Matthew 21

Mossi Moore (KÃAB-PAALGÃ KOE-NOOGO)

← Chapter 20 Jump to: Chapter 22 →

1Bãmb sẽn kolg Zeruzalɛm n ta Bɛtfaaze sẽn be oliiv tɩɩs tãngã sẽne, a Zezi tʋma b karen-biis a yiib

2n yeel-b yaa: Kẽng-y tẽng ning sẽn be yãmb taoorã. Yãmb sã n kẽ be bala, y na n yãnda bõn-yãang sẽn loe tɩ bõn-bil be ne-a. Lok-y-b n wa n kõ maam.

3Ned sã n yeel tɩ bũmb bɩ y leok tɩ yaa Zu-soabã n dat-ba, la wakat kãnga, a na n bas-b lame tɩ b looge.

4Mik bõn-kãng maaname tɩ Wẽnnaam no-rɛɛsã sẽn gomã paam pidsgu:

5Yeel-y Siyõ nebã yaa: Ges-y-yã! Yãmb Rĩmã zaoo bõn-yãanga, bõn-bila, rũng b sẽn zombd biiga, n wat yãmb nengẽ ne sũ-bʋgsem wʋsgo.

6Karen-biisã kẽngame n tɩ maan wa a Zezi sẽn yeel bãmbã.

7Bãmb talla bõn-yãangã ne bõn-bilã n wa, n paal b fut bõensã poɛy t'a Zezi zombe.

8Sẽn kolg neb kʋʋngã fãa yɛɛda b fut sorã zugu, tɩ kẽer kɛ tɩɩs vãad n gãneg sorã zugu.

9Neb nins sẽn da be a Zezi taoorã ne neb nins sẽn pʋgd-b bãmbã dag n kelemdame n yetẽ yaa: Hozaana a David Bi-ribla! Bark bee ned ning sẽn wat ne Zu-soabã yʋʋrã zugu! Hozaana hal saasẽ.

10A Zezi sẽn kẽ Zeruzalɛm, tẽngã fãa rãmbame tɩ b sokdẽ tɩ yaa yɛ ned la woto?

11Kʋʋngã rag n leokdame tɩ yaa a Zezi, Wẽnnaam no-rɛɛs sẽn yit Galile Nazarɛt.

12A Zezi kẽe wẽnd-doogã zakẽ n dig neb nins fãa sẽn dag n koosd la b raad wẽnd-doogã zakẽ wã. Bãmb leeba ligd tekdbã taabl dãmba la wall-koaasdbã goeelse.

13La a Zezi yeel-b lame yaa: A gʋlsame tɩ "b na n boola mam roogã tɩ pʋʋsg roogo." La yãmba, yãmb maan-a lame t'a lebg wagda geongo.

14Zoens la wobs kolga a Zezi wẽnd-doogẽ wã, la a Zezi maag-b lame.

15Maan-kʋʋdbã kãsem-dãmbã ne tõog karen-saam-dãmbã sẽn yã bõn-yɛɛsds nins a Zezi sẽn maanã, la kambã sẽn kaasd Wẽnnaam doogẽ wã n yetẽ tɩ "hozaana a David Bi-riblã," b sũyã sãamame.

16La bãmb soka a Zezi b sã n wʋmda kambã sẽn yetã. A Zezi leoka bãmb tɩ n-ye, n sok-b b sã n nan ka karem gom-kãensã sẽn yet tɩ yãmb paama pẽgr sẽn yit kom-bõoneg la kamb sẽn ket n yẽsemd noyẽ laa?

17A Zezi basa bãmb be n yi tẽngã n kẽng Betani n tɩ pa be yʋʋn-kãnga.

18La yibeoogo, a Zezi sẽn leb n lebd Zeruzalɛm, kom da tara bãmba.

19La bãmb yãa kankang sẽn yas sorã noore. Bãmb kẽngame n tɩ mik t'a ka tar biis ye, yaa vãad bala. La b yeel-a lame yaa: Fo kõn leb n wom biis ye, abada. La wakat kãng bala kankangã kʋɩɩme.

20La karen-biisã sẽn yã woto, a linga bãmba, tɩ b sok tɩ kankangã yɩɩ wãn n kʋɩ zĩig pʋgẽ a woto?

21A Zezi leoka bãmb n yeele: Mam yeta yãmb sɩda, tɩ yãmb sã n tar tẽeb n ka sãmbdẽ, yãmb na n maana bũmb ning sẽn maan kankangã, la ka rẽ bal ye. Yãmb sã n yeel tãn-kãngã t'a yik a sẽn beẽ wã n kẽ ko-kãsengã pʋgẽ, a na n yɩɩ a woto bala.

22Yãmb na n paama bũmb ning fãa y sẽn na n pʋʋs n kos ne tẽebo.

23A Zezi kẽe wẽnd-doogẽ wã, la b sẽn zãmsd nebã wakate, maan-kʋʋdbã kãsem-dãmbã ne tẽngã nin-kẽemb waa n soka bãmb tɩ yaa ne no-bʋg la bãmb maand bõn-kãngã, la ãnna n kõ bãmb no-kãnga?

