Leviticus 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to: Chapter 23 →

1Gʼuiˬsha Moˉseˍ hta‸ cuˇ leh, Aˍronˍ leh yawˇ ve yaˇ teˇ hpaˍ hta‸ chi hkʼe kʼoˆ piˇ ve yoˬ.

2Nawˬ hui lehˬ ngaˬ ve awˬ meh hta‸ cha‸ chiˆ tuˬ maˇ gʼa te. Chaw yaˇ teˇ hpaˍ ngaˬ geh lo yuˬ veu laˇ ve tanˇ tuˬ teˇ hpaˍ hta‸ nawˬ hui hkʼa deh‸ gʼa yawˆ yan ve yoˬ. Ngaˬ lehˬ Gʼuiˬsha hpeh‸ ve yoˬ.

3Nawˬ hui ve awˬ ceuˬ awˬ hkʼaˇ teˇ gʼaˇ gʼaˇ maˇ da‸ maˇ kehˬ ve hkʼaw, Iˉsaˍ reˍlaˆ chaw teˇ hpaˍ ngaˬ geh lo yuˬ veu laˇ ve tanˇ tuˬ hta‸ ha‸ yuˬ ve kʼo, yawˇ hta‸ ngaˬ ve paw hkuˇ te tcuh tuˬ ve maˇ heˆ. Ngaˬ lehˬ Gʼuiˬsha hpeh‸ ve yoˬ.

4Nawˬ hui ve awˬ ceuˬ awˬ hkʼaˇ awˬ hkʼaw lo, hkiˬ tu‸ keuˆ ve chaw, maˇ heˆ kʼo maˇ da‸ ve awˬ gʼuiˬ ya‸ ve chaw lehˬ, da‸ kehˬ ve caˇ tuˬ chi teˇ hpaˍ hta‸ maˇ gʼa caˇ. Paw hkuˇ teˇ gʼaˇ lehˬ, suh taˍ ve awˬ to hta‸ ca htawˇ ve, maˇ heˆ kʼo yawˇ ve awˬ gʼuiˬ tawˆ-e ve,

5maˇ heˆ kʼo, maˇ da‸ kehˬ ve chaw leh to nuˇ to shaˆ hta‸ ca htawˇ ve kʼo, yawˇ lehˬ maˇ da‸ kehˬ.

6Cha‸ chiˆ kʼai ve paw hkuˇ teˇ gʼaˇ lehˬ, mvuhˇ maˇ hpeu‸ la sheˍ ve ceh ceh maˇ da‸ kehˬ. Mvuhˇ hpeu‸ la peuˬ ka‸ yawˇ iˉ kaˆ maˇ hehˉ ve kʼo, da‸ kehˬ ve caˇ tuˬ hta‸ maˇ gʼa caˇ.

7Mvuhˇ nyi lo‸-e htaˇ heh‸ yawˇ kʼaw‸ da‸ kehˬ la leh, da‸ kehˬ ve caˇ tuˬ hta‸ caˇ hpeh‸ ve yoˬ.

8Yawˇ lehˬ, yawˇ hkʼaˇ yawˇ suh-e ve ceˇ, maˇ heˆ kʼo haiˬ ve to nuˇ to shaˆ che‸ caˇ ve ceˇ hta‸ maˇ gʼa caˇ. Yawˇ caˇ ve kʼo cha‸ chiˆ kʼai ve yoˬ. Ngaˬ lehˬ Gʼuiˬsha hpeh‸ ve yoˬ.

9Paw hkuˇ teˇ hpaˍ lehˬ, ngaˬ piˇ taˍ ve awˬ liˇ awˬ hkʼaˇ hkʼa peu-eˬ ve hta‸ hkʼa deh‸ gʼa na yuˬ ve yoˬ. Oˇ hkʼe maˇ te ve kʼo, yawˇ hui venˇbaˆ cawˬ leh gʼa suh-e tuˬ yoˬ. Ngaˬ lehˬ Gʼuiˬsha hpeh‸ leh, yawˇ hui hta‸ da‸ kehˬ la piˇ taˍ ve yoˬ.

10Paw hkuˇ ve awˬ ceuˬ awˬ hkʼaˇ teˇ hpaˍ ceh tiˉ, da‸ kehˬ ve tanˇ tuˬ hta‸ caˇ hpeh‸ ve yoˬ. Awˬ nu ve chaw teˇ gʼaˇ ka‸ maˇ gʼa yuˬ caˇ.

11Ya‸ hkʼaˇ, paw hkuˇ yawˇ vuiˬ yuˬ taˍ ve awˬ ceˬ, maˇ heˆ kʼo yawˇ ve yehˬ hkʼaw paw la taˍ ve awˬ ceˬ lehˬ paw hkuˇ ve caˇ tuˬ hta‸ caˇ hpeh‸ ve yoˬ.

12Paw hkuˇ ve yaˇ miˇ lehˬ, paw hkuˇ maˇ heˆ ve chaw hta‸ ca heuˆ ve kʼo, da‸ kehˬ ve caˇ tuˬ oˇ ve hta‸ maˇ gʼa caˇ.

13Ya‸ hkʼaˇ, mehˇchawˇma hpeh‸ ve yawˇ ve yaˇ miˇ, maˇ heˆ kʼo shu baˬ taˉ ve yawˇ ve yaˇ miˇ yawˇ geh ca kʼaw‸ chehˇ la ve kʼo, yawˇ lehˬ caˇ tuˬ oˇ ve hta‸ caˇ hpeh‸ ve yoˬ. Paw hkuˇ ve yehˬ yaˇ kʼa yaˇ teˇ hpaˍ ceh tiˉ, caˇ tuˬ oˇ ve hta‸ gʼa caˇ ve yoˬ.

14Paw hkuˇ awˬ ceuˬ awˬ hkʼaˇ maˇ heˆ ve chaw teˇ gʼaˇ lehˬ, maˇ shiˍ ve awˬ hkʼaw lo da‸ kehˬ ve caˇ tuˬ oˇ ve hta‸ gʼa caˇ peuˬ ve kʼo, yawˇ lehˬ caˇ tuˬ oˇ ve awˬ hpfuhˇ paw hkuˇ hta‸ gʼa kʼaw‸ shaiˍ pi ˇ ve awˬ hkʼoˆ, awˬ leuˉ htawˇ ngaˇ pun teˇ pun gʼa kʼaw‸ piˇ ve yoˬ.

15Paw hkuˇ lehˬ, da‸ kehˬ ve caˇ tuˬ teˇ hpaˍ hta‸ yuˬ leh, awˬ nu ve chaw hui hta‸ maˇ gʼa caˍ piˇ.

16Chi hkʼe te ve chaw lehˬ, venˇbaˆ cawˬ leh ciˍ yanˍ ve hta‸ gʼa hkanˍ tuˬ yoˬ. Ngaˬ lehˬ Gʼuiˬsha hpeh‸ leh, tanˇ tuˬ teˇ hpaˍ hta‸ da‸ kehˬ piˇ taˍ ve yoˬ, teh‸ Gʼuiˬsha kʼoˆ ve yoˬ.

17Gʼuiˬsha Moˉseˍ hta‸ cuˇ leh, Aˍronˍ leh yawˇ ve yaˇ teˇ hpaˍ leh Iˉsaˍreˍ laˆ chaw hui hta‸ awˬ liˇ awˬ hkʼaˇ chi teˇ hpaˍ kʼaw‸ kʼoˆ piˇ ve yoˬ.

18Iˉsaˍreˍlaˆ chaw maˇ kʼoˆ, yawˇ hui geh ca chehˇ la taˍ ve awˬ nu ve chaw maˇ kʼoˆ, Gʼuiˬsha hta‸ aˬ miˍ tuˉ tanˇ piˇ tuˬ ve ceˇ teˇ hkeh yuˬ veu laˇ ve kʼo, ceˇ oˇ ve lehˬ te‸ chiˉ awˬ kuiˉ awˬ haiˇ maˇ cawˬ ve ceˇ gʼa hpeh‸ piˇ ve yoˬ.

19Gʼuiˬsha ha‸ yuˬ laˇ hpeh‸ tuˬ, ceˇ oˇ ve lehˬ te‸ chiˉ awˬ kuiˉ awˬ haiˇ maˇ cawˬ ve ceˇ awˬ paˍ gʼa hpeh‸ piˇ ve yoˬ.

20Awˬ kuiˉ awˬ haiˇ cawˬ ve ceˇ hta‸ nawˬ yuˬ leh tuˉ tanˇ piˇ ve kʼo, Gʼuiˬsha ha‸ yuˬ laˇ tuˬ ve maˇ heˆ.

21Chaw teˇ gʼaˇ Gʼuiˬsha hta‸ awˬ chawˇ te da‸ ve tuˉ tanˇ tuˬ tanˇ piˇ gaˇ ve kʼo, tuˉ tanˇ tuˬ oˇ ve hta‸ Gʼuiˬsha ha‸ yuˬ laˇ hpeh‸ tuˬ, ceˇ oˇ ve lehˬ te‸ chiˉ awˬ kuiˉ awˬ haiˇ maˇ cawˬ ve ceˇ gʼa hpeh‸ piˇ ve yoˬ.

