Matthew 28

Mossi Moore (KÃAB-PAALGÃ KOE-NOOGO)

← Chapter 27 Jump to:

1Zuif-rãmbã vʋʋsg daar loogr zugẽ, semennã pipi daar tõd-beoogo, a Maari sẽn yit Magdala, ne Maari a to wã kẽngame n na n tɩ ges yaoogã.

2La gese, tẽn-digimdg kãseng zĩndame. Tɩ bõe, Zu-soabã malɛk yii arzãn n sigi, n wa bilg kugrã n zĩnd a zugu.

3Malɛkã dag n wẽnda wa sa-yãgbo, la a fuugã yaa pɛɛlg fas wa lampalga.

4Gũudba rigda ne rabeem n lebg wa kũum.

5La malɛkã goma ne pagbã n yeel-ba: Sã n yaa ne yãmba, bɩ y ra yɛɛs ye. Mam miime tɩ yãmb baooda a Zezi b sẽn ka da-pɩk zugã.

6Bãmb ka be ka ye, bala, b vʋʋga wa b sẽn dag n yeelã. Wa n ges-y zĩig ning b sẽn dag n gãe wã,

7la y kẽng tao-tao n tɩ togs b karen-biisã tɩ b vʋʋgame n bas kũum. La ade, b renga yãmb taoor Galile. Yaa be la yãmb na n yã bãmba. Ade, mam togsa yãmba.

8B yii yaoogã zĩigẽ tao-tao ne rabeem, la ne sũ-no-kãsenga, la b zoeeme n tɩ togs karen-biisã koɛɛgã.

9La gese, a Zezi wa n sega pagbã n yeel-b yaa: Mam pʋʋsda yãmba. Bãmb kolgame n gãd a Zezi naowã n waoog-ba.

10Dẽ, a Zezi yeel-b lame yaa: Da maan-y rabeem ye. Kẽng n tɩ yeel-y m ba-biisã tɩ b kẽng Galile. Yaa be la b na n yã maam.

11Pagbã sẽn nan ket n be sorẽ, gũudbã neb kẽer kẽnga tẽngã pʋgẽ n tɩ togs maan-kʋʋdbã kãsem-dãmbã bũmb nins fãa sẽn maanã.

12Bãmb ne nin-kẽembã tigsa taab n yã taaba, la b kõo sodaasã ligd wʋsg

13n yeel-b tɩ b yeel tɩ bãmb gũsame t'a Zezi karen-biisã wa zuk kũumã,

14la Gʋvɛrneerã sã n wʋme, bãmb mensã na n goma ne-a n tõog t'a ka maan bãmb bũmb ye.

15Sodaasã deega ligdã, la b maana wa b sẽn yeel bãmbã. La gom-kãng kell n saaga Zuif-rãmbã sʋk hal tɩ ta rũnna.

16Karen-biis piig la a yembrã kẽnga Galile, tãng ning a Zezi sẽn dag n bilg bãmbã zugu.

17La b sẽn yãnd a Zezi, b waooga bãmba. La neb kẽer maana sãmbse.

18A Zezi kolgame n gom ne bãmb a woto: Wẽnnaam kõo maam pãng fãa sẽn be arzãn la tẽng zugu.

19Bɩ y kẽng n maan neba buud fãa tɩ yɩ mam karen-biisi, n lis bãmb ne Ba, la Bi-ribla, la Sɩɩg-sõng yʋʋre,

20la y zãms bãmb tɩ b sak bũmb nins fãa mam sẽn yeel yãmb tɩ y maanã. La gese, mam bee ne yãmb wakat fãa, hal tɩ ta wakat sɛɛbo.

← Chapter 27 Jump to: