Matthew 26 — Mossi Moore (KÃAB-PAALGÃ KOE-NOOGO)

13Sɩd-sɩda, mam yeta yãmb tɩ dũni tɛk fãa, zĩig ning fãa b sẽn na n moon koe-no-kãngã fãa, b na n goma bũmb ning pagã sẽn maanã yelle, a tẽegr yĩnga.

14Dẽ, karen-biisã piig la a yiibã ned a yembr sẽn boond t'a Zudas Iskaryo kẽnga maan-kʋʋdbã kãsem-dãmbã nengẽ

15n tɩ sok-b tɩ b na n kõo yẽnda bõe t'a yõk a Zezi n kõ-ba? La b yao-a-la wanzuri ligd pis-tã.

16Sẽn sɩng ne wakat kãnga, a baoo we-sõng a sẽn na n paam n yõk a Zezi n kõ.

17Bur sẽn ka rã-bɩllã wakat pipi daare, karen-biisã waa n soka a Zezi b sẽn dat tɩ bãmb segl zʋʋg-n-basã rɩɩb zĩig ning n kõ-ba.

18A Zezi leok-b lame n yeele: Kẽng-y tẽngã pʋgẽ, a zagl yiri, n tɩ yeel-a tɩ yãmb karen-saambã n yet a woto: "Mam wakat kolgame. Yaa fo yirã la mam dat n maan zʋʋg-n-basã kibs ne m karen-biisã."

19Karen-biisã maana bũmb ning a Zezi sẽn yeelã, la b segla zʋʋg-n-basã kibsa.

20Zĩ-sobd sẽn ta, a Zezi zĩnda ne b karen-biisã n na n dɩ.

21La b rɩɩbã wakate, a Zezi yeelame: Sɩd-sɩda, mam yeta yãmb tɩ yãmb ned a yembr n na n yõk maam n kõ.

22Karen-biisã sũy sãama wʋsgo, tɩ ned fãa sok a Zezi yaa: Zu-soaba, yaa maam?

23B leoka bãmb n yeele: Ned ning sẽn tʋm-a laagẽ wã ne maamã, yaa soab kãng n na n zãmb maamã.

24Ninsaal Bi-riblã na n looga wa b sẽn dag n gʋls b yellã to-to wã. La ned ning sẽn na n yõk-a Ninsaal Bi-riblã n kõ wã na paam toogo. Dao kãng sã n dag n ka dogẽ n são.

25A Zudas, soab ning sẽn na n zãmb-a bãmbã gomame n soke: Karen-saamba, yaa maam? A Zezi leok-a lame n yeele: Foom n yeele.

26Bãmb sẽn dɩta, a Zezi dɩka buri. La b sẽn ning-a barka, b kaoo-a lame n kõ b karen-biisã n yeele: Reeg n dɩ-y-yã. Yõwã yaa mam yĩngã.

27Rẽ zugẽ, b rɩka bõn-yũudla. La b sẽn ning-a barka, b kõo b karen-biisã n yeele: Bɩ yãmb fãa yũ-a,

28bala, yõwã yaa mam zɩɩm, kãab-paalgã zɩɩm sẽn daag neb wʋsg yĩnga, yel-wẽna sugr yĩnga.

29Mam yeta yãmb tɩ mam ka na n leb n yũ nasaar sib ko-kãngã hal tɩ ta daar ning m sẽn na n yũ a paalg ne yãmb m ba soolmã pʋgẽ ye.

30La bãmb sẽn yɩɩl yɩɩn-sõamyã, bãmb kẽnga oliiv tɩɩs tãngã zugu.

31Dẽ, a Zezi yeela bãmba: Yʋn-kãngã bala, yãmb fãa na n zoee n basa maam. Bala, b gʋlsa a woto: "Mam na n wẽe rũm-kɩɩmã, la piisã sẽn dag n ya sullã na n sãeegame."

32La m vʋʋgrã zugẽ, m na n deng-y la Galile.

33A Pɩyɛɛr gomame n yeele: Baa neba fãa sã n na n bas yãmba, mam yẽ kõn bas yãmb ye.

34La a Zezi yeel-a lame: Sɩd-sɩda, mam yeta foom tɩ yʋn-kãngã bala, sẽn deng no-raoog kɛlenga, fo na n yeela naoor a tãab tɩ fo ka mi maam ye.

