Matthew 28

Lao Bible 2012 (ພຣະຄຳພີສັກສິ)

← Chapter 27 Jump to:

1ຫລັງຈາກວັນຊະບາໂຕນັ້ນເປັນວັນອາທິດ ຕັ້ງແຕ່ເຊົ້າໃກ້ຕາເວັນຂຶ້ນ ມາຣີໄທມັກດາລາ ແລະມາຣີຄົນໜຶ່ງອີກໄດ້ໄປເບິ່ງອຸບມຸງ.

2ໃນທັນໃດນັ້ນ ກໍເກີດແຜ່ນດິນຫວັ່ນໄຫວຢ່າງຮ້າຍແຮງ ມີເທວະດາຂອງອົງພຣະຜູ້ເປັນເຈົ້າຕົນໜຶ່ງ ໄດ້ລົງມາຈາກສະຫວັນ ກື່ງກ້ອນຫີນອອກ ແລະນັ່ງຢູ່ເທິງກ້ອນຫີນນັ້ນ.

3ເທວະດາຕົນນີ້ມີລັກສະນະເໝືອນແສງຟ້າແມບ ແລະເຄື່ອງນຸ່ງກໍຂາວເໝືອນຫິມະ.

4ຝ່າຍພວກທະຫານຍາມອຸບມຸງນັ້ນ ສະທ້ານຢ້ານກົວຫລາຍ ແລະໄດ້ກາຍເປັນເໝືອນຄົນຕາຍ.

5ເທວະດາຕົນນັ້ນ ໄດ້ກ່າວແກ່ພວກແມ່ຍິງວ່າ, “ຢ່າສູ່ຢ້ານເລີຍ ເຮົາຮູ້ແລ້ວວ່າ ພວກເຈົ້າມາຊອກຫາພຣະເຢຊູເຈົ້າ ຜູ້ທີ່ຖືກຄຶງໄວ້ທີ່ໄມ້ກາງແຂນ.

6ພຣະອົງບໍ່ຢູ່ທີ່ນີ້ ພຣະອົງເປັນຄືນມາຈາກຕາຍແລ້ວ ຕາມທີ່ພຣະອົງໄດ້ກ່າວໄວ້ ຈົ່ງມາເບິ່ງບ່ອນທີ່ພວກເຂົາວາງພຣະອົງໄວ້.

7ບັດນີ້ ຈົ່ງຟ້າວໄປບອກພວກສາວົກຂອງພຣະອົງວ່າ, ‘ພຣະອົງເປັນຄືນມາຈາກຕາຍແລ້ວ ແລະພຣະອົງໄປທີ່ແຂວງຄາລີເລກ່ອນພວກເຈົ້າ ພວກເຈົ້າຈະເຫັນພຣະອົງໃນທີ່ນັ້ນ’ ນີ້ແຫຼະ ເຮົາໄດ້ບອກພວກເຈົ້າແລ້ວ.”

8ຍິງເຫຼົ່ານັ້ນຈຶ່ງຟ້າວອອກໄປຈາກອຸບມຸງທັງຢ້ານ ແລະທັງຊົມຊື່ນຍິນດີທີ່ສຸດ ແລະແລ່ນໄປບອກພວກສາວົກຂອງພຣະອົງ.

9ໃນຂະນະນັ້ນ ພຣະເຢຊູເຈົ້າໄດ້ມາພົບພວກເຂົາ ແລະກ່າວວ່າ, “ສັນຕິສຸກຈົ່ງມີແກ່ພວກເຈົ້າເທີ້ນ.” ຍິງເຫຼົ່ານັ້ນຈຶ່ງຫຍັບມາຈັບຕີນຂອງພຣະອົງ ແລະໄດ້ຂາບລົງນະມັດສະການພຣະອົງ.

10ພຣະເຢຊູເຈົ້າກ່າວແກ່ພວກນາງວ່າ, “ຢ່າສູ່ຢ້ານ ຈົ່ງໄປບອກພວກພີ່ນ້ອງຂອງເຮົາໃຫ້ໄປຍັງແຂວງຄາລີເລ ແລະໃນທີ່ນັ້ນພວກເຂົາຈະເຫັນເຮົາ.”

