇ teˇ gʼaˇ ka‸ ngaˬ hta‸ tuˉ tanˇ tuˬ maˇ gʼa tuˉ tanˇ laˇ.

22Chi hkʼe ve chaw teˇ hpaˍ lehˬ, ngaˬ hta‸ tanˇ laˇ ve da‸ kehˬ ve caˇ tuˬ hta‸ caˇ hpeh‸ ve yoˬ.

23Ya‸ hkʼaˇ, yawˇ lehˬ awˬ kuiˉ awˬ haiˇ teˇ ceuˬ ceuˬ cawˬ ve chaw hpeh‸ ve pa taw, yawˇ lehˬ da‸ kehˬ ve bawehˇ leh tuˉ tanˇ kuiˬ awˬ paˇ lo maˇ gʼa laˬ. Yawˇ lehˬ da‸ kehˬ ve awˬ ceuˬ oˇ ve teˇ hpaˍ hta‸ cha‸ chiˆ tuˬ maˇ gʼa te. Awˬ lawn kʼo, ngaˬ lehˬ Gʼuiˬsha hpeh‸ leh, awˬ ceuˬ oˇ ve teˇ hpaˍ hta‸ da‸ kehˬ piˇ taˍ ve yoˬ, teh‸ Gʼuiˬsha kʼoˆ ve yoˬ.

24Chi ve lehˬ, Aˍronˍ leh yawˇ ve yaˇ teˇ hpaˍ leh, Iˉsaˍreˍlaˆ chaw hui hta‸ Moˉseˍ kʼoˆ maˍ piˇ taˍ ve awˬ liˇ awˬ hkʼaˇ teˇ hpaˍ hpeh‸ ve yoˬ.

← Chapter 20 Jump to: Chapter 22 →