Matthew 24

Mossi Moore (KÃAB-PAALGÃ KOE-NOOGO)

← Chapter 23 Jump to: Chapter 25 →

1A Zezi sẽn yi wẽnd-doogẽ wã n loogdẽ, b karen-biisã kolgame n wilg bãmb tɩ b ges a meebã sẽn yɩ to-to

2A Zezi leoka bãmb n yeele: Yãmb yãa bõn-kãensã fãa? Sɩd-sɩda, mam yeta yãmb tɩ kugr baa a yen kõn pa a to zug ye. B na n leeb-b-la zãng n lubi.

3Bãmb zĩnda oliiv tɩɩs tãngã zugu, la bãmb karen-biisã waa bãmb nengẽ neb sẽn ka be be wakat n yeel-b yaa: Togs-y tõnd wakat ning bõn-kãens fãa sẽn na n zĩndã, la bãnd ning sẽn na n wilg tɩ yãmb watame la tɩ dũni na n saame wã.

4A Zezi leok-b lame n yeele: Gũus-y y mens tɩ ned da belg yãmb ye.

5Tɩ bõe, neb wʋsg n na n dɩk mam yʋʋr n wa n yeel tɩ yaa bãmb la Kiristã. La b na n tudga neb wʋsgo.

6Yãmb na n wʋmame tɩ b gomd zab yelle, la y wʋm zab rãamde. Yõk-y y mens n da yɛɛs ye, bala, bõn-kãens fãa tog n waame. La ket n nan ka wakat saab ye.

7Soolem na n yika zabr ne soolem a to, tɩ rĩung yik ne rĩung a to, la kom ne tẽn-digimdg na n zĩnda zĩig-zĩiga.

8Yõwã fãa na n yɩɩ wa rogem toog sɩngr bala.

9Dẽ, b na n namsa yãmba, n kʋ yãmba, la soolem fãa nebã na n kisga yãmb mam yʋʋrã yĩnga.

10Bõn-kãng na n waa ne neb wʋsg lʋɩɩse. B na n zãmba taaba, n kisg taaba.

11Belgr no-rɛɛsdb wʋsg na n pukame la b na n belga neb wʋsg n tõoge.

12Wẽngã maaneg sẽn na n paamd paoosgã yĩnga, neb wʋsg nonglem na n boogame.

13La ned ning fãa sẽn na n mao-a tɩ wakat ta, a na paam fãagre.

14Wẽnnaam soolmã koe-no-kãngã na n moona dũni gill fãa, tɩ yɩ kaset soolem fãa nebã yĩnga. Dẽ, wakat saab na yaool n ta.

15Yaa woto yĩng tɩ yãmb sã n yãnd sũ-sãoong bõn-wẽngã Wẽnnaam no-rɛɛs a Daniyɛl sẽn dag n gom a yellã sẽn be zĩ-sõngẽ wã, bɩ sẽn karemd-a wã gũusi,

16bɩ neb nins sẽn be Zude wã zoe n dʋ tãmsã,

17bɩ ned ning sẽn be beoong zug da sig n kẽ a roogẽ n na n dɩk bũmb be ye,

18la bɩ ned ning sẽn be a pʋʋgẽ ra leb a poorẽ n na n tɩ rɩk a fuug ye.

19Pagb nins sẽn tʋte la sẽn yẽsemd kamb wakat kãngã na paam toogo.

20Bõos-y Wẽnnaam tɩ y zoeesã ra yɩ waood wẽnd wall vʋʋsg daar ye.

21Bala, wakat kãnga, to-kãseng n na n zĩndi, la a buud ka zĩnd hal dũni sɩngr wakat tɩ ta masã ye, la a buud kõn zĩnd yɛs ye, abada.

22La da-kãens sõorã sã n dag n ka boogẽ, ned baa a yen dag n kõn põsẽ ye. La b booga da-kãens sõor nin-tũusdsã yĩnga.

23Dẽ, ned sã n yeel yãmb tɩ Kiristã bee ka wall ka sẽne, bɩ y da tẽ a soab ye.

24Tɩ bõe, belgr kirist-rãmb la belgr no-rɛɛsdb n na n puki. B na n maana bõn-kãsemse, la bõn-yɛɛsdse, hal tɩ b sã n tõe menga, b na n tudga nin-tũusdsã mense.

25Gese, mam pĩnd n togsa yãmb bõn-kãnga.

26Dẽ, b sã n yeel yãmb tɩ "ad Kiristã bee we-rasempʋɩɩgẽ wã," bɩ y ra kẽng ye, wall "ad b bee roogẽ wã," bɩ y ra tẽ ye.

