Matthew 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1A Zezi sẽn dog Zude Betlehɛm, rĩm a Herood zamaanẽ, gese, yam dãmb yii yaang n wa Zeruzalɛm n soke:

2Zuif-rãmba rĩmã sẽn nan dogã bee yɛ? Bala tõnd yãa bãmb ãdg yaanga, la tõnd waame n na n waoog bãmba.

3Rĩm a Herood sẽn wʋm dẽnda, yẽ ne Zeruzalɛm dãmbã fãa maana yɩɩre.

4Herood tigma tẽngã maan-kʋʋdbã kãsem-dãmba fãa ne tõog karen-saam-dãmbã n sok-b Kirist sẽn da tog n dog tẽng ninga.

5Bãmb yeela yẽnda tɩ yaa Zude Betlehɛm, bala Wẽnnaam no-rɛɛsã dag n gʋlsame n yeel a woto:

6"Foo Betlehɛm, Zuda tẽnga, yaa vẽeneg tɩ fo ka poorẽ Zuda tẽn-kãsemsã sʋk ye. Tɩ bõe, naab n na n yi fo pʋgẽ n dɩlg Israyɛll sẽn ya mam nebã."

7La Herood soosame n bool yam dãmbã n sok-b neere n bãng ãdgã sẽn puk wakat ninga.

8Yẽ tʋma bãmb Betlehɛm n yeel-ba: Kẽng-y n tɩ bao-y n bãng-y biigã yell neere, la y sã n yãnd-a, bɩ y lebg n wa n togs-ma, tɩ mam me tõe n kẽng n tɩ waoog-a.

9Bãmb sẽn kelg rĩmã goam n sɛ, b loogame. La haya, ãdg ning bãmb sẽn dag n yã yaangã kẽnga bãmb taoore, hal tɩ ta zĩig ning bi-bilfã sẽn be wã, la a yalsame.

10Bãmb sẽn yã ãdgã, b paama sũ-no-kãsenga.

11Bãmb kẽe roogẽ wã, la b yãa biigã ne a ma a Maari, la bãmb wõgemdame n waoog biigã. Dẽ poore, bãmb logsa b kordo, n yãgs kũun n kõ Bãmba: yaa sãnem la wisdu, la miir sẽn tar yũ-noogo.

12La Wẽnnaam sẽn sagl bãmb zãmsd pʋgẽ tɩ b ra leb n tũ Herood nengẽ, bãmb dɩka sor a to n kuili.

13Bãmb sẽn looge, Zu-soabã malɛk puka a meng ne a Zozɛf zãmsd pʋgẽ n yeel-a: Yik n dɩk biigã ne a ma n zoe n kẽng Ezipte. Zĩnd be hal tɩ mam leb n wa n gom ne foom. Tɩ bõe, Herood na n baoo biigã, sẽn na yɩl n kʋ-a.

14A Zozɛf yikame n dɩk biigã ne a ma ne yʋngo n kẽng Ezipt.

15La yẽ zĩnda be hal tɩ ta Herood kũum, tɩ bũmb ning Zu-soabã sẽn dag n gom ne b no-rɛɛsã noorã paam pidsgu. Bãmb yeelame: Mam boola m biigã t'a yi Ezipte.

16La Herood sẽn mik tɩ yam dãmbã belga yẽnda, a sũurã puuga hal wʋsgo, t'a tʋm neb Betlehɛm ne a tẽn-kɩremsã tɩ b tɩ kʋ kom-dibli fãa sẽn zems yʋʋm a yiibu la sẽn ka ta woto me, sẽn zems yẽ sẽn dag n sok yam dãmbã n bãng ãdgã sẽn puk wakatã.

17Woto, Wẽnnaam no-rɛɛs a Zeremi sẽn dag n togsã paama pidsgu. A yeelame:

18Koɛɛg n zẽk Rama, yãbr la wiis-kãsemse. Yaa a Rasɛll n yãbd a kamba, la a ka sakd belsg ye, a kambã sẽn ka be wã yĩnga.

19La Herood sẽn ki, Zu-soabã malɛk puka a meng ne a Zozɛf zãmsd pʋgẽ Ezipt tẽng n yeel-a:

20Yik n dɩk biigã ne a ma n leb Israyɛll tẽnga, bala neb nins sẽn dag n baood biigã n na n kʋ wã kiime.

21La a Zozɛf yik n dɩka biigã ne a ma n leb Israyɛll tẽnga.

22La yẽ sẽn wʋm t'a Arkelawus reega a ba zĩig n dɩt naam Zude, yẽ zoee rabeem n ka kẽng be ye. La Wẽnnaam sẽn sagl yẽ zãmsd pʋgẽ yĩnga, a kẽnga Galile soolmẽ,

23la a tɩ zĩnda tẽng sẽn boond tɩ Nazarɛt tɩ bũmb ning Wẽnnaam no-rɛɛsdbã sẽn dag n togsã paam pidsgu. B ra yeelame tɩ b na n boola a Zezi tɩ Nazarɛt neda.

← Chapter 1 Jump to: Chapter 3 →