11ໃນຂະນະທີ່ຍິງເຫຼົ່ານັ້ນກຳລັງໄປ ທະຫານຍາມອຸບມຸງບາງຄົນໄດ້ເຂົ້າໄປໃນເມືອງ ແລະໄດ້ບອກພວກຫົວໜ້າປະໂຣຫິດ ເຖິງເຫດການທັງປວງທີ່ໄດ້ເກີດຂຶ້ນນັ້ນ.

12ພວກຫົວໜ້າປະໂຣຫິດຈຶ່ງປະຊຸມກັນກັບພວກເຖົ້າແກ່ ແລະໄດ້ເອົາເງິນຈຳນວນຫລາຍໃຫ້ພວກທະຫານຍາມ

13ແລະ ສັ່ງວ່າ, “ໃຫ້ພວກເຈົ້າເວົ້າວ່າ, ‘ພວກສາວົກຂອງລາວໄດ້ມາລັກເອົາສົບໄປໃນຕອນກາງຄືນ ໃນຂະນະທີ່ພວກເຮົານອນຫລັບຢູ່.’

14ຖ້າທ່ານຜູ້ປົກຄອງຮູ້ເຖິງເລື່ອງນີ້ ພວກເຮົາຈະຊັກຊວນເອົາໃຈເພິ່ນ ແລະຊ່ວຍໃຫ້ພວກເຈົ້າພົ້ນຈາກຄວາມທຸກຮ້ອນໃຈ.”

15ເມື່ອພວກທະຫານຍາມຮັບເອົາເງິນແລ້ວ ກໍເຮັດຕາມຄຳແນະນຳນັ້ນ ເລື່ອງນີ້ຈຶ່ງເປັນທີ່ເລົ່າລືກັນ ໃນທ່າມກາງຊາວຢິວຈົນເຖິງທຸກວັນນີ້.

16ແລ້ວພວກສາວົກສິບເອັດຄົນ ກໍໄດ້ໄປທີ່ໂນນພູໃນແຂວງຄາລີເລ ບ່ອນທີ່ພຣະເຢຊູເຈົ້າໄດ້ບອກໃຫ້ແກ່ພວກເພິ່ນນັ້ນ.

17ເມື່ອເຫັນພຣະອົງແລ້ວ ພວກເພິ່ນກໍຂາບລົງນະມັດສະການພຣະອົງ ແຕ່ບາງຄົນໃນພວກເພິ່ນຍັງສົງໄສຢູ່.

18ພຣະເຢຊູເຈົ້າຈຶ່ງໄດ້ຫຍັບເຂົ້າມາໃກ້ ແລ້ວຊົງກ່າວກັບພວກເພິ່ນວ່າ, “ອຳນາດທັງໝົດໃນສະຫວັນ ແລະທີ່ແຜ່ນດິນໂລກ ໄດ້ມອບໃຫ້ແກ່ເຮົາແລ້ວ.

19ເຫດສະນັ້ນ ພວກເຈົ້າຈົ່ງອອກໄປ ຈົ່ງເຮັດໃຫ້ຄົນທຸກຊາດເປັນລູກສິດ ໃຫ້ພວກເຂົາຮັບບັບຕິສະມາໃນພຣະນາມແຫ່ງພຣະບິດາ, ພຣະບຸດ ແລະ ພຣະວິນຍານບໍຣິສຸດເຈົ້າ

20ສັ່ງສອນພວກເຂົາໃຫ້ຖືຮັກສາທຸກໆສິ່ງທີ່ເຮົາໄດ້ສັ່ງພວກເຈົ້າໄວ້ແລ້ວນັ້ນ ນີ້ແຫຼະ ເຮົາຢູ່ກັບເຈົ້າທັງຫລາຍທຸກໆວັນຈົນສິ້ນໂລກນີ້.”

← Chapter 27 Jump to: