Leviticus 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Maˇ shiˍ maˇ nawˇ ve hkʼaw Gʼuiˬsha ve awˬliˇtawˇhkawˇ hta‸ te ya‸ ve chaw teˇ gʼaˇ, hkʼaˬ hkʼe gʼa te cawˇ ve awˬ lawn chi teˇ hpaˍ,

2Gʼuiˬsha Moˉseˍ hta‸ kʼoˆ piˇ taˍ ve yoˬ.

3Paw hkuˇ lonˉ teˇ gʼaˇ te ya‸ leh, chaw chi ma ve awˬ hkʼoˆ lo venˇbaˆ gaˬ la ve kʼo, yawˇ lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ haˉ teˇ hkeh hta‸ yuˬ laˬ leh, yawˇ ve venˇbaˆ awˬ pon Gʼuiˬsha hta‸ gʼa tuˉ tanˇ piˇ ve yoˬ.

4Yawˇ lehˬ nuˇ oˇ ve hta‸ aˉ po kʼo bon yehˬ yehˬmiˉhpe‸ lo sheh laˬ leh, nuˇ oˇ ve oˉ kʼoˍ hkʼoˆ lo yawˇ ve la‸ sheh taˍ peuˬ hkʼaw‸ nawˉ, Gʼuiˬsha mehˆ gʼuˇ suhˍ nuˇ oˇ ve hta‸ gʼa tiˇ pehˍ ve yoˬ.

5Oˇ hkʼe te peuˬ hkʼaw‸ nawˉ, paw hkuˇ lonˉ lehˬ nuˇ suhˍ hta‸ aˉ po kʼo bon yehˬ hkʼaw gʼa yuˬ kʼai ve yoˬ.

6Yawˇ lehˬ awˬ suhˍ hkʼaw la‸ naw tuˍ keu leh, da‸ kehˬ ve hpa ko taˍve gʼuˇ suhˍ lo suhˍ pawˆ hkʼa gaˬ gʼa hpeh‸ pfuhˍ piˇ ve yoˬ.

7Oˇ hkʼe te peuˬ hkʼaw‸ nawˉ, yawˇ lehˬ sha hawnˉ tuˉ tanˇ kuiˬ hkʼoˆ lo cawˬ ve awˬ hkaw hta‸ htawˇ, awˬ suhˍ gʼa kʼaw‸ hpeh‸ pfuhˍ piˇ ve yoˬ. Yawˇ lehˬ cawˍ taˍ sheˬ ve awˬ suhˍ hta‸ yuˬ leh, bon yehˬ yehˬmiˉhpe‸ lo cawˬ ve tuˉ tanˇ kuiˬ awˬ hkuiˉ puiˍ lo gʼa ngeuˍ baˬ ve yoˬ.

8Yawˇ lehˬ, awˬ gʼuˬ tehˆ hta‸ ngawˉ taˍ ve awˬ chu teˇ hpaˍ,

9awˬ lanˇ shiˍ leh oˇ ve hta‸ ngawˉ taˍ ve awˬ chu teˇ hpaˍ leh awˬ shehˍ hta‸ yuˬ leh,

10awˬ chawˇ te da‸ ve tuˉ tanˇ tuˬ hkʼa shuˍ, tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ.

11Oˇ hkʼe te peuˬ hkʼaw‸ nawˉ, yawˇ lehˬ nuˇ guiˬ kʼuˉ, nuˇ shaˍ, nuˇ oˉ kʼoˍ, nuˇ hkui sheh, nuˇ gʼuˬ tehˆ hkʼa peu-eˬ ve hta‸ yuˬ leh,

12yawˇ hui ve fa la awˬ baˬ hpawˇ hkʼaw‸ laˉ ngeuˍ baˬ kuiˬ lo gʼa ca tuˉ baˬ ve yoˬ.

13Iˉsaˍreˍlaˆ chaw teˇ hpaˍ maˇ shiˍ maˇ nawˇ ve hkʼaw Gʼuiˬsha ve awˬliˇtawˇhkawˇ hta‸ te ya‸ leh, yawˇ hui awˬ hkʼoˆ lo venˇbaˆ gaˬ la ve kʼo,

14yawˇ hui lehˬ venˇbaˆ gʼa ponˬ tuˬ nuˇ paˍ haˉ teˇ hkeh gʼa yuˬ laˬ ve yoˬ.

15Awˬ hoˉ awˬ naˬ teˇ hpaˍ lehˬ, nuˇ oˇ ve oˉ kʼoˍ hkʼoˆ lo yawˇ hui ve la‸ sheh taˍ peuˬ hkʼaw‸ nawˉ, oˇ kaˬ lo gʼa tiˇ pehˍ ve yoˬ.

