Matthew 17

Mossi Moore (KÃAB-PAALGÃ KOE-NOOGO)

← Chapter 16 Jump to: Chapter 18 →

1Rasem a yoob zugẽ, a Zezi peega a Pɩyɛɛr ne a Zak la a ba-biig a Zã n tall-b n yi kɛɛnga, n dʋ tãn-luglug zugu.

2A Zezi tedga bãmb nifẽ. B nengã ra yãgda wa wĩntoogo, la b futã lebga peels wa vẽenem.

3A Moyiis ne a Eli puka b mens ne bãmba n sõsd ne a Zezi.

4A Pɩyɛɛr gomame n yeel a Zezi yaa: Zu-soaba! Yaa sõama tɩ tõnd pa ka. Yãmb sã n data, mam na n tilga fu-rot a tãab ka: a yembr yãmb yĩnga, a yembr a Moyiis yĩnga, la a yembr a Eli yĩnga.

5La yẽ sẽn ket n gomda, sawadg sẽn pɩnd wa n gũbga bãmba. La ade, koɛɛg yii sawadgẽ wã n yeele: Ada yaa mam Bi-ribl-nongr sẽn ta mam yam zãnga. Kelg-y-yã-a.

6La karen-biisã sẽn wʋm koe-kãngã, rabeem kãseng yõk-b lame tɩ b lʋɩ n fõgen b nens tẽnga.

7La a Zezi kolgame n sɩɩs bãmb n yeel-b tɩ b yik la b ra zoe dabeem ye.

8Bãmb zẽka b nens n ges la b ka yã ned a to tɩ sã n ka a Zezi b yen bala.

9La bãmb sẽn wa n yi tãngã zug n sigda, a Zezi keooga bãmb a woto: Da gom-y ne ned ba a yembr yã-kãngã yell hal tɩ Ninsaal Bi-riblã wa vʋʋg n bas kũum ye.

10La karen-biisã soka a Zezi tɩ yaa bõe yĩng tɩ tõog karen-saam-dãmbã yetẽ t'a Eli n tog n deng n wa?

11A Zezi leok-b lame n yeele: Yaa sɩd t'a Eli na n deng n waa n lebs n manega bũmb fãa tɩ leb n yɩ wa pĩndã.

12La mam yeta yãmb t'a Eli zoe n waame la neba ka bãng-a ye, la b maana yẽ wa b sẽn date. Woto me, bãmb na n namsa Ninsaal Bi-riblã.

13Dẽ, bãmb karen-biisã bãngame tɩ yaa a Zãmbatiis yell la a Zezi sẽn gom ne bãmbã.

14Bãmb sẽn kolg neb kʋʋngã, dao a yembr waa n yĩgimda a Zezi taoor n yeele:

15Zu-soaba, zoe-y mam bi-riblã nimbãaneg tɩ kisĩnkĩir n tar-a t'a namsd wʋsgo. Naoor wʋsgo, a lʋɩta bugmẽ wall koomẽ.

16Mam tall-a lame n wa yãmb karen-biisã nengẽ la b ka tõog n maag-a ye.

17A Zezi leok-a lame n yeele: Zamaan neb sẽn ka tẽeb la sẽn ya nin-wẽnse! Mam na n bee ne yãmb hal tɩ ta wakat bʋgo? Mam na n maana sũ-mar ne yãmb tɩ ta wakat bʋgo? Tall-y biigã n wa-ne ka.

18A Zezi lenga zĩna, la a yiime n bas biigã, la a paama laafɩ wakat kãng bala.

19Dẽ, a Zezi karen-biisã kolga bãmb wakat neb sẽn ka be ne bãmba n sok-b yaa: Bõe tɩ tõnd ka tõog n dig zĩn-kãngã?

20A Zezi yeela bãmba: Yaa yãmb tẽebã sẽn paoodã yĩnga. Mam yeta yãmb sɩd-sɩd tɩ yãmb sã n tar tẽeb sẽn zem siin-bila, yãmb na n yeela tãn-kãngã t'a serg ka n kẽng ka, la a na n kẽngame. La bũmb kõn zĩnd yãmb sẽn kõn tõog n maan ye.

21La zĩn-kãngã buud ka yita, tɩ ka ne pʋʋsg la no-loeer ye.

22La bãmb sẽn gõod Galile, a Zezi yeela b karen-biisã yaa: B na n zãmba Ninsaal Bi-riblã n yõk n kõ ninsaalbã.

23B na n kʋʋ-b lame, la ra-yɩt-n-daare, b na n vʋʋgame. La karen-biisã sũyã sãama wʋsgo.

24A Zezi ne b karen-biisã sẽn ta Kapɛrnawom, neb nins sẽn deegd wẽnd-doog yaood darkem a yiib-yiibã kolga a Pɩyɛɛr n sok-a bãmb karen-saambã sã n ka yaood wẽnd-doogã yaoodã.

25La a Pɩyɛɛr leokame tɩ b yaoodame sẽ! La bãmb sẽn kẽ roogẽ, a Zezi renga a Pɩyɛɛr n gom n sok-a: Sɩmo! Fo tagsda a wãna? Dũni rĩm-dãmba deegda yaood la yõor yaood ãnna rãmb nengẽ? B kamba nengẽ bii, bɩ sãambã nengẽ?

26La a leoka bãmb tɩ yaa sãambã nengẽ. La a Zezi leoka yẽnda yaa: Sã n ya a woto, rẽnd tẽngã kamb ka tog n yao ye.

27La sẽn na yɩl tɩ tõnd da beeg-ba, kẽng ko-kãsengã noore, n lob zĩm-lɛoog n yõk zĩif ning sẽn na n yɩ-a pipi n gãd lɛoogã. Yaag a noorã tɩ f na n yãa ligd beene n yiis n wa n yao maam ne fo yĩnga.

← Chapter 16 Jump to: Chapter 18 →