Matthew 16

Mossi Moore (KÃAB-PAALGÃ KOE-NOOGO)

← Chapter 15 Jump to: Chapter 17 →

1Fariisẽ-dãmbã ne Saduusẽ-dãmbã kolga a Zezi n kos tɩ b maan bãnd sẽn yit yĩngr tɩ b yã, la yaa sẽn na yɩl n paam n mak bãmba.

2A Zezi leok-b lame n yeele: Zaabre, yãmb yetame tɩ zĩigã na n yɩɩ vẽenega, bala yĩngr yaa miuugu.

3La yibeoogo, yãmb yetame tɩ saag na n nii rũnna, bala yĩngr yaa miu-sablga. Yãmb mii yĩngr yɛl bilsgu, n yaool n ka tõe n bãng bãn sẽn wilgd wakatã yɛlã ye.

4Zamaan neb sẽn ya wẽns la yoaadbã baooda bãnde. La b ka na n kõ bãmb bãnd a to tɩ ka a Zonaas bãndã ye. La a Zezi basa nebã n looge.

5A Zezi karen-biisã sẽn wa n dabd ko-kãsengã rʋʋnd a to wã, b yĩmame n ka zɩ bur ye.

6A Zezi yeela bãmb tɩ b gũus b mens neer ne Fariisẽ-dãmbã la Saduusẽ-dãmbã rã-bɩlle.

7La b tagsame tɩ yaa bãmb sẽn ka zɩ burã yĩng la a Zezi gom woto.

8La a Zezi bãnga b tagsgã n yeel-ba: Tẽeb bilf rãmba! Yaa bõe tɩ yãmb tagsd y sũyẽ tɩ yaa yãmb sẽn ka zɩ burã yĩnga?

9Yãmb ket n nan ka wʋm laa? Yãmb ka tẽr bur a nu wã sẽn sek raop tus a nu wã, la a kɛlã yãmb sẽn wʋkã pet sõor laa?

10Yãmb ka tẽr bur a yopoe wã sẽn sek raop tus a naase, la a kɛlã yãmb sẽn wʋkã pet sõore?

11Bõe tɩ yãmb ka bãng tɩ ka bur yell la mam gomd ne yãmba? Gũus-y y mens ne Fariisẽ-dãmbã la Saduusẽ-dãmbã rã-bɩlle.

12La karen-biisã bãngame tɩ b sẽn yeel bãmb tɩ b gũus ne bũmb ningã, ka rã-bɩll sẽn ningd burã ye, la yaa Fariisẽ-dãmbã ne Saduusẽ-dãmbã zãmsgã.

13A Zezi sẽn ta Sezaare sẽn ya a Filip soolmã tẽngã, b soka b karen-biisã yaa: Nebã yetame tɩ maam a Ninsaal Bi-riblã yaa ãnna?

14B leokame tɩ: Neb kẽer yetame tɩ yãmb yaa a Zãmbatiis, tɩ kẽer t'a Eli, tɩ kẽer t'a Zeremi wall Wẽnnaam no-rɛɛsdbã ned a yembre.

15T'a Zezi leb n sok-ba: La yãmba, yãmb yetame tɩ mam yaa ãnna?

16A Sɩmo Pɩyɛɛr leokame n yeele: Yãmb yaa Kirist, Wẽnnaam sẽn vɩ wã Bi-riblã

17La Zezi goma ne-a n yeel-a: Sɩmo! A Zonaas biiga, bark bee fo zugu. Tɩ bõe, ka nemd walla zɩɩm n vẽneg foom ne bõn-kãngã ye. Yaa m ba sẽn be arzãnã.

18La maam, mam yeta foom tɩ foo la a Pɩyɛɛre, la tɩ mam na n mee m roogã kug-kãngã zugu, la kɩɩm-kulg ka na n tõog-a ye.

19Mam na n kõo foom arzãn soolem kʋɩlen-biisi: Bũmb nins fãa fo sẽn na n loe tẽng zug ka na n loee arzãna, la bũmb ning fãa fo sẽn na n lok tẽng zug ka na n loka arzãn me.

20Dẽ, bãmb sagla b karen-biisã neere, n yeel-b tɩ b ra togs ned baa a yen tɩ bãmb yaa Kirist ye.

21Sẽn sɩng wakat kãnga, a Zezi sɩngame n wilg b karen-biisã tɩ yaa tɩlɛ tɩ bãmb kẽng Zeruzalɛm tɩ kãsem-dãmbã ne maan-kʋʋdbã ne tõog karen-saam-dãmbã nams bãmb wʋsgo, la b kʋ bãmba. La ra-yɩt-n-daare, bãmb na n vʋʋgame.

22A Pɩyɛɛr boola bãmb n yi kɛɛng n leng-b n yeele: Zu-soaba, Wẽnd na gũ-yã! Yel-kãngã ka na n paam yãmb ye.

23La a Zezi wẽnemdame n yeel a Pɩyɛɛr yaa: Leb mam poorẽ, Sʋtãana! Fo yaa gɩdgr mam sor zugu. Bala fo tagsdã ka Wẽnnaam dẽnd ye, la yaa ninsaal dẽnda.

24Dẽ, a Zezi yeela b karen-biisã yaa: Ned sã n dat n tũ maam, bɩ a kɩɩs a meng raabo, n tʋk a ra-pɩk n pʋg maam.

25Bala ned ning sẽn baood tɩ kogl a vɩɩm, a vɩɩm na sãame, la ned ning sẽn na n bas a vɩɩm mam yĩnga, a na paam-a.

26La ned sã n paam dũni gill fãa n bas n ki, a yõod bee yɛ? Walla bõe la ninsaal na n dɩk n tek ne a yõorã?

27Bala, Ninsaal Bi-riblã na n waa ne b ba wã ziiri, ne malegse. La rẽ wẽnde, bãmb na n dola ned kam fãa wa sẽn zems a tʋʋmde.

28Sɩd-sɩda, mam yeta yãmb tɩ sẽn be-b ka wã, neb kẽer n ka na n ki hal tɩ b yãnd Ninsaal Bi-riblã sẽn wat ne b naamã.

← Chapter 15 Jump to: Chapter 17 →