Leviticus 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Chaw teˇ gʼaˇ Gʼuiˬsha hta‸ awˬ shiˍ awˬ nu tuˉ tanˇ piˇ gaˇ ve kʼo, yawˇ lehˬ awˬ shiˍ awˬ nu oˇ ve teˇ hpaˍ hta‸ gʼa teˍ meu-e piˇ leh, shaˍlonˍ chu leh sha hawnˉ hkaw‸ da‸ peuˬ hkʼaw‸ nawˉ,

2Aˍronˍ awˬ ceuˬ awˬ hkʼaˇ paw hkuˇ teˇ hpaˍ geh gʼa yuˬ laˬ ve yoˬ. Paw hkuˇ lehˬ awˬ meu-e oˇ ve teˇ kaˆ, shaˍlonˍ chu a ciˉ leh sha hawnˉ hkʼa peu-eˬ hta‸ yuˬ leh, tuˉ tanˇ kuiˬ hkʼoˆ gʼa tuˉ tanˇ piˇ ve yoˬ. Chi hkʼe ve tuˉ tanˇ tuˬ lehˬ awˬ shaˉ hawnˉ leh, Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ.

3Cawˬ taˍ sheˬ ve caˬ hkʼa meu-e lehˬ paw hkuˇ teˇ hpaˍ awˬ pon hpeh‸ ve yoˬ. Oˇ ve lehˬ da‸ kehˬ jaˇ ve yoˬ. Awˬ lawn kʼo, oˇ ve lehˬ Gʼuiˬsha hta‸ tuˉ tanˇ ve caˇ tuˬ hkʼaw yuˬ tawˆ taˍ ve pa taw yoˬ.

4Gʼuiˬsha hta‸ tanˇ piˇ tuˬ ve hkaoˍmonˇ lehˬ, mu‸ hkʼu hkʼaw te ve kʼo, diˇmaˇ gʼa keu. Caˬ hkʼa meu-e hta‸ shaˍlonˍ chu hkaw‸ leh te taˍ ve hkaoˍmonˇ gʼa hpeh‸ piˇ ve yoˬ.

5Gʼuiˬsha hta‸ tanˇ piˇ tuˬ ve hkaoˍmonˇ lehˬ, sho baˉ hkʼoˆ lo chiˆ meh taˍ ve hkaoˍmonˇ hpeh‸ ve kʼo, diˇ maˇ gʼa keu. Caˬ hkʼa meu-e leh shaˍlonˍ chu hkaw‸ da‸ leh te taˍ ve hkaoˍmonˇ gʼa hpeh‸ piˇ ve yoˬ.

6Nawˬ Gʼuiˬsha hta‸ ca tanˇ piˇ la htaˇ, hkaoˍmonˇ oˇ ve hta‸ hkʼeh‸ leh shaˍlonˍ chu gʼa ngeuˍ pfuhˍ taˍ ve yoˬ.

7Gʼuiˬsha hta‸ tanˇ piˇ tuˬ ve hkaoˍmonˇ lehˬ, ha tsuh hkʼaw keu hu taˍ ve hkaoˍmonˇ hpeh‸ ve kʼo, caˬ hkʼa meu-e leh shaˍlonˍ chu hkaw‸ da‸ taˍ ve hkaoˍmonˇ gʼa hpeh‸ piˇ ve yoˬ.

8Hkaoˍmonˇ oˇ ve Gʼuiˬsha hta‸ tanˇ piˇ tuˬ paw hkuˇ geh yuˬ kʼai-o. Yawˇ lehˬ hkaoˍmonˇ oˇ ve hta‸ tuˉ tanˇ kuiˬ lo yuˬ kʼai tuˬ yoˬ.

9Yawˇ lehˬ hkaoˍmonˇ oˇ ve hkʼa peu-eˬ awˬ tan hkaoˍmonˇ a ciˉ hkʼeh‸ yuˬ leh tuˉ tanˇ piˇ tuˬ yoˬ. Chi hkʼe ve tuˉ tanˇ tuˬ lehˬ awˬ shaˉ hawnˉ leh, Gʼuiˬsha nyi ma cawˇ ve tanˇ tuˬ hpeh‸ ve yoˬ.

10Cawˬ taˍ ve hkaoˍmonˇ lehˬ, paw hkuˇ teˇ hpaˍ awˬ pon hpeh‸ve yoˬ. Hkaoˍmonˇ oˇ ve lehˬ, Gʼuiˬsha hta‸ tanˇ piˇ ve hkaoˍmonˇ awˬ hkʼaw lo yuˬ tawˆ taˍ ve pa taw, da‸ kehˬ ve hkaoˍmonˇ hpeh‸ ve yoˬ.

11Gʼuiˬsha hta‸ tanˇ piˇ tuˬ ve hkaoˍmonˇ hkʼaˬ ve teˇ ceuˬ maˇ kʼoˆ, diˇ maˇ gʼa keu. Pehˇ gʼuiˬ htawˇ maˇ gʼa keu.

12Awˉ lawˉ peuˇ naw‸ la ve awˬ shiˍ awˬ nu teˇ hpaˍ nawˬ Gʼuiˬsha geh gʼa yuˬ laˬ ve yoˬ. Ya‸ hkʼaˇ, oˇ ve lehˬ tuˉ tanˇ piˇ tuˬ awˬ pon maˇ heˆ.

13Awˬ shiˍ awˬ nu ca tuˉ tanˇ la ve teˇ pawˆ le le, aˉ leh‸ gʼa hkaw‸ taˍ ve yoˬ. Awˬ lawn kʼo, aˉ leh‸ lehˬ nawˬ leh Gʼuiˬsha awˬ kaˍ lo te taˍ ve ka ti‸ shaˉ caˆ hpeh‸ ve yoˬ. (Nawˬ ve tanˇ tuˬ hkʼaw lo aˉ leh‸ gʼa hkaw‸ taˍ ve yoˬ)

14Awˉ lawˉ peuˇ naw‸ la ve awˬ shiˍ awˬ nu teˇ hpaˍ hta‸ nawˬ Gʼuiˬsha geh yuˬ laˬ ve teˇ yanˇ, awˬ shiˍ awˬ nu tuˉ tanˇ tuˬ hta‸ htawˇ yuˬ laˬ leh gʼa tuˉ tanˇ piˇ ve yoˬ.

15Shaˍlonˍ chu leh sha hawnˉ hta‸ htawˇ gʼa hkaw‸ tuˉ tanˇ piˇ ve yoˬ.

16Paw hkuˇ lehˬ, tanˇ tuˬ oˇ ve leh sha hawnˉ hkʼa peu-eˬ Gʼuiˬsha hta‸ gʼa tuˉ tanˇ piˇ ve yoˬ.

← Chapter 1 Jump to: Chapter 3 →