Leviticus 24

Lahu Bible Edited © Thailand Bible Society and Bible Society of Myanmar, 2010, 2020.

← Chapter 23 Jump to: Chapter 25 →

1Gʼuiˬsha Moˉseˍ hta‸ cuˇ leh Iˉsaˍreˍlaˆ chaw hui hta‸ chi hkʼe kʼoˆ piˇ ve yoˬ.

2Bon yehˬ hkʼaw lo awˬ yanˇ cawˇ cawˇ aˬ miˍ tuˉ taˍ hpeh‸ tuˬ, da‸ jaˇ ve shaˍ lonˍ chu teˇ hpaˍ gʼa yuˬ veu laˇ ve yoˬ.

3Teˇ haˉ le le Aˍronˍ lehˬ kawˆ faiˇ oˇ ve teˇ hpaˍ hta‸ aˬ miˍ gʼa tuˉ leh, mvuhˇ htiˇ la htaˇ hkʼa gaˬ gʼa teh taˍ ve yoˬ. Kawˆ faiˇ oˇ ve teˇ hpaˍ lehˬ, da‸ kehˬ jaˇ ve bawehˇ gʼuˇ suhˍ teh taˍ ve yoˬ. Iˉsaˍreˍlaˆ chaw teˇ co peuˬ teˇ co awˬ liˇ chi hta‸ hkʼa deh‸ gʼa na yuˬ ve yoˬ.

4Aˍronˍ lehˬ, shi yuˬ te taˍ ve kawˆ faiˇ chi teˇ hpaˍ hta‸ hkʼa deh‸ gʼa nyi leh, awˬ yanˇ cawˇ cawˇ gʼa tuˉ piˇ ve yoˬ.

5Caˬ hkʼa meu-e teˇ chi nyiˇ panˇ yuˬ leh hkaoˍmonˇ teˇ chi nyiˇ shiˍ gʼa te ve yoˬ.

6Hkaoˍmonˇ chi teˇ hpaˍ hta‸ nyiˇ cawˆ te leh, shi oˍ taˍ ve hpui lawˇ hkʼoˆ gʼa teh taˍ ve yoˬ.

7Gʼuiˬsha hta‸ tanˇ piˇ ve awˬ heˆ hpeh‸ tuˬ, hkaoˍmonˇ chi ve nyiˇ cawˆ awˬ kaˍ lo da‸ jaˇ ve sha hawnˉ gʼa keu taˍ ve yoˬ.

8Iˉsaˍreˍlaˆ chaw teˇ co peuˬ teˇ co, teˇ shinˉ le le hkaoˍmonˇ awˬ suhˉ teˇ hpaˍ gʼa yuˬ laˬ piˇ ve yoˬ.

9Hkaoˍmonˇ chi teˇ hpaˍ lehˬ, Aˍronˍ leh yawˇ ve awˬ ceuˬ awˬ hkʼaˇ teˇ hpaˍ awˬ pon hpeh‸ ve yoˬ. Yawˇ hui lehˬ da‸ kehˬ ve chehˇ kuiˬ hkʼaw hkaoˍmonˇ oˇ ve hta‸ gʼa caˇ ve yoˬ. Awˬ lawn kʼo, hkaoˍmonˇ oˇ ve teˇ hpaˍ lehˬ Gʼuiˬsha hta‸ tanˇ piˇ taˍ ve da‸ kehˬ ve hkaoˍmonˇ hpeh‸ ve yoˬ.

10Chaw teˇ gʼaˇ cawˬ ve yoˬ. Yawˇ awˬ pa lehˬ Eˇjiˇtu‸ chaw hpeh‸ leh, yawˇ ve awˬ e lehˬ Iˉsaˍreˍlaˆ chaw Danˍ awˬ ceuˬ awˬ hkʼaˇ Diˇbaˍriˆ ve yaˇ miˇ Sheˍlawˇmiˆ hpeh‸ ve yoˬ. Chaw oˇ ve lehˬ, teˇ nyi htaˇ Iˉsaˍreˍlaˆ chaw teˇ gʼaˇ hta‸ ya‸ da‸ leh, Gʼuiˬsha hta‸ hkʼa mvuhˇ hkʼa na kʼoˆ ve yoˬ.

12Hkʼe te leh, yawˇ hui yawˇ hta‸ Moˉseˍ geh shiˍ kʼai leh, yawˇ hta‸ hkʼaˬ hkʼe te piˇ tuˬ ve Gʼuiˬsha geh tawˇ gʼa kaˇ htaˇ hkʼa gaˬ haw taˍ ve yoˬ.

