Leviticus 23

Lahu Bible Edited © Thailand Bible Society and Bible Society of Myanmar, 2010, 2020.

← Chapter 22 Jump to: Chapter 24 →

1Gʼuiˬsha Moˉseˍ hta‸ cuˇ leh, bon pawehˇ te ve awˬ lawn chi teˇ hpaˍ Iˉsaˍreˍlaˆ chaw hui hta‸ kʼoˆ piˇ taˍ ve yoˬ.

2Nawˬ hui a shu yawˇ ve kanˉ te caˇ tuˬ hkaw‸ nyi cawˬ ve yoˬ.

3Ya‸ hkʼaˇ, shinˉ nyi hpeh‸ ve suhˍ nyi teˇ nyi lehˬ, gʼaˇ jehˇ ve awˬ nyi hpeh‸ ve hta‸ nawˬ hui gʼa dawˇ nawˇ taˍ ve yoˬ. Awˬ nyi oˇ ve gaˬ la htaˇ, nawˬ hui kanˉ maˇ gʼa te. Bon gʼa lawˬ ve yoˬ. Shinˉ nyi lehˬ Gʼuiˬsha hta‸ caˉ da‸ ve yoˬ.

4Awˬ hawˉ lo kʼoˆ taˍ ve bon pawehˇ teˇ hpaˍ hta‸ awˬ yanˇ cawˇ cawˇ gʼa te ve yoˬ.

5Paˍsaˍhkaˍ pawehˇ hta‸ awˉ lawˉ peuˇ ve teˇ ha pa teˇ chi awˇ nyi, mvuhˇ nyi lo‸-e htaˇ gʼa tanˬ te ve yoˬ.

6Teˇ chi ngaˇ nyi teˇ nyi htaˇ, diˇ maˇ keu ve hkaoˍmonˇ caˇ ve pawehˇ gʼa te ve yoˬ. Suhˍ nyi hkʼa gaˬ, nawˬ hui lehˬ diˇ keu taˍ ve hkaoˍmonˇ hta‸ maˇ gʼa caˇ.

7Pawehˇ tanˬ te ve awˉ lawˉ peuˇ teˇ nyi htaˇ, nawˬ hui hkʼa peu-eˬ bon lawˬ kuiˬ lo gʼa kʼai leh, teˇ gʼaˇ ka‸ kanˉ maˇ gʼa te.

8Suhˍ nyi hkʼa gaˬ nawˬ hui Gʼuiˬsha hta‸ gʼa tuˉ tanˇ piˇ ve yoˬ. Suhˍ nyi teˇ nyi gaˬ htaˇ, nawˬ hui bon teˇ pawˆ gʼa kʼaw‸ lawˬ ve yoˬ. Chaw teˇ gʼaˇ ka‸ kanˉ maˇ gʼa te.

9Gʼuiˬsha nawˬ hui hta‸ piˇ laˇ taˍ ve mvuhˇmiˬ oˇ ve hkʼaw gaˬ leh, awˬ shiˍ awˬ nu gʼeu‸ jaw‸ ve teˇ yanˇ, caˬ kʼa‸ teˇ tsuh‸ yuˬ leh paw hkuˇ hta‸ gʼa piˇ ve yoˬ.

11Gʼuiˬsha nawˬ hui hta‸ ha‸ yuˬ laˇ hpeh‸ tuˬ, yawˇ lehˬ caˬ kʼa‸ oˇ ve Gʼuiˬsha hta‸ gʼa tanˇ piˇ ve yoˬ. Paw hkuˇ lehˬ caˬ kʼa‸ oˇ ve hta‸ shinˉ nyi ponˬ peuˬ hkʼaw‸ nawˉ, shinˉ peuˬ teˇ nyi htaˇ gʼa tanˇ piˇ ve yoˬ.

12Caˬ kʼa‸ oˇ ve Gʼuiˬsha hta‸ tanˇ piˇ ve teˇ nyi htaˇ, nawˬ hui lehˬ te‸ chiˉ awˬ kuiˉ awˬ haiˇ maˇ cawˬ leh teˇ hkʼaw‸ gaˬ peuˬ ve yawˬ awˬ paˍ teˇ hkeh yuˬ leh aˬ miˍ gʼa tuˉ tanˇ piˇ ve yoˬ.