35A Pɩyɛɛr yeela bãmba: Baa sã n na n yɩ tɩlae tɩ mam ki ne yãmba, mam ka na n yeel tɩ m ka mi yãmb ye. La karen-biis a taabã me yeela a woto.

36Rẽ poore, a Zezi kẽnga zĩig ning sẽn boond tɩ Getsemaane wã ne b karen-biisã, la b yeel-b lame yaa: Zĩnd-y ka tɩ m kẽng taoor bilf n tɩ pʋʋse.

37A Zezi peega a Pɩyɛɛr ne a Zebde kom-dibli a yiibã, la sũ-sãoong kãseng ne pelen-yɩk yõka a Zezi.

38Dẽ, bãmb yeelame: Sũ-sãoong n tar maam hal n dat n kʋ maam. Pa-y ka n neend ne maam.

39La bãmb kẽnga taoor bilfu, n wõgemd n fõgen b nenga, n pʋʋs a woto: M ba, sã n tõeeme, bɩ y kɩt tɩ bõn-yũudl kãngã loog n bas maam. Baoosgo, bɩ a ra yɩ mam sẽn dat ye, a yɩ wa yãmb sẽn data.

40Bãmb lebg n waa b karen-biisã nengẽ n mik tɩ b gõeeme, la b yeela a Pɩyɛɛr yaa: Yãmb ka tõog n neend ne maam lɛɛr a yen tãa ye.

41Neend-y la y pʋʋse, tɩ y ra wa n kẽ makr pʋgẽ ye. Sɩɩgã ratame, la yĩngã pãng paoodame.

42Bãmb leb n vẽsga naoor a yiib soab n pʋʋs a woto: M ba, sã n yaa tɩ ka tõe tɩ bõn-yũudl kãngã loog kal mam yũ-a, bɩ y tʋlsem maane.

43Bãmb waame n mik tɩ b leb n gõeeme, gõeem sẽn tar-bã yĩnga.

44Bãmb basa b karen-biisã n leb n zãag naoor a tãab soaba, n leb n pʋʋs wa pĩndã.

45Dẽ poore, b leb n waa b karen-biisã nengẽ n yeel-ba: Yãmb gõee moasã n vʋʋsdẽ. Ad wakat kolgame tɩ b na n yõk Ninsaal Bi-riblã n kõ yel-wẽn maandba.

46Yik-y tɩ d kẽnge. Sẽn zãmb-a maamã kolgdame.

47Bãmb sẽn na n ket n gomda, piig la a yiibã ned a yembre, a Zudas waa ne neb kʋʋngo, maan-kʋʋdba kãsem-dãmba ne tẽnga nin-kẽembã sẽn tʋme, la b ra zãada zabr sʋʋs ne roɛya.

48Ned ning sẽn zãmbd a Zezi wã dag n kõo nebã bãnd n yeel tɩ ned ning yẽ sẽn na n mokã, yaa yẽ la a Zezi, la b yõk-a.

49A kolga a Zezi tao-tao bal n yeele: Karen-saamba, ne y yʋngo! La a moka bãmba.

50A Zezi yeela yẽnda: M zoa, fo sẽn wa n na n maan bũmb ningã, maane. Woto, nin-kãens kolgame n gãd a Zezi, n yõk-ba.

51Neb nins sẽn dag n be ne a Zezi wã, ned a yembr gãda a sʋʋg n wõog n kɛ maan-kʋʋd kãsmã tʋmtʋmd n fiuug a tʋbre.

52La a Zezi yeel-a lame: Lebs f sʋʋgã n sui a wʋʋgẽ. Bala neb nins fãa sẽn na n zab ne zabr sʋʋse, zabr sʋʋs n na n sãam-ba.

53Fo tẽedame tɩ mam ka tõe n bool m ba tɩ b tʋm maam malegs sẽn yɩɩd tus-tus sul piig la a yiib laa?

54Sã n yɩ a woto, gʋls-sõamyã sẽn yet t'a tog n yɩɩ a woto wã na n yɩɩ a wãn n paam pidsgu.

55Wakat kãnga, a Zezi yeela neb kʋʋngã: Yãmb waa ne zabr sʋʋse la ne roɛy n na n yõk maam wa m yaa fãada. Mam dag n zĩi ne yãmb wẽnd-doogẽ wã daar fãa, n zãmsd nebã, la yãmb ka yõk maam ye.

