Matthew 4

Mossi Moore (KÃAB-PAALGÃ KOE-NOOGO)

← Chapter 3 Jump to: Chapter 5 →

1Dẽ, Sɩɩg-sõng talla a Zezi n kẽng we-rasempʋɩɩgẽ tɩ rõatã na n mak bãmba.

2La bãmb sẽn loe noor rasem pis-naase, wĩndg ne yʋngo, kom yaool n yõka bãmba.

3La makdã kolgame n yeel bãmb yaa: Yãmb sã n yaa Wẽnnaam Bi-ribla, bɩ y kɩt tɩ kug-kãensã lebg buri.

4A Zezi leokame t'a gʋlsame tɩ ninsaal ka na n vɩ ne rɩɩb bal ye, la yaa ne goam nins fãa sẽn yit Wẽnnaam noorẽ wã.

5Rõatã talla bãmb n kẽng Zeruzalɛm, tẽn-sõngẽ wã, n zĩndg bãmb Wẽnd-doogã zug n yeel-b yaa:

6Yãmb sã n yaa Wẽnnaam Bi-ribla, bɩ y yɩk n tiims tẽnga, tɩ bõe, a gʋlsame tɩ bãmb na n kɩtame tɩ b malegsã gũ yãmba, tɩ b na n zãa yãmb ne b nusi, tɩ y ra wa n lak y naoor ne kugr ye.

7A Zezi yeela yẽnda t'a gʋlsame me tɩ f ra mak Zu-soaba fo Wẽnnaamã ye.

8Rõatã leb n talla bãmb n kẽng tãn-luglug zugu, n wilg bãmb dũni soolem dãmba fãa la b ziirã n yeel bãmba:

9Yãmb sã n wõgemd n waoog maam, mam na n kõo yãmb yõ wã fãa.

10A Zezi yeela yẽnda: Kẽng n looge, Sʋtãana! Bala a gʋlsame tɩ f waoog Zu-soabã fo Wẽnnaamã la f sak bãmb b yen bal tãa.

11Dẽ, rõatã basa a Zezi, la malegs waame n sõng bãmba.

12A Zezi sẽn wʋm tɩ b kẽesa a Zã bi-bees roogo, b loogame n kẽng Galile.

13Bãmb yii Nazarɛt n kẽng Kapɛrnawom sẽn be ko-kãsengã noore, Zabulon ne Neftali soolmẽ,

14tɩ bũmb ninga Wẽnnaam no-rɛɛs a Ezayi sẽn dag n togsã pidsi:

15Zabulon tẽnga, Neftali tẽnga, sor sẽn dabd ko-kãsengã sẽne n be Zʋrdẽ rʋʋnde, Galile, bu-zẽms sẽn vɩ a pʋgẽ,

16neb sẽn zĩ lik pʋgẽ yãa vẽen-kãsenga, la vẽenem puka neb nins sẽn dag n zĩ kũum tẽngẽ la a maasmẽ wã yĩnga.

17Wakat kãng tɛka, a Zezi sɩngame n moon n yeele: Tek-y yam n kos sugr tɩ arzãn soolem kolgame.

18A Zezi sẽn kẽng Galile ko-kãsengã noore, b yãa raop a yiib sẽn ya ba-biisi, a Sɩmo b sẽn boond t'a Pɩyɛɛr ne a ba-biig a Ãndre, tɩ b lobd zĩm-gãmbr ko-kãsengã pʋgẽ. Bãmb dag n yaa zĩm-yõagdba.

19A Zezi yeela bãmb yaa: Tũ-y maam la mam na n kɩtame tɩ yãmb yɩ mam nebã baoodba.

20Tao-tao bala bãmb basa b zĩm-gãmbã n tũ a Zezi.

21Bãmb sẽn kẽng taoor bilfu, b leb n yãa raop a yiib sẽn ya ba-biisi, a Zebde kom-dibli a Zak ne a ba-biig a Zã tɩ b be koom koglgẽ ne b ba a Zebde n tõgd b zĩm-gãmba. La a Zezi bool-b lame.

22Tao-tao bala, bãmb basa b koom-koglgã ne b ba n tũ a Zezi.

23A Zezi saaga Galile soolmã fãa n zãms nebã karen-dot pʋse, n moon Wẽnnaam soolem koe-noogã, n maag bãad-rãmba la koms-rãmb buud fãa sẽn be neba sʋka.

24Bãmb yʋʋr saaga Siiri soolem fãa, la b talla bãad-rãmba ne neb nins fãa yĩns tood buud toay-toay sẽn namsda, zĩn sẽn tar b rãmba, la neb sẽn lʋɩt kisĩnkiiri, la ki-boaga n wa bãmb nengẽ, la a Zezi maaga bãmba.

25Neb kʋʋng yii Galile ne Dekapol la Zeruzalɛm ne Zude la tẽns sẽn be Zʋrdẽ rʋʋndã n tũ bãmba.

← Chapter 3 Jump to: Chapter 5 →