Numbers 18

Mossi MPBU (WẼNNAAM SEBRE 2014)

← Chapter 17 Jump to: Chapter 19 →

1Sẽn-Ka-Saab yeela a Aarõ yaa: «Ned sã n maan bũmb sẽn ka zems zĩ-sõngã pʋgẽ, yellã bee foom ne f kom-dibli wã, la Leevi buudã zugu. La sã n yaa foom ne f kom-dibli wã n beege, y tʋʋmdã maaneg pʋgẽ, yellã na n zĩnda yãmb mens zutu.

2Bɩ f kɩt tɩ Leevi buudã sẽn yaa fo saam-biisã wa fo nengẽ. La foom ne f kom-dibli wã sã n wa n kẽng kaoolã sɛk roogẽ wã n na n maan y tʋʋmdã, b na n pʋgdame bal n sõngd foom.

3Leevi buudã sẽn yaa fo saam-biisã na n maana fo sẽn date, la b maan sɛk roogã tʋʋma. La bãmb ka tog n kolg bũmb nins sẽn welg toorã, wall tẽn-kugrã ye. Woto, bãmb ne yãmb ka na n ki ye.

4Bãmb na n sõngda yãmb sɛk roogã tʋʋm fãa pʋgẽ. La ned sẽn ka Leevi buudã ka tog n wa naag yãmb ye.

5Yaa yãmb bal n tog n maand sɛk roogã tʋʋmde, la tẽn-kugrã tʋʋmd me. Woto, maam a Sẽn-Ka-Saab sũurã ka na n leb n yik ne Israyɛll nebã ye.

6Ade, mam yãka yãmb saam-biisã sẽn yaa Leevi roogã neb Israyɛll buudã suka, tɩ bãmb yaa mam dẽnda, la mam dɩk-b lame n kõ yãmb tɩ b tõe n maand sɛk roogã pʋgẽ tʋʋmã.

7La foom a Aarõ ne f kom-dibli wã na n maana y maan-kʋʋr tʋʋmdã tẽn-kugrẽ wã, ne zĩig sẽn welg toor n yɩɩd fãa wã sẽn be fu-lillidgã poorẽ wã. Yaa maam n kõ yãmb tʋʋm-kãnga. La nin-zaalg sẽn ka Leevi ned sã n kolg be, bɩ b kʋ-a.»

8Sẽn-Ka-Saab yeela a Aarõ yaa: «Maam a Sẽn-Ka-Saab kõta foom noore, tɩ f get kũun nins fãa Israyɛll nebã sẽn na n talld n wat n kõt maamã yelle. Mam dɩkda kũun-kãens n kõt foom ne f kom-dibli wã, ne bũmb nins fãa Israyɛll nebã sẽn wat n kõtẽ wã, tɩ yɩ fo nug-tikr kaamã pʋɩɩre, la a yaa no-tũudg sẽn ka sɛta.»

9Rẽ wã, b sã n wa yãk kũun ning sẽn yaa mam dẽndã n yõog bugum tẽn-kugrã zug n sɛ, sẽn kell-a wã na n yɩ fo pʋɩɩre. Yaa zomã kũunã, yel-wẽnã sugr kũun maoongã kũuni, ne zems-n-taar maoongã kũun Israyɛll nebã sẽn tall n wa kõ maamã. Kũun-kãensã fãa b sẽn wa n kõ maamã na n yɩɩ foom ne f yagensã rẽnda.

10Bõn-kãens na n yɩɩ yãmb dɩɩbo. La yaa raopã ne kom-dibli wã bal n tar noor tɩ rɩ rɩ-kãnga, bala, a yaa rɩɩb sẽn welg toore.

11Kũun a taab nins Israyɛll nebã sẽn na n tall n wa ne wã, bɩ y reeg rẽ me. Mam kõta foom kũun-kãense. La yaa foom ne f kom-dibli wã la f kom-pugli wã, la ne fo buudã neb nins fãa sẽn ka rẽgem b mensã n tõe n dɩ bõn-kãense, t'a yaa no-tũudg sẽn ka sɛta.

12Mam leb n kõta foom bõn-koaadlã dẽenem biis nins Israyɛll nebã sẽn kõt maamã: Yaa kaam sẽn yaa sõama, ne reezẽ rã-paalga, la ka-paandã Israyɛll nebã sẽn na n yãk n wa kõ maamã.

13Tẽngã bõn-koaadlã biis bãmb sẽn na n tall n wa kõ maamã fãa, na n yɩɩ fo rẽnda. Ned ning fãa sẽn be fo zakã pʋgẽ n yaa yɩlemd tõe n dɩ-b lame.

14Dẽ, bũmb nins fãa Israyɛll nebã sẽn kõt maam a Sẽn-Ka-Saabã na n yɩɩ yãmb dẽnda.

15Sẽn paase, ninsaalbã ne rũmsã kom-dẽemsã fãa b sẽn kõ maamã na n yɩɩ yãmb dẽnda. La baoosgo, fo na n deega yaoodo, n ledg ninsaalbã kom-dẽemsã, la rũms nins sẽn yaa-b rẽgdã kom-dẽems zĩigẽ.

16Bi-ribl-rẽeng buudã fãa sẽn ta kiuugu, b na n yaoo wanzuri wakɩ-koeems a nu, wa sẽn zems sɛk roogã ligd zɩslem makdgã.

