Matthew 9

Mossi Moore (KÃAB-PAALGÃ KOE-NOOGO)

← Chapter 8 Jump to: Chapter 10 →

1A Zezi kẽe koom-koglg n leb n pɩʋʋg ko-kãsengã n kuil b tẽngẽ.

2B talla rao a yembr sẽn ki bogre, n gãe a gãagẽ, n wa bãmb nengẽ. A Zezi sẽn yã bãmb tẽebo, b yeela sẽn ki-a bogrã yaa: M biiga, keng f sũuri! Fo paama f yel-wẽnã sugri.

3Gom-kãng yĩnga, tõog karen-saam-dãmb kẽer tagsa b sũyẽ tɩ rao-kãnga paoogda Wẽnnaam.

4La a Zezi sẽn mi bãmb tagsgã yeela bãmba: Yaa bõe tɩ yãmb tar tags wẽns y sũyã pʋse?

5Bʋg yeelg n ya naana n yɩɩda: "Fo paama f yel-wẽna sugr bii, bɩ yik n kẽne?"

6La yaa tɩ nebã na bãng tɩ Ninsaal Bi-riblã tara noor tẽng zug ka tɩ kõ yel-wẽnã sugri. A Zezi yeela sẽn ki-a bogrã: Yik n dɩk f gãag n kuili.

7Yẽ yikame n kuil a yiri.

8La kʋʋngã sẽn yã woto, b yɛɛsame la b waooga Wẽnnaam b sẽn kõ ninsaalb pãng a woto wã yĩnga.

9A Zezi sẽn yi be n kẽng taoore, b yãa rao a yembr sẽn boond t'a Matye t'a zĩ yaood-deegr zĩigẽ. Bãmb yeela yẽnda t'a tũ bãmba. Daowã yikame n tũ bãmba.

10A Zezi sẽn zĩ a Matye roogẽ n dɩtẽ, yaood-dɛɛgdb ne yel-wẽn maandb waa wʋsgo, n zĩnd ne bãmb ne b karen-biisã n dɩtẽ.

11Fariisẽ-dãmba sẽn yã rẽnda, b soka a Zezi karen-biisã yaa: Yaa bõe tɩ yãmb karen-saambã rɩt ne yaood-dɛɛgdb la yel-wẽn maandba?

12A Zezi sẽn wʋm b sokrã yeela bãmb yaa: Ka neb nins sẽn tar laafɩ wã n baood tɩp ye, yaa bãad-dãmba.

13Dẽ, kẽng n zãms-y koe-kãngã võore: "Mam sẽn dat yaa nimbãan-zoeere la ka maand ye." Bala mam ka wa tɩ bool nin-tɩrs ye la yaa yel-wẽn maandbã.

14Dẽ, a Zã karen-biis waa a Zezi nengẽ n sok bãmb a woto: Yaa bõe tɩ tõnd ne Fariisẽ-dãmbã loet noor tɩ yãmb karen-biisã yaool n ka loetẽ?

15A Zezi leoka bãmb yaa: Dẽ yĩnga pʋg-paal sɩd tũud-n-taas tõe n maana sũ-sãoong wakat ninga a sẽn ket n be ne bãmba? Day n wat tɩ b na n yiis pʋg-paalã sɩdã n bas-ba. Dẽ bãmb na yaool n loe noore.

16Ned ka be sẽn na n dɩk peen-paalg n lisg fu-kʋdg ye. Tɩ bõe, peen-paalgã na n yõbgame n kɩt tɩ fu-kʋdgã kẽeg n yɩɩg pĩnda.

17Ned ka be sẽn na n sui rã-paalg ko-wao-kʋdẽ ye. Sã n ka rẽ, ko-waoosã na pusi, rãamã na raage, la ko-waoosã na sãam. Rã-paalg tog n suii ko-wao-paalsẽ. Woto b tõe n bĩng-a lame t'a ka sãam ye.

18A Zezi sẽn ket n gomd ne bãmb a woto, naab a yembr waa n wõgemda bãmb taoor n yeele: Mam bi-pugl n ki moas-moasã. Wa-y n tik-y yẽnda ne y nugu la a na n vʋʋgame.

19A Zezi yika ne b karen-biisã n tũ yẽnda.

20La gese, pag a yembr bãag sẽn tar t'a zɩɩm daagd hal yʋʋm piig la a yiib waa a Zezi poorẽ n sɩɩs bãmb fuug noore.

21Bala a yeela a sũurẽ t'a sã n tõog n sɩɩs bãmb fuugã bala, a na n paama laafɩ.

22A Zezi sẽn wẽnemd n yã pagã, b yeel-a lame: M biiga, keng f sũuri! Fo tẽeb n maag foom. La pʋg-kãng paama maagr wakat kãng bala.

23La a Zezi sẽn ta naabã yir n yã wɩ-pɛɛbdbã ne neb kʋʋng sẽn maand bʋrga, bãmb yeel-b lame:

24Yi-y tɩ bi-puglã ka ki ye, a gõeeme. La nebã yaala a Zezi.

25La b sẽn yiis nebã n sɛ, a Zezi kẽeme n gãd bi-puglã nugu, la a yikame.

26La bõn-kãng kibar saaga tẽngã fãa.

27A Zezi sẽn yit zĩ-kãnga, zoens a yiib pʋgla bãmb n kelemdẽ n yetẽ: David Bi-ribla, zoe-y tõnd nimbãanega!

28A Zezi sẽn ta yiri, zoensã kolga bãmba, la a Zezi sok-b lame: Yãmb tẽedame tɩ mam tõe n maana bõn-kãnga? La b leokame tɩ n-ye Zu-soaba.

29Dẽ a Zezi sɩɩsa zoensã ninã n yeele: Bɩ a yɩ ne yãmb a wa yãmb sẽn tẽedã.

30La b ninã pukame. La a Zezi keooga bãmb neer n yeel-b tɩ b gũus tɩ ned da bãng yõwã ye.

31La bãmb sẽn looge, b moona a Zezi yʋʋrã tẽn-kãng zĩiga fãa.

32La bãmb sẽn yita, b talla muk zĩn sẽn tar n wa a Zezi nengẽ.

33La a Zezi sẽn dig zĩnã, mukã gomame. La neb kʋʋngã yɛɛsame n yeel tɩ ned nan ka yã bũmb a woto Israyɛll pʋgẽ ye.

34La Fariisẽ-dãmbã yeelame tɩ yaa ne zĩn-dãmbã naab pãng la a Zezi digd zĩn-dãmbã.

35A Zezi saaga tẽn-bɛd la tẽn-bõoneg fãa n zãms nebã b karen-dotẽ, la b moon Wẽnnaam soolem koe-noogã, la b maag bãad-dãmba la koms-rãmb buud fãa.

36A Zezi sẽn yã neb kʋʋngã, b nimbãaneg yõka bãmba. Tɩ bõe, nin-kãens da yɛɛme tɩ b nensã yeege, n ya wa piis sẽn ka tar pe-kɩɩm ye.

37Dẽ a Zezi yeela b karen-biisã yaa: Koodã sẽn dat tigsgã yaa wʋsgo, la tigsdbã sõor paoodame.

38Dẽ yĩnga, kos-y tigsgã soab tɩ b tʋm tʋmtʋmdb b pʋʋgẽ wã.

← Chapter 8 Jump to: Chapter 10 →