22Mehˆ cuˉ ve, hkui luˬ ve, nyi maˇ sha ve, leh buiˇ tcuhˉ taˍ ve ceˇ teˇ hpaˍ hta‸ nawˬ yuˬ leh Gʼuiˬsha hta‸ maˇ gʼa tuˉ tanˇ piˇ.

23Ya‸ hkʼaˇ, nawˬ hkʼaˇ nawˬ ha lehˬ leh tanˇ piˇ gaˇ ve kʼo, hkui luˬ la‸ luˬ ve ceˇ hta‸ htawˇ yuˬ leh tanˇ piˇ hpeh‸ ve yoˬ. Ya‸ hkʼaˇ Gʼuiˬsha hta‸ teˇ ceuˬ ceuˬ ka ti‸ te leh tanˇ piˇ ve kʼo, oˇ hkʼe ve ceˇ hta‸ nawˬ maˇ gʼa yehˇ.

24Piˉ taˍ peuˬ ve ceˇ hta‸ nawˬ yuˬ leh Gʼuiˬsha hta‸ maˇ gʼa tuˉ tanˇ piˇ. Nawˬ hui ve mvuhˇmiˬ hkʼaw chi hkʼe te tuˬ a hkaw-anˬ maˇ cawˬ.

25Gʼuiˬsha hta‸ tanˇ piˇ tuˬ ve ceˇ lehˬ, awˬ nu ve chaw ceuˬ teˇ hpaˍ geh vuiˬ yuˬ taˍ ve ceˇ maˇ gʼa hpeh‸ piˇ. Oˇ hkʼe ve ceˇ hta‸ Gʼuiˬsha lehˬ awˬ kuiˉ awˬ haiˇ cawˬ ve ceˇ hkʼa shuˍ shawˍ taˍ leh ha‸ yuˬ laˇ tuˬ ve maˇ heˆ.

26Nuˇ ehˉ, yawˬ ehˉ, leh aˉ che‸ ehˉ paw la ve teˇ yanˇ, awˬ yehˇ oˇ ve hta‸ awˬ ma peuˍ geh suhˍ nyi hkʼa gaˬ gʼa teh taˍ ve yoˬ. Oˇ ve hkʼaw‸ nawˉ, Gʼuiˬsha hta‸ tanˇ piˇ hpeh‸ ve yoˬ.

28Nuˇ ma peuˍ leh nuˇ ehˉ, yawˬ ma peuˍ leh yawˬ ehˉ, aˉ che‸ ma peuˍ leh aˉ che‸ ehˉ, hta‸ teˇ nyi tiˉ awˬ hkʼaw lo Gʼuiˬsha hta‸ maˇ gʼa tuˉ tanˇ piˇ.

29Nawˬ lehˬ bon chiˇ mvuh ve tuˉ tanˇ tuˬ tuˉ tanˇ piˇ ve kʼo, nawˬ ve tuˉ tanˇ tuˬ hta‸ Gʼuiˬsha ha‸ yuˬ laˇ hpeh‸ tuˬ, awˬ liˇ awˬ hkʼaˇ cawˇ cawˇ gʼa te tuˉ tanˇ piˇ ve yoˬ.

30Tuˉ tanˇ piˇ ve shaˍ oˇ ve hta‸, oˇ ve teˇ nyi tiˉ awˬ hkʼaw lo gʼa caˇ peuˬ piˇ ve yoˬ. Shawˉ pawˍ mvuhˇ htiˇ la htaˇ hkʼa gaˬ maˇ gʼa cawˬ taˍ piˇ.

31Gʼuiˬsha chi hkʼe kʼoˆ ve yoˬ. Ngaˬ ve awˬliˇtawˇhkawˇ teˇ hpaˍ hta‸ na yuˬ-o‸. Ngaˬ lehˬ Gʼuiˬsha hpeh‸ ve yoˬ.

32Ngaˬ ve awˬ meh hta‸ cha‸ chiˆ tuˬ maˇ gʼa te. Ngaˬ lehˬ da‸ kehˬ jaˇ ve hta‸ Iˉsaˍ reˍlaˆ chaw hkʼa peu-eˬ shiˍ-o‸. Ngaˬ lehˬ Gʼuiˬsha hpeh‸ leh, nawˬ hui hta‸ da‸ kehˬ piˇ taˍ ve yoˬ.

33Ngaˬ lehˬ nawˬ hui hta‸ Eˇjiˇtu‸ mvuhˇmiˬ hkʼaw lo shiˍ tawˆ la piˇ taˍ ve nawˬ hui ve Gʼuiˬsha hpeh‸ ve yoˬ, teh‸ kʼoˆ ve yoˬ.

← Chapter 21 Jump to: Chapter 23 →