16Paw hkuˇ lonˉ lehˬ, nuˇ suhˍ hta‸ aˉ po kʼo bon yehˬ hkʼaw yuˬ kʼai leh,

17yawˇ ve la‸ naw awˬ suhˍ hkʼaw tuˍ keu peuˬ hkʼaw‸ nawˉ, hpa ko taˍ ve gʼuˇ suhˍ lo suhˍ pawˆ hkʼa gaˬ gʼa hpeh‸ pfuhˍ piˇ ve yoˬ.

18Yawˇ lehˬ sha hawnˉ tuˉ tanˇ kuiˬ hkʼoˆ lo cawˬ ve awˬ hkaw hta‸ htawˇ, awˬ suhˍ gʼa kʼaw‸ hpeh‸ pfuhˍ piˇ ve yoˬ. Yawˇ lehˬ, cawˬ taˍ sheˍ ve awˬ suhˍ hta‸ yuˬ leh bon yehˬ yehˬmiˉhpe‸ lo cawˬ ve tuˉ tanˇ kuiˬ awˬ hkuiˉ puiˍ lo gʼa ngeuˍ baˬ ve yoˬ.

19Oˇ hkʼe te peuˬ hkʼaw‸ nawˉ, yawˇ lehˬ awˬ chu hkʼa peu-eˬ hta‸ yuˬ leh, tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ.

20Yawˇ lehˬ, venˇbaˆ gʼa ponˬ tuˬ tuˉ tanˇ piˇ ve nuˇ hta‸ te piˇ ve hkʼe, nuˇ chi hta‸ htawˇ oˇ hkʼe gʼa te piˇ ve yoˬ. Chi hkʼe te tuˉ tanˇ piˇ ve kʼo, chaw yaˇ teˇ hpaˍ venˇbaˆ gʼa ponˬ tuˬ yoˬ.

21Yawˇ lehˬ nuˇ oˇ ve hta‸ yawˇ hui ve fa la awˬ baˬ hpawˇ lo yuˬ tawˆ-e leh, gʼa ca tuˉ baˬ ve yoˬ. Chi lehˬ, chaw yaˇ teˇ hpaˍ venˇbaˆ gʼa ponˬ tuˬ tuˉ tanˇ piˇ ve tanˇ tuˬ hpeh‸ ve yoˬ.

22Jawˇmawˇ teˇ gʼaˇ maˇ shiˍ maˇnawˇ ve hkʼaw, Gʼuiˬsha ve awˬliˇtawˇhkawˇ hta‸ te ya‸ ve kʼo,

23yawˇ lehˬ te‸ chiˉ awˬ kuiˉ awˬ haiˇ maˇ cawˬ ve aˉ che‸ awˬ paˍ teˇ hkeh hta‸ gʼa yuˬ laˬ ve yoˬ.

24Yawˇ lehˬ aˉ che‸ oˇ ve oˉ kʼoˍ hkʼoˆ lo yawˇ ve la‸ sheh taˍ peuˬ hkʼaw‸ nawˉ, tuˉ tanˇ tuˬ ve to nuˇ to shaˆ teˇ hpaˍ hta‸ tiˇ pehˍ kuiˬ, tuˉ tanˇ kuiˬ awˬ na hpawˇ lo gʼa tiˇ pehˍ ve yoˬ. Chi ve lehˬ, venˇbaˆ hta‸ yuˬ baˬ piˇ tuˬ ve tuˉ tanˇ tuˬ hpeh‸ ve yoˬ.

25Paw hkuˇ lehˬ, yawˇ ve la‸ naw nuˇ suhˍ hkʼaw tuˍ keu leh, tuˉ tanˇ kuiˬ hkʼoˆ lo cawˬ ve awˬ hkaw teˇ hpaˍ hta‸ hpeh‸ pfuhˍ piˇ peuˬ hkʼaw‸ nawˉ, cawˬ taˍ sheˍ ve awˬ suhˍ hta‸ tuˉ tanˇ kuiˬ awˬ hkuiˉ puiˍ lo gʼa ngeuˍ baˬ ve yoˬ.

26Oˇ hkʼe te peuˬ hkʼaw‸ nawˉ, yawˇ lehˬ awˬ chu teˇ hpaˍ hta‸ yuˬ leh, awˬ chawˇ te da‸ ve tuˉ tanˇ tuˬ tuˉ tanˇ piˇ ve hkʼe, tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ. Jawˇmawˇ teˇ hpaˍ te ya‸ ve venˇbaˆ awˬ pon, paw hkuˇ teˇ hpaˍ Gʼuiˬsha hta‸ chi hkʼe gʼa te tanˇ piˇ ve yoˬ. Oˇ hkʼe te ve kʼo, Gʼuiˬsha yawˇ ve venˇbaˆ hta‸ hpehˇ piˇ tuˬ yoˬ.