13Yawˬ ehˉ oˇ ve geh teˇ geh shaˍ lonˍ chu hkaw‸ taˍ ve caˬ hkʼa meu-e nyiˇ panˇ hta‸ htawˇ gʼa tanˇ piˇ ve yoˬ. Chi ve lehˬ, awˬ shaˉ hawnˉ leh Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ. Tuˉ tanˇ tuˬ chi ve geh a pehˉ meuˇ gʼuiˬ teˇ kaw hta‸ htawˇ gʼa tanˇ piˇ ve yoˬ.

14Awˬ shiˍ awˬ nu awˬ suhˉ Gʼuiˬsha hta‸ maˇ gʼa tanˇ piˇ sheˍ ve ceh ceh, nawˬ hui maˇ gʼa teˍ caˇ. Hkaoˍmonˇ ka‸ maˇ gʼa te caˇ. Nawˬ hui teˇ co peuˬ teˇ co chi ve hta‸ hkʼaˬ htaˆ ka‸ gʼa dawˇ nawˇ taˍ ve yoˬ.

15Nawˬ hui ve caˬ kʼa‸ Gʼuiˬsha hta‸ tanˇ piˇ peuˬ hkʼaw‸ nawˉ, suhˍ shinˉ biˇ peuˬ leh

16ngaˇ chi nyi teˇ nyi htaˇ Gʼuiˬsha hta‸ caˬ shiˍ awˬ suhˉ teˇ pawˆ gʼa kʼaw‸ tanˇ piˇ ve yoˬ.

17Yehˬ kʼa teˇ maˬ le le hkaoˍmonˇ nyiˇ shiˍ te leh Gʼuiˬsha hta‸ gʼa tanˇ piˇ ve yoˬ. Hkaoˍmonˇ teˇ shiˍve caˬ hkʼa meu-e nyiˇ panˇ gʼa yuˬ te leh, diˇ gʼa hkaw‸ taˍ ve yoˬ.

18Hkaoˍmonˇ oˇ ve teˇ hpaˍ geh teˇ geh, Iˉsaˍreˍlaˆ chaw teˇ hpaˍ lehˬ, a sha‸ teˇ hkʼaw‸ gaˬ peuˬ leh te‸ chiˉ awˬ kuiˉ awˬ haiˇ maˇ cawˬ ve yawˬ ehˉ suhˍ hkeh, nuˇ paˍ lonˉ teˇ hkeh, aˉ che‸ nyiˇ hkeh yuˬ leh gʼa tanˇ piˇ ve yoˬ. To nuˇ to shaˆ oˇ ve teˇ hpaˍ geh teˇ geh awˬ shiˍ awˬ nu tuˉ tanˇ tuˬ leh, a pehˉ meuˇ gʼuiˬ tuˉ tanˇ tuˬ teˇ hpaˍ gʼa tanˇ piˇ ve yoˬ. Chi ve lehˬ, awˬ shaˉ hawnˉ leh Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ.

19Chi hkʼoˆ ka‸, nawˬ hui lehˬ venˇbaˆ hpehˇ ve tuˉ tanˇ tuˬ awˬ pon aˉ che‸ teˇ hkeh leh, awˬ chawˇ te da‸ ve tuˉ tanˇ tuˬ awˬ pon, a sha‸ teˇ hkʼaw‸ gaˬ peuˬ ve yawˬ awˬ paˍ nyiˇ hkeh gʼa tuˉ tanˇ ve yoˬ.

20Paw hkuˇ lehˬ, hkaoˍmonˇ leh yawˬ ehˉ oˇ ve nyiˇ hkeh Gʼuiˬsha hta‸ gʼa tanˇ piˇ ve yoˬ. Tanˇ tuˬ oˇ ve teˇ hpaˍ lehˬ da‸ kehˬ jaˇ ve yoˬ.

21Oˇ ve teˇ nyi htaˇ, nawˬ hui teˇ gʼaˇ ka‸ kanˉ maˇ gʼa te. Bon gʼa lawˬ ve yoˬ. Nawˬ hui hkʼaˬ lo chehˇ ve maˇ kʼoˆ, pawehˇ chi hta‸ teˇ co peuˬ teˇ co hkʼa deh‸ na yuˬ leh gʼa te ve yoˬ.