17Bɩ f ra kɩt tɩ b wa yao n deeg nag-yãang bi-rẽenga, bɩ pe-yãang bi-rẽeng wall bʋ-yãang bi-rẽeng ye. Kom-dẽem-kãens yaa maam a Sẽn-Ka-Saab n so. Bɩ y raag bãmb zɩɩmã tẽn-kugrã zugu, la y rɩk b kaamã n maan maoong sẽn yõogd bugum, t'a yɩ yũ-noog maam a Sẽn-Ka-Saab yĩnga.

18Rẽ poore, bãmb nemdã na n yɩɩ yãmb dẽnda, wa zems-n-taar maoongã rũng b sẽn tall n wa kõ maamã yãoogã ne a rɩtg gerã sẽn yaa yãmb dẽndã.

19Woto, mam kõta yãmb kũun nins fãa Israyɛll nebã sẽn na n yãk kũun sẽn welg toor n kõ maam a Sẽn-Ka-Saabã. Kũun-kãens na n yɩɩ foom ne f kom-dibli wã la f kom-pugli wã pʋɩɩre, n yaa no-tũudg sẽn ka sɛta, wa sẽn zems yamsem kaool ning mam sẽn maan ne foom la ne f yagensã yĩng zamaan fãa wã.

20Sẽn-Ka-Saab leb n yeela a Aarõ yaa: «Tẽng ning mam sẽn kõ Israyɛll nebã pʋgẽ, fo ka na n paam zĩiga, wall pʋɩɩr ye. Yaa maam a Sẽn-Ka-Saab n na n yɩ fo pʋɩɩr la f paoongo, Israyɛll nebã sʋka.»

21Sẽn-Ka-Saab leb n yeelame: «Ad pʋɩɩr ning mam sẽn na n kõ Leevi buudã tɩ yɩ b yaoodo, tʋʋmd ning bãmb sẽn maand sɛk roogã yĩngã yĩnga. Bõn-koaadl nins fãa piig pʋɩɩr Israyɛll nebã sẽn na n yãk n wa kõ maamã na n yɩɩ bãmb dẽnda.

22Bɩ Israyɛll buudã neb a taabã ra kolg sɛk roogã, n wa beeg maam n ki ye.

23Yaa Leevi roogã neb bal n tog n maan sɛk roogã tʋʋma. Dẽ, bãmb sã n wa beeg b tʋʋmdã maaneg pʋga, yellã na n paa bãmb mens zugu. Yõwã yaa no-tũudg sẽn ka sɛta, yãmb yagensã fãa yĩnga. La Leevi buudã ka na n paam zĩig tɩ yɩ b pʋɩɩre, wa Israyɛll buud a taabã ye.

24La mam na n kõo bãmb pʋɩɩre. Yaa piig pʋɩɩrã Israyɛll nebã sẽn na n yãkd n wat n kõt maamã n na n yɩ bãmb dẽnda. Yaa rẽ n kɩte, tɩ mam yeel tɩ Leevi buudã ka na n lagem Israyɛll neb a taabã n paam zĩigã.»

25Sẽn-Ka-Saab yeela a Moyiis yaa:

26«Ad bũmb ning fo sẽn na n wilg Leevi buudã: Israyɛll nebã sã n tall b piig pʋɩɩrã mam sẽn yeel tɩ yaa yãmb n so wã n wa kõ yãmba, bɩ yãmb me yãk pʋɩ-kãng piig pʋɩɩr n kõ maam a Sẽn-Ka-Saabo.

27Dẽ, bõn-kãng na n yɩɩ yãmb kũun wa koodã y sẽn yãkd-y zeesẽ wã, wall b reezẽ rã-paalgã b sẽn wẽkd n ning-b b sĩmsẽ wã.

28Dẽ, woto na n yɩɩ kũun yãmb me sẽn tall n wa kõ maam. La yaa Israyɛll neb a taabã sẽn yãkd b piig pʋɩɩrã n wat n kõt yãmbã pʋgẽ, la y na n yãk pʋɩ-kãnga, n dɩk n tɩ kõ maan-kʋʋd a Aarõ, tɩ yɩ maam a Sẽn-Ka-Saab rẽnda.

29La kũun nins fãa b sẽn na n wa kõ yãmbã pʋgẽ, bɩ y yãk sẽn yaa sõama n yɩɩdã n kõ maam a Sẽn-Ka-Saabo.

30Bɩ f leb n yeel Leevi nebã yaa: Yãmb sã n wa yãk y pʋɩ-kãng n sɛ, bɩ yãmb mens soog sẽn kellã, wa Israyɛll nebã me sẽn yãkd b koodã, ne b reezẽ rãamã la b kaamã n kõt maamã, la b soog sẽn kellã.

31Yãmb ne y zakã rãmb tõe n dɩ-b-la zĩig ning fãa y sẽn date. Bala, rẽnda yaa tʋʋmd ning yãmb sẽn maand sɛk roogã pʋgẽ wã yaoodo.

32Yãmb sã n wa n yãk pʋɩɩr ning sẽn yaa sõamã wã n kõ maam n sɛ, yãmb tõe n dɩɩ sẽn kellã, tɩ yell ka zĩnd yãmb zug ye. La yãmb ka na n ki ye.»

← Chapter 17 Jump to: Chapter 19 →