Matthew 8

Mossi Moore (KÃAB-PAALGÃ KOE-NOOGO)

← Chapter 7 Jump to: Chapter 9 →

1A Zezi sẽn sig tãngã, kʋʋng-kãseng tũu bãmba.

2La gese, yĩng-soab a yen n wa n wõgemd bãmb taoor n yeele: Zu-soaba, yãmb sã n data, yãmb tõe n kɩtame tɩ mam lebg yɩlemde.

3A Zezi tẽega b nug n sɩɩs-a n yeele: Mam datame. Lebg yɩlemde. La tao-tao bala a yĩn-gãong-bãagã bas-a lame t'a lebg yɩlemde.

4La a Zezi yeela yẽnda yaa: Gũus f meng la f ra sak tɩ ned wʋm ye. Kẽng maan-kʋʋdã nengẽ tɩ b ges foom, la f kõ bũmb nins a Moyiis sẽn wilgã, t'a tõe n yɩ kaset b yĩnga.

5A Zezi sẽn kẽ Kapɛrnawom, sodaas koabg naab a yembr waa bãmb nengẽ n kos bãmb a woto:

6Zu-soaba, mam tʋmtʋmd n ki bogr n gãe yiri, la a namsda wʋsgo.

7A Zezi yeela yẽnda tɩ b na n kẽngame n tɩ maag-a.

8Sodaas koabg naabã leoka bãmb yaa: Mam ka sek yãmb na wa mam yir ye. Yãmb ye n gom bala, la mam tʋmtʋmdã na n paama laafɩ.

9Bõe yĩnga, mam yaa rao neb sẽn so, la mam me soo sodaase. Mam sã n yeel a yembr t'a kẽnge, a kẽngdame. La mam sã n yeel a to t'a wa, a watame. La mam sã n yeel m tʋmtʋmd t'a maan woto, a maandame.

10La a Zezi sẽn wʋm woto, b ges-a lame n nand-a, la b yeela neb nins sẽn tũud bãmbã yaa: Mam yeta yãmb sɩd tɩ mam nan pa yã tẽ-kãseng a woto, baa Israyɛll sʋkã ye.

11La mam yeta yãmb tɩ neb n na n yi yaang la taoore, n zĩnd n dɩ ne a Abraham arzãn soolmẽ.

12La b na n loba soolmã kamb lik sẽn be kɛɛngã pʋgẽ, la yãbr ne yẽn wãbr na n zĩnda beene.

13Dẽ, a Zezi yeela sodaas koabg naabã: Kuil tɩ na n yɩɩ wa fo sẽn tẽ wã bala. La wakat kãng bala tʋmtʋmdã paama maagre.

14Dẽ poore, a Zezi kẽnga a Pɩyɛɛr yiri, la b mikame t'a reem-poakã gãee ne yĩn-wɩngre.

15La a Zezi sɩɩsa a nugu, la a yĩn-wɩngrã sigame t'a yik n maan bãmb sãando.

16Zaabr sẽn ta, b talla neb wʋsg zĩn-dãmb sẽn tar n wa a Zezi nengẽ. A Zezi riga zĩn-dãmbã ne b noor goama, la b maag neb nins fãa sẽn ka laafɩ wã.

17Yɩɩ a woto tɩ Wẽnnaam no-rɛɛs a Ezayi sẽn togsã paam pidsgu. A yeelame: Bãmb deega tõnd yĩns toodo, la b zɩɩ tõnd bãase.

18A Zezi sẽn yã neb kʋʋngã sẽn gũbg bãmbã, b yeela b karen-biisã tɩ b loog n kẽng ko-kãsengã rʋʋnde.

19La tõog karen-saamb a yembr kolgame n yeel a Zezi yaa: Mam na n tũuda yãmb n kẽnd zĩig ning fãa yãmb sẽn na n kẽnge.

20La a Zezi yeela yẽnda: Waas tara bogdo, tɩ liuuli sẽn yɩgd yĩngrã tar tʋgdo, la Ninsaal Bi-riblã ka tar zĩig n na n gãneg a zug ye.

21Ned a to zĩnda bãmb karen-biisã sʋk n yeel bãmba: Zu-soaba, bas-y tɩ m deng n kẽng n tɩ mum m ba la m wa.

22La a Zezi leoka yẽnda yaa: Tũ maam, la f bas kũ-rãmbã tɩ b mum b kũum. Waas sẽn be b bok noore (8.20)

23Bãmb kẽe koom-koglgã, la bãmb karen-biisã tũu bãmba.

24La tao-tao bala sob-kãseng yika ko-kãsengã zug hal tɩ ko-pɛm limd koom-koglgã. La a Zezi da gõeeme.

25Bãmb karen-biisã wa n neka bãmb n yeele: Zu-soaba, fãag-y-do! Ad tõnd na n kiime!

26A Zezi yeela bãmb yaa: Tẽeb bilf rãmba, yaa bõe tɩ yãmb zoet rabeem? La a Zezi yikame n tãs sobdã ne ko-kãsengã, la zĩiga fãa lebga sɩddd.

27Daopã yɛɛsame n yeele: Nin-kãngã yaa bõe ned tɩ baa sobdã ne ko-kãsengã sakd bãmba?

28Bãmb sẽn dʋʋg ko-kãsengã n ta Gadara neba tẽngẽ, gãeems a yiib yii yaadẽ n wa a Zezi nengẽ. B yaa gãeen-zabds hal wʋsgo, tɩ ned ka saagd n pɩʋʋg zĩig ning b sẽn be wã ye.

29Bãmb kelmame n yeele: Wẽnnaam Bi-ribla, yãmb waame n na n maan tõnd bõe? Yãmb waame n na n nams tõnd tɩ wakatã nan ka ta laa?

30Kurkuy wʋsg n dag n be hal yɩɩg n wãbdẽ.

31La zĩn-dãmbã bõosa a Zezi n yeel tɩ b sã n dig bãmb tɩ b yi, bɩ b tʋm-b tɩ b tɩ kẽ kurkuyã.

32A Zezi yeela zĩn-dãmbã tɩ b kẽnge. La b yiime n kẽ kurkuyã. Dẽ, kurkuyã wudgame n yi ko-kãsengã noor sigdgã n bilim n lʋɩ koomã pʋgẽ, la koomã rɩ-b lame.

33Kurkuyã gũudbã zoeeme, la b kẽnga tẽngã pʋgẽ n tɩ togs bũmb nins fãa sẽn maanã, la bũmb ning sẽn maan neb nins zĩn-dãmbã sẽn dag n tarã.

34La tẽngã rãmb fãa yiime n seg a Zezi. La b sẽn yã a Zezi, b kosa bãmb tɩ b loog la b bas-b b tẽnga.

← Chapter 7 Jump to: Chapter 9 →