22Nawˬ hui caˬ gʼeu‸ ve teˇ yanˇ, ti mi awˬ jaˇ lo cawˬ ve caˬ hta‸ maˇ gʼa gʼeu‸ yuˬ. Caˬ gʼeu‸ peuˬ hkʼaw‸ nawˉ, sheˆ taˍ ve caˬ nu teˇ hpaˍ hta‸ ka‸ nawˬ hui maˇ gʼa kʼaw‸ gʼawˆ yuˬ. Oˇ ve teˇ hpaˍ hta‸ haˍ ve gʼawˇ ve chaw leh, hkehˉ chaw teˇ hpaˍ awˬ pon gʼa teh taˉ piˇ ve yoˬ. Ngaˬ lehˬ nawˬ hui ve Gʼuiˬsha hpeh‸ ve yoˬ.

23Ha pa suhˍ maˬ teˇ maˬ, awˉ lawˉ peuˇ ve teˇ nyi htaˇ, nawˬ hui kanˉ maˇ te leh gʼa jehˇ taˍ ve yoˬ. Behˬ heh ma hkawˇ bvuhˬ tawˆ la ve teˇ yanˇ, Gʼuiˬsha hta‸ oˉ kʼoˍ pui tuˬ nawˬ hui gʼa hpawnˬ laˬ ve yoˬ.

25Gʼuiˬsha hta‸ nawˬ hui gʼa tuˉ tanˇ piˇ leh, teˇ gʼaˇ ka‸ kanˉ maˇ gʼa te.

26Ha pa suhˍ maˬ teˇ maˬ, teˇ chi nyi teˇ nyi lehˬ nawˬ hui ve venˇbaˆ yuˬ baˬ tuˬ, tuˉ tanˇ piˇ ve awˬ nyi hpeh‸ ve yoˬ. Oˇ ve teˇ nyi gaˬ htaˇ, nawˬ hui te‸ chiˉ maˇ gʼa caˇ. Gʼuiˬsha hta‸ oˉ kʼoˍ pui tuˬ gʼa hpawnˬ da‸ leh, Gʼuiˬsha hta‸ gʼa tuˉ tanˇ piˇ ve yoˬ.

28Kanˉ maˇ gʼa te. Awˬ lawn kʼo, chi teˇ nyi lehˬ chaw yaˇ ve venˇbaˆ hta‸ yuˬ baˬ ve awˬ nyi hpeh‸ ve pa taw yoˬ.

29Oˇ ve teˇ nyi htaˇ caˇ tuˬ caˇ ve chaw hta‸ Gʼuiˬsha ve chaw teh‸ kʼaw‸ shawˍ piˇ tuˬ ve maˇ heˆ.

30Oˇ ve teˇ nyi htaˇ kanˉ te ve chaw hta‸ htawˇ Gʼuiˬsha tiˇ pehˍ piˇ tuˬ yoˬ.

31Nawˬ hui hkʼaˬ lo chehˇ ve maˇ kʼoˆ, awˬ liˇ chi hta‸ teˇ co peuˬ teˇ co hkʼa deh‸ gʼa na yuˬ ve yoˬ.

32Ha pa oˇ ve teˇ maˬ kʼawˇ nyi mvuhˇ hpeu‸ mvuhˇ nyi lo‸-e ve awˬ yanˇ hta‸ te leh, teˇ chi nyi mvuhˇ hpeu‸ mvuhˇ nyi lo‸-e ve awˬ yanˇ hkʼa gaˬ, nawˬ hui gʼa ce ka leh te‸ chiˉ maˇ gʼa caˇ.

33Aˉ po kʼo pawehˇ chi hta‸ ha pa suhˍ maˬ teˇ maˬ, teˇ chi ngaˇ nyi htaˇ gʼa tanˬ te leh, suhˍ nyi hkʼa gaˬ gʼa te ve yoˬ.

35Awˉ lawˉ peuˇ ve teˇ nyi htaˇ nawˬ hui Gʼuiˬsha hta‸ oˉ kʼoˍ gʼa pui leh, teˇ gʼaˇ ka‸ kanˉ maˇ gʼa te.

36Pawehˇ chi hta‸ te chehˇ ve suhˍ nyi awˬ hkʼaw lo, teˇ nyi le le nawˬ hui Gʼuiˬsha hta‸ gʼa tuˉ tanˇ piˇ ve yoˬ. Hiˉ nyi teˇ nyi gaˬ htaˇ, nawˬ hui Gʼuiˬsha hta‸ oˉ kʼoˍ teˇ pawˆ gʼa kʼaw‸ pui leh, gʼa tuˉ tanˇ piˇ ve yoˬ. Chaw teˇ gʼaˇ ka‸ kanˉ maˇ gʼa te.