56La bõn-kãens fãa maaname tɩ bũmb nins Wẽnnaam no-rɛɛsdbã sẽn gʋlsã paam pidsgu. Dẽ, karen-biisã fãa basa a Zezi n zoe.

57Neb nins sẽn yõk a Zezi wã talla bãmb n kẽng maan-kʋʋd kãsem a Kayif zakẽ, zĩig ning tõog karen-saam-dãmbã ne kãsem-dãmba sẽn tigs taabã.

58A Pɩyɛɛr pʋgla a Zezi yɩɩg-yɩɩg hal tɩ ta maan-kʋʋd kãsmã zakẽ, n kẽ n naag ne gũudbã n zĩẽ n dat n ges yellã sẽn na n baas to-to

59Maan-kʋʋdbã kãsem-dãmbã ne kaorengã yɛl-bʋʋdbã fãa da baooda kaset zĩrĩ n na n paam n rõd a Zezi n kɩt tɩ b kʋ-ba,

60la b ka paam ye, baa ne zĩrĩ kaset rãmb wʋsg sẽn wa wã. Neb a yiib n yaool n wa n yeele:

61Rao-kãngã yeelame tɩ yẽ tõe n sãama wẽnd-doogã n lebs n me-a dasem a tãab pʋgẽ.

62Maan-kʋʋd kãsmã yikame n sok a Zezi yaa: Yãmb ka leokd tɩ bũmb laa? Yaa ne bõe la b rõt yãmbã?

63A Zezi kell n sĩndame. La maan-kʋʋd kãsmã yeela bãmba: Mam kota yãmb ne Wẽnnaam sẽn vɩ wã yʋʋr tɩ y togs tõnd yãmb sã n yaa Kirist, Wẽnnaam Bi-ribla.

64A Zezi leok-a lame n yeele: Yaa yãmb sẽn yeelã. Sẽn paase, mam yeta yãmb tɩ sẽn sɩng ne moasã, yãmb na n yãa "Ninsaal Bi-riblã, tɩ b zĩ Sẽn-Tõe-a-fãa wã rɩtgo, la b zao yĩngr sawat n watẽ."

65Dẽ, maan-kʋʋd kãsmã kẽesa a fut n yeele: Bãmb paooga Wẽnnaam. Tõnd leb n baooda kaset dãmb n na n maan bõe? Yãmb la sẽn wʋm bãmb sẽn paoog Wẽnnaamã la! Yãmb tagsg yaa bõe?

66B leokame n yeele: Bãmb togda kʋʋbo.

67Dẽ, b tʋbsa a Zezi nengã kolkoodo, la b pãb bãmb ne nug-gila. Neb kẽer laala bãmb pegs n yeele:

68Kirist, togs-y bãngr gomd n wilg tõnd ned ning sẽn pãb-a yãmbã.

69Wakat kãnga, a Pɩyɛɛr dag n zĩi yɩnga, zaka pʋga. Tʋmtʋmd-poak a yembr kolga yẽnda n yeele: Fo me rag n bee ne Galile ned a Zezi wã.

70La a kɩɩsa neba fãa taoor n yeel tɩ yẽ ka mi bũmb ning pagã sẽn dat n yeelã ye.

71La yẽ sẽn yik n kẽnd zakã noor sẽne, tʋmtʋmd-poak a to n yãnd yẽnda n yeel neb a taabã tɩ rao-kãngã dag n bee ne Nazarɛt dao a Zezi.

72A leb n kɩɩsame, n wẽen n yeele: Mam ka mi rao-kãngã ye.

73Sẽn yɩ bilfu, neb nins sẽn dag n be be wã kolgame n yeel a Pɩyɛɛr yaa: Sɩda yẽ, fo yaa bãmb ned a yembre, bala fo goamã bal wilgda fo sẽn ya a soaba.

74Dẽ, a sɩngame n kãab la a wẽen n yeele: Mam ka mi rao-kãngã ye. Tao-tao bala, no-raoog kelmame.

75La a Pɩyɛɛr tẽega a Zezi sẽn dag n yeel tɩ: Sẽn deng no-raoog sẽn na n kelme, fo na n kɩɩsa naoor a tãabo, tɩ fo ka mi maam ye. La a yii yɩng n yãb ne sũ-sãoong-kãsenga.