24A Zezi leoka bãmb yaa: Mam me na n soka yãmb sokr a yembre. Yãmb sã n leok maam, mam na togs yãmb mam sẽn paam noorã zĩig ning n maand bõn-kãnga.

25A Zã lisgã yii yɛ? Arzãn bii, bɩ ninsaalb nengẽ? La b yẽsa ne taab n yeele: Tõnd sã n leok t'a yii arzãna, b na n yeelame tɩ la yaa bõe tɩ tõnd ka tẽ bãmba?

26La tõnd sã n leok t'a yii ninsaalb nengẽ, d tog n zoee neb kʋʋngã: Bala b fãa tẽedame t'a Zã yaa Wẽnnaam no-rɛɛsa.

27Dẽ, b leoka a Zezi tɩ b ka mi ye. T'a Zezi lebs n leok-b tɩ bãmb me ka na n togs-b bãmb sẽn paam noorã zĩig ning n maand bõn-kãnga wã ye.

28Yãmb tagsg yaa a wãna? Dao a yen n dag n tar a kom-dibli a yiibu. Yẽ goma ne pipi soabã n yeel-a: "M biiga, kẽng n tɩ tʋm m nasaar sib pʋʋgẽ wã rũnna."

29La a leokame t'a ka na n kẽng ye. La yẽ teka yam n kẽnge.

30Ba wã goma ne yiib-n-soabã n yeel yẽnda me a woto bala. La bi-kãng leokame n yeele: "M baaba, mam na n kẽngame." La a yaool n ka kẽng ye.

31Bãmb b yiibã sʋka, bʋg n maan a ba wã raabo? La bãmb leokame tɩ yaa pipi soabã. La a Zezi yeela bãmb yaa: Mam yeta yãmb sɩd-sɩd tɩ yaood-dɛɛgdbã ne pʋg-yoaadbã na n denga yãmb Wẽnnaam soolmã pʋgẽ.

32Bala, a Zã waa yãmb nengẽ n wilg yãmb tɩrlem sore, la yãmb ka tẽ yẽnda ye. La yaood-dɛɛgdbã ne pʋg-yoaadbã tẽe yẽnda. La baa ne yãmb sẽn yã bõn-kãngã, yãmb yam ka tek tɩ y tẽ-a ye.

33Kelg-y yel-bũnd a to. Yir soab a yembr n dag n sel nasaar sib pʋʋgo, n wẽ yãgr n gũbg-a, la a tuk vẽ wẽkr bok a pʋgẽ, la me gãosgo, n dɩk-a n peng nasaar sib koaadba, la a yi n tog sore.

34Nasaar sibã yãgsg wakat sẽn kolge, yẽ tʋma a tʋmtʋmdb nasaar sib koaadbã nengẽ tɩ b tɩ reeg nasaar sibã.

35La nasaar sib koaadbã yõga tʋmtʋmdbã n pãb a yembre, n kʋ a yembre la b lob a tãab soabã ne kuga.

36Yẽ leb n tʋma tʋmtʋmdb a taaba, sõor sẽn yɩɩd pĩnd dãmbã, la b maana bãmb me a woto.

37A yaool n tʋma a bi-ribl bãmb nengẽ n tẽed tɩ b na n waoog-a lame.

38La nasaar sib koaadbã sẽn yãnd biigã, b yẽsa ne taab a woto: Yaa yõwã n na n soog a ba wã paoongã fãa. Wa-y tɩ d kʋ-a tɩ paoongã lebg tõnd tẽnda.

39La bãmb yõka biigã n yiis nasaar sib pʋʋgẽ wã n kʋ.

40Moasã, nasaar sib pʋʋgã soab sã n wa, a na n maana koaadb kãens bõe?

41Bãmb leoka a Zezi yaa: A na n kɩtame tɩ nin-wẽns kãens ki nimbãan-kũum, la a rɩk pʋʋgã n peng koaadb a taab sẽn na kõ yẽ nasaar sibã a bɩʋʋng wakate.

42A Zezi yeela bãmb yaa: Yãmb nan ka karem gʋls-sõamyã sẽn yetã laa? "Kugr ning tãn-metbã sẽn zãgsã, a lebga roogã pãng kugri, a soakã zĩig kugri. Yaa Zu-soabã n kɩt t'a lebg a woto, la a yaa bõn-kãseng tõnd nifẽ."

43Yaa woto yĩnga mam yeta yãmb tɩ b na n deega Wẽnnaam soolmã yãmb nugẽ n kõ buud a to sẽn na wom soolmã biisi.

44Ned ning sẽn na n lʋɩ kug-kãngã zug na n tõtmame. La kug-kãngã sẽn na n lʋɩ ned ning zugu, a na n beds-a lame.

45Maan-kʋʋdbã kãsem-dãmbã ne Fariisẽ-dãmbã sẽn wʋm yel-bũndã, b bãngame tɩ yaa bãmb yell la a Zezi da gomda.

46Bãmb baoome n dat n yõk a Zezi la b rag n zoeta nebã, tɩ bõe, nebã tẽedame t'a Zezi yaa Wẽnnaam no-rɛɛsa.

← Chapter 20 Jump to: Chapter 22 →