Matthew 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Wakat kãnga, a Zãmbatiis waa n moonda koe-noog Zude we-rasempʋɩɩgẽ wã n yetẽ:

2Tek-y yam n kos sugr tɩ arzãn soolem kolgame.

3Yaa a Zã yell la Wẽnnaam no-rɛɛs a Ezayi dag n gom n yeele: Ned a yembr koɛɛg n kelemd we-rasempʋɩɩgẽ n yetẽ: Segl-y Zu-soabã sore. Rems-y bãmb so-bugs tɩ yɩ tɩrse.

4A Zã futã ra wʋga ne yʋgemd kõbdo, la a dag n sẽbda a sɛɛg ne gãong sẽbdga. A rɩɩb dag n yaa sʋɩy la weoog sɩɩdo.

5Zeruzalɛm dãmba ne Zude fãa nebã la tẽns fãa sẽn pẽ Zʋrdẽ wã neb kẽnga yẽ nengẽ.

6La bãmb vẽnegame n togs b yel-wẽna, tɩ yẽ lis bãmb Zʋrdẽ koomã pʋgẽ.

7La a Zã sẽn yã Fariisẽ-dãmbã ne Saduusẽ-dãmbã wʋsg sẽn wat lisgã, a yeel-b lame yaa: Wag-toos buudu, ãnna n wilg yãmb tɩ y zoe sũ-puugr sẽn watã?

8Sã n yaa a woto, bɩ y wom biis sẽn zems neb sẽn tek yam n kos sugri,

9la y ra tags t'a Abraham sẽn ya yãmb ba wã sekame ye. Tɩ bõe, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abraham kamba.

10Lar zoe n bee tɩɩs yẽgẽ moasã. B na n kɛɛga tɩɩg ning fãa sẽn ka womd bi-sõamy n lob bugmẽ.

11Mam yẽ lisda yãmb koomẽ yam tekr yĩnga, la sẽn pʋgend-a maam n watẽ wã yɩɩda maam, tɩ mam pʋs n pa zems tɩ logs bãmb neooda ye. Bãmb na n lisa yãmb Sɩɩg-sõng pʋgẽ la bugum pʋgẽ.

12Bãmb zãada b kãorgo. Bãmb na n pɩɩsa b zɛɛga, n wʋk b ki n sui b baoorẽ, la b na n yõoga wudgã ne bugum sẽn ka kiida.

13A Zezi yii Galile n wa a Zã nengẽ Zʋrdẽ t'a lis-ba.

14La a Zã zãgsame n yeele: Yaa maam n tog n wa yãmb nengẽ tɩ yãmb lis maam, tɩ yãmb wat mam nengẽ?

15A Zezi leoka yẽ yaa: Bas tɩ yɩ a woto, bala a zemsame tɩ tõnd pids bũmb nins fãa sẽn ya tɩrse. La a Zã ka kɩɩs bãmb yɛs ye.

16A Zezi sẽn paam lisg n sa, b yii koomẽ wã. La gese, yĩngr pakame, la bãmb yãa Wẽnnaam Sɩɩg sẽn wẽnd wall t'a sigd bãmb zugu.

17La koɛɛg zĩnda saasẽ n yeele: Ada yaa mam Bi-ribl-nongr sẽn ta mam yam zãnga.

← Chapter 2 Jump to: Chapter 4 →