37(Pawehˇ chi teˇ hpaˍ lehˬ bon pawehˇ hpeh‸ve pa taw, nawˬ hui Gʼuiˬsha hta‸ gʼa taˍ uiˍ leh oˉ kʼoˍ gʼa pui ve yoˬ. Aˬ miˍ tuˉ tanˇ tuˬ, awˬ shiˍ awˬ nu tuˉ tanˇ tuˬ, a pehˉ meuˇ gʼuiˬ leh awˬ nu ve tuˉ tanˇ tuˬ teˇ hpaˍ teˇ nyi le le hkʼa deh‸ gʼa tuˉ tanˇ piˇ ve yoˬ.

38Pawehˇ chi teˇ hpaˍ awˬ hkʼaw lo nawˬ hui tanˇ piˇ ve teˇ hpaˍ lehˬ, teˇ shinˉ le le nawˬ hui tanˇ piˇ chehˇ ve tuˉ tanˇ tuˬ, nawˬ hui Gʼuiˬsha hta‸ piˇ tuˬ ka ti‸ te taˍ ve tanˇ tuˬ, leh a shu yawˇ nyi ma cawˬ ve hkʼe Gʼuiˬsha hta‸ tanˇ piˇ ve tanˇ tuˬ teˇ hpaˍ hta‸ maˇ caˉ da‸.)

39Nawˬ hui awˬ shiˍ awˬ nu gʼeu‸ jaw‸ peuˬ hkʼaw‸ nawˉ, ha pa suhˍ maˬ teˇ maˬ 15 nyi hta‸ tanˬ leh pawehˇ chi ve hta‸ suhˍ nyi hkʼa gaˬ gʼa te ve yoˬ. Awˉ lawˉ peuˇ ve teˇ nyi lehˬ, gʼaˇ jehˇ ve awˬ nyi hpeh‸ ve yoˬ.

40Oˇ ve teˇ nyi htaˇ, nawˬ hui ve hko hkʼaw tawˆ ve da‸ jaˇ ve iˉ shiˍ teˇ hpaˍ, tcuhˉ pui kʼaˉ teˇ hpaˍ leh awˬ nu ve awˬ hpa‸ da‸ ve suhˆ kʼaˉ teˇ hpaˍ hta‸ yuˬ leh, nawˬ hui ve Gʼuiˬsha hta‸ taˍ uiˍ taˍ mvuh piˇ ve pawehˇ gʼa te ve yoˬ.

41Suhˍ nyi hkʼa gaˬ pawehˇ chi hta‸ te-o. Nawˬ hui teˇ co peuˬ teˇ co pawehˇ chi hta‸ hkʼa deh‸ gʼa te ve yoˬ.

42Iˉsaˍreˍlaˆ chaw hkʼa peu-eˬ, suhˍ nyi hkʼa gaˬ aˉ po kʼo hkʼaw tiˉ gʼa chehˇ ve yoˬ.

43Chi hkʼe te ve lehˬ, Gʼuiˬsha Iˉsaˍreˍlaˆ chaw hui hta‸ Eˇjiˇtu‸ mvuhˇmiˬ hkʼaw lo shiˍ tawˆ la piˇ chehˇ htaˇ, yawˇ hui aˉ po kʼo hkʼaw gʼa chehˇ ve hta‸ nawˬ hui ve awˬ ceuˬ awˬ hkʼaˇ teˇ hpaˍ gʼa shiˍ tuˬ awˬ pon hpeh‸ve yoˬ. Yawˇ lehˬ nawˬ hui ve Jawˇmawˇ Gʼuiˬsha hpeh‸ ve yoˬ.

44Gʼuiˬsha hta‸ taˍ uiˍ taˍ mvuh ve bon pawehˇ chi teˇ hpaˍ hta‸ hkʼaˬ hkʼe gʼa te cawˇ ve awˬ liˇ awˬ hkʼaˇ chi teˇ hpaˍ Moˉseˍ Iˉsaˍreˍlaˆ chaw hui hta‸ kʼoˆ maˍ piˇ ve yoˬ.

← Chapter 22 Jump to: Chapter 24 →