13Oˇ htaˇ Gʼuiˬsha Moˉseˍ hta‸ chi hkʼe kʼoˆ piˇ ve yoˬ. Chaw oˇ ve hta‸ fa la awˬ baˬ hpawˇ lo shiˍ kʼai-o. Yawˇ Gʼuiˬsha hta‸ hkʼa mvuhˇ hkʼa na kʼoˆ ve awˬ hkawˇ hta‸ hkʼa gʼa kaˇ ve chaw hkʼa peu-eˬ, yawˇ ve oˉ kʼoˍ hkʼoˆ lo a shu yawˇ ve la‸ sheh taˍ leh, yawˇ venˇbaˆ cawˬ ve teh‸ shaˉ hkiˆ hkanˍ tcuh-o. Oˇ hkʼe te peuˬ hkʼaw‸ nawˉ, yawˇ hta‸ haˉ pui baˬ pehˍ piˇ-oˆ.

15Gʼuiˬsha hta‸ hkʼa mvuhˇ hkʼa na kʼoˆ ve chaw hkʼaˬ ve teˇ gʼaˇ maˇ kʼo, chi hkʼe haˉ pui baˬ pehˍ ve hta‸ gʼa hkanˍ tuˬ yoˬ, teh‸ yawˇ hui hta‸ kʼoˆ piˇ ve yoˬ.

16Iˉsaˍreˍlaˆ chaw, maˇ heˆ kʼo yawˇ hui geh ca chehˇ la taˍ ve chaw hkʼaˬ ve teˇ gʼaˇ maˇ kʼoˆ, Gʼuiˬsha hta‸ hkʼa mvuhˇ hkʼa na kʼoˆ ve kʼo, chi hkʼe haˉ pui gʼa baˬ pehˍ piˇ ve yoˬ.

17Chaw hta‸ tiˇ pehˍ ve chaw hkʼaˬ ve teˇ gʼaˇ hta‸ maˇ kʼoˆ, gʼa tiˇ pehˍ piˇ ve yoˬ.

18Shu ve to nuˇ to shaˆ hta‸ tiˇ pehˍ ve chaw htawˇ, gʼa kʼaw‸ shaiˍ piˇ ve yoˬ. A sha‸ teˇ maˬ suh-e ve awˬ tan, a sha‸ teˇ maˬ gʼa kʼaw‸ shaiˍ piˇ ve yoˬ.

19Shu hta‸ naˬ tuˬ te piˇ ve chaw lehˬ, yawˇ shu hta‸ te piˇ ve hkʼe, yawˇ hta‸ oˇ hkʼe gʼa kʼaw‸ te hkʼaw‸ piˇ ve yoˬ.

20Yawˇ lehˬ shu ve awˬ mu‸ ku hta‸ te hteh piˇ ve kʼo, yawˇ ve awˬ mu‸ ku hta‸ gʼa kʼaw‸ te hteh piˇ ve yoˬ. Yawˇ shu ve mehˆ shiˍ hta‸ te cuˉ piˇ ve kʼo, yawˇ ve mehˆ shiˍ hta‸ gʼa kʼaw‸ te cuˉ piˇ ve yoˬ. Yawˇ shu ve ciˬ teˇ maˬ hta‸ te hkʼeh‸ piˇ ve kʼo, yawˇ ve ciˬ teˇ maˬ hta‸ gʼa kʼaw‸ te hkʼeh‸ piˇ ve yoˬ. Yawˇ shu hta‸ te piˇ ve hkʼe, yawˇ hta‸ oˇ hkʼe gʼa kʼaw‸ te hkʼaw‸ piˇ ve yoˬ.

21Shu ve to nuˇ to shaˆ hta‸ tiˇ pehˍ ve chaw lehˬ, gʼa kʼaw‸ shaiˍ piˇ ve yoˬ. Ya‸ hkʼaˇ, chaw hta‸ tiˇ pehˍ ve chaw hta‸ gʼa kʼaw‸ tiˇ pehˍ piˇ ve yoˬ.

22Iˉsaˍreˍlaˆ chaw maˇ kʼo, nawˬ hui geh ca chehˇ la taˍ ve awˬ nu ve chaw teˇ hpaˍ maˇ kʼoˆ, awˬ liˇ chi hta‸ hkʼa deh‸ gʼa na yuˬ ve yoˬ. Awˬ lawn kʼo, ngaˬ lehˬ nawˬ hui ve Gʼuiˬsha hpeh‸ ve yoˬ, teh‸ kʼoˆ ve yoˬ.

23Awˬ lawn chi teˇ hpaˍ Moˉseˍ yawˇ hui hta‸ kʼoˆ maˍ piˇ ve teˇ yanˇ, yawˇ hui chaw oˇ ve hta‸ fa la awˬ baˬ hpawˇ lo shiˍ kʼai leh haˉ pui baˬ pehˍ piˇ ve yoˬ. Yawˇ hui lehˬ Gʼuiˬsha Moˉseˍ hta‸ kʼoˆ piˇ taˍ ve tawˇ teˇ hpaˍ hta‸ hkʼa deh‸ na yuˬ ve yoˬ.

← Chapter 23 Jump to: Chapter 25 →