27Sɩda, a wa sa-yãgb sẽn yit yaang n yãg n tãag nin-taoorã, Ninsaal Bi-riblã waoong me na n yɩɩ a woto.

28Dɩgr sẽn be zĩig ning fãa, yɩbrend na tigs taab be.

29Tao-tao bala, ra-kãens toogã zugẽ, wĩndgã na n sobgame, kiuugã peelem kõn leb n zĩnd ye, ãdsã na n yii yĩngr n sʋʋge, la saasẽ pãens na rigimdi.

30Wakat kãng masã, Ninsaal Bi-riblã bãnd na n puka saasẽ. Buud fãa sẽn be dũni na n wiisame, la b na n yãa Ninsaal Bi-riblã sẽn zao sawat n wat ne pãn-kãsenga la ne ziiri.

31Bãmb na n tʋma b malegs ne baorg koe-kãsenga, tɩ b tigs bãmb nin-tũusdsã sẽn be kɩrems a naasã, hal saasẽ kɩreng a yen tɩ ta a to.

32Reeg-y kankangã yel-bũndã tɩ yɩ zãmsg y yĩnga. Kankang sã n wa n tãood wil-poala, n sɩng n tobdẽ, yãmb miime tɩ sig-noy kolgame.

33Woto me, yãmb me sã n wa n yã bõn-kãensã fãa, bɩ y bãng tɩ Ninsaal Bi-riblã kolgame la b bee dignoorẽ.

34Sɩd sɩda, mam yeta yãmb tɩ zamaan kãngã kõn sa tɩ bõn-kãensã fãa ka maan ye.

35Saasẽ la tẽng na looge, la mam goamã kõn loog ye.

36Sã n yaa ne a daarã la a wakatã, ned baa a yen ka mi ye: malegsã sẽn be arzãnã ka mi, Bi-riblã ka mi. Yaa d ba wã bal n mi.

37Bũmb ning sẽn zĩnd a Nowe wakatã n na n zĩnd Ninsaal Bi-riblã waoong wakat me.

38Bala, rasem nins sẽn deng sãoong sa-kãsengã, nebã dag n dɩtame la b yũuda, n kẽed kãadem la b yiisd b kamb kãadem, hal tɩ ta daar ning a Nowe sẽn kẽ koom koglgã pʋgẽ wã.

39Bãmb da ka tẽed yell hal tɩ sãoong sa-kãsengã wa n kãag bãmb fãa. Na n yɩɩ a woto me Ninsaal Bi-riblã waoong wakate.

40Dẽ, daop a yiib n na n tʋmd pʋʋg pʋgẽ: b na n dɩka a yen la b bas a to wã.

41Pagb a yiib n na n werd neerẽ: b na n dɩka a yembr la b bas a to wã.

42Rẽ yĩnga, neend-y, yãmb sẽn ka mi daar ning yãmb Zu-soabã sẽn na n wa wã yĩnga.

43Bãng-y tɩ yir soab sã n da bãngẽ wagdr sẽn na n wa yʋngã wakat ninga, a dag n na n gũume la a ka na n bas-a t'a poog a roogã ye.

44Woto yĩnga, yãmb me segl n sɛ, bala, Ninsaal Bi-riblã na n waa wakat ning yãmb sẽn ka tagsd tɩ b na wa wã ye.

45Dẽ wã, tʋmtʋmd bʋg n maand sɩda, la a ya gũus-m-meng soaba, t'a soaalã lʋɩɩs-a a nebã taoore, t'a tõe n kõ-b rɩɩb wakat fãa sẽn segde?

46Tʋmtʋmd kãng soaalã sã n lebg n wa n mik t'a maanda a woto, tʋmtʋmdã sũur na n yɩɩ noogo.

47Sɩd-sɩda, mam yeta yãmb t'a soaalã na n kɩtame t'a soog bũmb nins fãa yẽ sẽn tarã.

48La a sã n ya tʋmtʋmd yoog sẽn yet t'a soaalã kaoosda waoongo,

49a sã n sɩng n pãb a zĩnd-n-taasã, a sã n naag rã-yũudbã n dɩtẽ la a yũuda,

50a soaalã na n waa daar ning a sẽn ka tẽeda, la wakat ning a sẽn ka mi ye.

51La a na n sɩbg-a-la sõama, tɩ bũmb ning sẽn paamd zãmb dãmbã paam-a, zĩig ning yãbr la yẽn wãbr sẽn na n zĩndã.

← Chapter 23 Jump to: Chapter 25 →