27Iˉsaˍreˍlaˆ chaw teˇ gʼaˇ maˇ shiˍ maˇ nawˇ ve hkʼaw Gʼuiˬsha ve awˬliˇtawˇhkawˇ hta‸ te ya‸ ve kʼo,

28yawˇ lehˬ te‸ chiˉ awˬ kuiˉ awˬ haiˇ maˇ cawˬ ve aˉ che‸ awˬ ma teˇ hkeh hta‸ gʼa yuˬ laˬ ve yoˬ.

29Yawˇ lehˬ aˉ che‸ oˇ ve oˉ kʼoˍ hkʼoˆ lo la‸ sheh taˍ peuˬ hkʼaw‸ nawˉ, tuˉ tanˇ tuˬ ve to nuˇ to shaˆ teˇ hpaˍ hta‸ tiˇ pehˍ kuiˬ, tuˉ tanˇ kuiˬ awˬ na hpawˇ lo gʼa tiˇ pehˍ ve yoˬ.

30Paw hkuˇ lehˬ, yawˇ ve la‸ naw awˬ suhˍ hkʼaw tuˍ keu peuˬ hkʼaw‸ nawˉ, tuˉ tanˇ kuiˬ hkʼoˆ lo cawˬ ve awˬ hkaw teˇ hpaˍ hta‸ gʼa hpeh‸ pfuhˍ piˇ ve yoˬ. Cawˬ taˍ sheˍ ve awˬ suhˍ hta‸ tuˉ tanˇ kuiˬ awˬ hkuiˉ puiˍ lo gʼa ngeuˍ baˬ ve yoˬ.

31Oˇ hkʼe te peuˬ hkʼaw‸ nawˉ yawˇ lehˬ awˬ chu teˇ hpaˍ hta‸ yuˬ leh, awˬ chawˇ te da‸ ve tuˉ tanˇ tuˬ tuˉ tanˇ piˇ htaˇ hkʼa shuˍ, Gʼuiˬsha nyi ma cawˇ tuˬ gʼa tuˉ tanˇ piˇ ve yoˬ. Chi ve lehˬ, chaw yaˇ venˇbaˆ gʼa ponˬ tuˬ tuˉ tanˇ piˇ ve awˬ liˇ awˬ hkʼaˇ hpeh‸ ve yoˬ.

32Chaw teˇ gʼaˇ lehˬ, venˇbaˆ gʼa ponˬ tuˬ yawˬ ehˉ teˇ hkeh yuˬ veu laˇ leh ca tuˉ tanˇ la ve kʼo, yawˬ ehˉ oˇ ve lehˬ te‸ chiˉ awˬ kuiˉ awˬ haiˇ maˇ cawˬ ve yawˬ awˬ ma gʼa hpeh‸ piˇ ve yoˬ.

33Yawˇ lehˬ yawˬ ehˉ oˇ ve oˉ kʼoˍ hkʼoˆ lo la‸ sheh taˍ peuˬ hkʼaw‸ nawˉ, tuˉ tanˇ tuˬ ve to nuˇ to shaˆ teˇ hpaˍ hta‸ tiˇ pehˍ kuiˬ, tuˉ tanˇ kuiˬ awˬ na hpawˇ lo gʼa tiˇ pehˍ piˇ ve yoˬ.

34Paw hkuˇ lehˬ yawˇ ve la‸ naw awˬ suhˍ hkʼaw tuˍ keu peuˬ hkʼaw‸ nawˉ, tuˉ tanˇ kuiˬ hkʼoˆ lo cawˬ ve awˬ hkaw teˇ hpaˍ hta‸ gʼa hpeh‸ pfuhˍ piˇ ve yoˬ. Cawˬ taˍ sheˬ ve awˬ suhˍ hta‸ tuˉ tanˇ kuiˬ awˬ hkuiˉ puiˍ lo gʼa ngeuˍ baˬ ve yoˬ.

35Oˇ hkʼe te peuˬ hkʼaw‸ nawˉ, yawˇ lehˬ awˬ chu hkʼa peu-eˬ hta‸ yuˬ leh, awˬ chawˇ te da‸ ve tuˉ tanˇ tuˬ tuˉ tanˇ piˇ htaˇ hkʼa shuˍ, Gʼuiˬsha hta‸ gʼa tuˉ tanˇ piˇ ve yoˬ. Chi ve lehˬ, chaw yaˇ venˇbaˆ gʼa ponˬ tuˬ, tuˉ tanˇ piˇ ve awˬ hkʼaˇ hpeh‸ ve yoˬ. Oˇ hkʼe te ve kʼo, Gʼuiˬsha yawˇ ve venˇbaˆ hta‸ hpehˇ piˇ tuˬ yoˬ.

← Chapter 3 Jump to: Chapter 5 →