Matthew 14

Mossi Moore (KÃAB-PAALGÃ KOE-NOOGO)

← Chapter 13 Jump to: Chapter 15 →

1Wakat kãnga, naab a Herood wʋma b sẽn gomd a Zezi yelle,

2la a yeela a tʋmtʋmdbã tɩ yaa a Zãmbatiis n vʋʋge, la tɩ yaa woto yĩng n kɩt t'a tar pãn-tõog n maand bõn-bãnã.

3Bala Herood dag n yõka a Zã n sẽb n kẽes bi-bees roogẽ, a ba-biig a Filip pag a Herodyaad poorẽ.

4Tɩ bõe, a Zã rag n yeela yẽnda t'a ka tar noor tɩ peeg a Heroodyaad n maan a pag ye.

5Herood dag n dat n kɩtame tɩ b kʋ a Zã, la a dag n zoeta neb kʋʋngã, tɩ bõe, b rag n geta a Zã wa Wẽnnaam no-rɛɛsa.

6La Herood dogmã tẽegr daare, a Heroodyaad bi-puglã saoo neb nins sẽn be-b be wã taoore, la yɩɩ Herood noogo,

7hal t'a wẽen t'a na n kõ-a-la bũmb ning a sẽn na n kose.

8A ma wã saglg yĩnga, a yeelame yaa: Kõ-y maam a Zãmbatiis zug ne lengr ka.

9Rĩmã sũur sãamame, la a wẽenegã yĩnga, la nebã sẽn be be n dɩtẽ wã yĩnga, a yeelame tɩ b kõ-a a sẽn datã.

10La a tʋma neb tɩ b tɩ fiuug a Zã zugã bi-beesã roogẽ.

11B talla a Zã zugã ne lengr n wa n kõ bi-puglã, la a tallame n tɩ kõ a ma.

12A Zã karen-biisã waa n dɩka a Zã kũumã n tɩ mumi. La b kẽngame n tɩ togs a Zezi.

13A Zezi sẽn wʋm bõn-kãnga, bãmb kẽe koom-koglg n kẽng zĩig neb sẽn ka be. La neb kʋʋngã sẽn bãnge, b yii tẽnsẽ wã n pʋg bãmb ne nao.

14A Zezi sẽn yi koom-koglgẽ wã, b yãa neb kʋʋngã, tɩ b nimbãaneg yõk-ba, la bãmb maaga bãad-dãmbã.

15Zaabr sẽn ta, karen-biisã kolga a Zezi n yeel-b tɩ zĩ-kãngã yaa weoogo, la wakatã zoe n yõsgame. Rẽ wã, bɩ b kuils nebã tɩ b kẽng tẽnsẽ wã n tɩ ra dɩɩbo.

16A Zezi leokame tɩ ka tɩlɛ tɩ nebã loog ye, bɩ bãmb mensã kõ-b rɩɩb tɩ b rɩ.

17Karen-biisã leokame tɩ yaa bur a nu bal ne zĩm a yiib la bãmb tar be.

18T'a Zezi yeel-b tɩ b tall rẽnda n wa-ne.

19A Zezi kɩtame tɩ nebã zĩnd moodã zugu, la b reega bur a nu wã ne zĩm a yiibã n nak n ges yĩngri, n ning-b barka, n yaool n kao burã n kõ b karen-biisã tɩ b reeg n pʋɩ neb kʋʋngã.

20Nebã fãa rɩɩme n tɩge, la b wʋka bur-kɛlã pet piig la a yiibu.

21Neb nins sẽn dɩ wã sõor kolga raop tus a nu, pagbã ne kambã toog sẽn ka naage.

22Rẽ poore, a Zezi modga b karen-biisã tɩ b kẽ koom-koglgã n deng bãmb taoor ko-kãsengã rʋʋnde, tɩ bãmb na n yõdg n kuilsa neb kʋʋngã.

23A Zezi sẽn kuils nebã n sɛ, b rʋʋ tãnga, zĩig ned sẽn ka be n na n pʋʋse. La yʋng sẽn ta, bãmb dag n bee be b yembre.

24Koom-koglgã da zoe n zãaga ne kʋɩl-koakã, la ko-pɛm da wẽed-a lame hal t'a lengdẽ, bala, sebgã da segda bãmba.

25Tõd-beoog sẽn ta, a Zezi kẽna koomã zug n babsd-ba.

26Bãmb karen-biisã sẽn yã bãmb tɩ b kẽnd ko-kãsengã zugu, b yɛɛsame n yeel tɩ yaa kɩɩma. La rabeemã yĩnga b kelmame.

27Tao-tao bala a Zezi yeela bãmb tɩ b keng b sũyã la b ra zoe rabeem tɩ yaa bãmba.

28La a Pɩyɛɛr leokame yaa: Zu-soaba, sã n sɩd yaa yãmb bɩ y yeel-m tɩ m kẽn koomã zug n wa yãmb nengẽ.

29Bãmb yeela yẽnda t'a wa. A Pɩyɛɛr yii koom-koglgẽ wã n kẽn koomã zug n dabd a Zezi nengẽ.

30La a Pɩyɛɛr sẽn yã tɩ sebgã yaa wʋsgo, rabeem yõka yẽnda. La yẽ sẽn sɩng n na n lisi, a kelmame n yeel tɩ Zu-soaba, fãag-y-ma.

31Tao-tao bala, a Zezi tẽega b nug n gãd yẽnda n yeel-a: Tẽeb bilf soaba, yaa bõe tɩ fo yam yoaada?

32Bãmb kẽe koom-koglgã pʋgẽ la sebgã yõkame.

33Neb nins sẽn dag n be koom-koglgã pʋgẽ wã wõgemda a Zezi taoor n yeele: Yãmb sɩd yaa Wẽnnaam Bi-ribla.

34Bãmb dʋʋga ko-kãsengã n ta Genezarɛt tẽnga.

35Zĩ-kãng nebã bãnga a Zezi, n tʋm neb tẽns nins sẽn pẽ wã fãa, la b talla bãad-dãmbã fãa n wa a Zezi nengẽ.

36Bãad-dãmbã bõosa a Zezi tɩ b bas tɩ b sɩɩs bãmb fuugã noor bala. La neb nins fãa sẽn sɩɩsã paama laafɩ zãnga.

← Chapter 13 Jump to: Chapter 15 →